4
Pédrobe Juánbeca dolaquinunca
1 Junni Pedro tsachilabe cuenta caquinasanan, israelita mantaminla jalainue. Patelelabe saduseo tinunlabe Diosichi yaca cuidaimin polisia capitanbe jalainue. 2 Aman Pédrobe Juanbe tsachilaca micarinato, Jesús puyato mansonhinueque micarinaminlanue. Jun tenchi jeralelanan mansonhicaichunaequenan micarinaminlanue. Junni Pédrola tsanque micarinaminlaca israelita mantaminla duque paito 3 yalaca calaquinue. Junni quebi cato, ayuna nanchi fecári Pédrolaca do taminlanue. 4 Tsan josanan duque tsachila Pedro micaricaca meráto, Jesube cayailainue. Unilalacasiri minan, mante mili tsansi cayaica junla inue.
5 Aman junni ayuna nanchi israelita mantaminla ya Jerusalén pueblobi layailainue. Mantá tan unicalabe, israelítala tala mantaca micariminlabe, 6 fe mantá tan patelebe, Caifabe, manca Juanbe, Alejándrobe, mantá tan patelechi uyan familialabe layailainue. Aman fe mantá tan patele Anasio mumun jominue. 7 Junni aman Pédrobe Juánbeca quitsabi wirucarito, itsanque panhalaquinue:
—¿Ti mantate tsanlaquiyun? latinue. ¿Mo nulaca tsanquisa carin? latinue.
8 Junni Pedro Diosichi Tencabe jera seque mantaito itsantinue:
—Israelita mantaminla, israelita unicala, 9 ¿nula chiquilabe tíca miino muquilaquin? tinue. ¿Jancan jomin tsachi manseica jonunca panhalaquinayun? Tsanque sen quinunca miino muquilaquinari, 10 junni meralaquede! tinue. Jerale israelita tsachila junca miinola joe. Jesús Nasareno yaca jera manse suwacae tinue. Jesucrístochi mantate in jancan jomin tsachi nulachi cale senan manwirurae tinue. Nulari Jesuca corosibi totesa carilaquee tinue. Diosi mantimini yaca puyaca jominca mansoncarinue tinue. 11 Meralaquede! Diosichi Pilabi itsanque chuteca joe:
Suca ya quiminla su mancaca seitoe tito quepolaquichunaeque chuteca joe.
Tsan josanan, ya suri uraran fe munaranun su patichunaeque chuteca joe.
Junni nulari jun ya quiminla cuwenta jolajoe. Jesucristo jun su cuwenta joe tinue. Nulari yaca seiton joe tito quepocala josanan, 12 yasiri jutsa quinaminlaca se larimin joe tinue. Diosi yaca mumun pato mantá cuwanue tinue yape jerale tote chumin tsachila yabesiri se lolaisa.
13 Aman Pédrobe Juanbe epe tsachila jominlanue. Duquenan estudiaica iton jominlanue. Tsanla jotonan, luratuto paniquinaminlanue. Junni israelita mantaminla Pédrobe Juanbe pánaminca meráto wepanalainue. Junsi tenhilainue Jesube miicala joto tsan jolajoeque. 14 Junnasanan, ya manse suwaca jun tsachinan junbi Pédrolabe pemanwiruraminue. Jun tenchi israelita mantaminlari yaca quirato, man fiquinantiya beco pano podeitulajonue. 15 Junsi Pédrolaca tamochi nechi moora larito, israelita mantaminla talari tenpalaquinue. 16 Itsanlatinue:
—¿In tsachilaca niyan quintsan junhun? latinue. Wepanato quirantsancari tsara seque quilaquee yape uyan tsachila jera quirato tennalarasa. Jerusalenbi chumin tsachila junca jera miralarae latinue. Jun tenchi chiquilari nene joe tino podeitulajoyoe latinue. 17 Junto aman yalaca sonba payito, jele pontsan joe latinue yape uyanlanan yalachi fiquica meralaquitusa. Jesuchi mantate mobenantiya cuenta manpolarilaquituna! tintsan joe latinue. Yachi mantate micarilaquinari, nulaca ura casticaquilaqueyanae tintsan joe latinue.
18 Junni Pédrolaca manwiyasa carito, Jesuchi mantate natiya manpatusa mantalaquinue. Jesuchi mantate micarilaquituna! tilatinue. 19 Junni tsantinaminlaca meráto, Pédrobe Juanbe beconan itsanlatinue:
—Nulari tenca cato miilaide! Chiquilari Diosicari merátuto, nulacari meránari, ¿yari Diosibe sen jono jun? 20 Chiquila quiranuncari, meránuncari, cuenta manpolarinonan jolajoyoe latinue.
Pédrola israelita mantaminlabe tsantilatinue. 21 Junni mantaminlari duque pa jolajosanan, jerale epe tsachilari Diosica duque sen joe latinaminue jancanca manse suwanun tenchi. Jun tenchi mantaminlari epe tsachilaca jelechi Pédrobe Juánbeca casticaquitulajonue. Junto yalaca manan manholeto, manlarilaquinue. 22 Aman ya jancan jomin manseica jun tsachiri junpalu chunca wata fe taminue.
Sonban tenca suwadeque rocailainunca
23 Aman Pédrobe Juanbe manlolaitobi, Jesube penenaminlachica manjilainue. Junchi manjito, mantá tan patelelabe, mantá tan unicalabe palaquinanunca jera manpolarilaquinue. 24 Junni Jesuchi tsachila junca meráto, jeralela man parejori tenca cato Diosibe itsanque rocailainue:
—Mantamin Diosi, nu yoquidoca quinue. Toca quinue. Lamarica quinue. Nu jeralete ticatiya sonnaminlaca jera quinue. 25 Matu to miya Daviri nube seque mantaimin jominue. Junni nuchi Tencabe mantaito David itsanque pila chutenue:
Uyan to tsachilari paito cuenta quilaquichunaeque chutenue.
In to tsachilanan seiton quino tenca calaquichunaeque chutenue.
Juntonan yari epe jochunae. ¿Ti quichun tsanlatichunan?
26 Uyan to miyalanan layailaichunaeque chutenue Diosibe quicaachun.
In to mantaminlanan layailaichunaeque chutenue.
Miya Diosica pachi, ya wenteca jun Cristo tinunca pachi layailaichunaeque chutenue.
27 Junni Diosi, nu tuca pila chutesa carinue latinue. Nuchi pilabi jera tsanhichunaeque chuteca josa, jun tsanquenan patinue latinue. In to miya Herodes, uyan to miya Poncio Pilato, aman yalabenan in to tsachilabenan, uyan to tsachilabenan, jeralela layaito Jesuchi contra jominlanue. Jesuri nuchi tsara sen Nao joe latinue. Nuri yaca wenteto, mantá tan suwanue. Tsan jominca yala jeralela yaca paito layaica jominlanue latinue. 28 Nu mantimini matulenan jera tenca caya jominue latinue Jesús jera niyan intsan jonunca. Nu tede ponue latinue. Junni Jesuca pa junlari jera ticatiya quinilaquee latinue. Nuri numa pato Itsanquichunae tica josa, jun tsannan quinilaquee latinue. 29 Chiquilari nube mantaiminla joyoe. Tsan josanan, chiquilaca seiton quichi latinae. Aman nu Diosi, junca meráto, chiquilaca sonba tenca suwade! chiquilari jeleratuto nuchi fiquica palaquichun. 30 Junni chiquila nuchi fiquica palaquinasanan, nu Diosi tede poto quiyanpunlaca manse suwade! latinue. Jesús nuchi tsara sen Nao joe. Junni chiquilaca Jesuchi mantate duque wepanato quirantsancari seque quisa caride! latinue yape tsachilari junca quirato nuca tenca calaquisa.
31 Junni Diosibe tsanque rocainunsi, layainun tamori wecainue. Junnasale Diosichi Tenca yalachibi jera seque mantaquebi winue. Junnan yalari luratuto, Diosichi fiquica seque pánaminlanue.
Man layanni jera taminla jonunca
32-33 Junni Crístochi mantá tanla Miya Jesuca pánaminlanue yaca mansonhicaca quiracalayoeque. Diosi yala jeralelaca duque laquirato seque ayudainaminue.
Junnan aman jerale Jesucrístobe cayaica junla man junni munaralarato, man tencari cato chuminlanue. Yala ticatiya tato, yaca tsacumin joyoe titumin jominlanue. Ticatiya tato, jeralela man parejo tamin jominlanue. Monantiya isapun itominlanue. 34 Ticatiya munajanasa nenamin tsachilanan itominlanue. Aman molatiya to tatori, o ya tatori, junca jera osito cala cato, 35 ya calaca Crístochi mantá tanlachi cuwamin jominlanue. Junni yalaman jerale munaraminlachi mancuwamin jominlanue. 36 Aman junnasa Chipre tobi nechi jaca tsachi manca jominue. Crístochi mantá tanlari yaca Bernabé tensaato mumun polaquinue. Yalachi fiquichiri laqui jominlaca payimin tsachica Bernabé tinun jominue. Yari Levichi bolon israelita tsachi jominue. 37 Junni yanan yachi toca osito, cala cato tanjato, Crístochi mantá tanlachi jera cuwanue.
<- Mantá Tanla 3Mantá Tanla 5 ->