1 Aman se lotobi miilaiyoe jun pisa Malta mumun jominueque. 2 Junni junbi chuminla chiquilaca laqui tito, chiquilabe duque sen jominlae. Aman suwa quinasa, jidá jelequira jominhe. Junni nin quilaquee yape chiquila lobailaisa. Chiquilaca mile pechularana! latie. 3 Junsi Páblori te man tuntu cato, ninbi nancarie. Junni janpe pun pini nin chibachi tebi nechi loto, Pábloca tedele siniito erunhie. 4 Junni Máltabi chumin tsachilari pini erunhinunca quirato, Pábloca nosa pato itsanlatie:

—In tsachiri tsachilaca totemin jomin jonhoe latie. Jun tenchi lamaribi nechi se loca jotonan, pini jalinan puyaniichunae latie totemin joto.

5 Junni Pablo tedeca piquisi piquisiquee yape piniri ninbi manqueereisa. Junni Páblori niyanantiya itue. 6 Junni ya tsachila méraminlae pini jalinari towachunan, o moora puyan queereichunanque. Tsanni duque mérasanan Páblori niyanantiya itue. Junni manan mantenca cato, yaca diosi jonhoe latie.

7 Aman jun pisa cobernadori jun quelote chuminue Publio mumun. Junte yachi wita jominue. Junni yari chiquilaca facarito, peman ma fecári seque chusa carie. 8 Junnasa Públiochi apari cuparabe pe quiyanbe tato, quiyanpun tsominue. Junni Páblori quiyanpunca quirabi jito, tedechi tale quito, Diosibe rocainan manseie. 9 Manseinan, uyan quiyanpunlanan manseichique jalaie jun pisabi chuminla. Junni yalanan jera manseilaie.

10-11 Junni Malta pisabi chuminlari chiquilachi duque ticatiya epe cuwalaquee. Junnasa manca barco jun pisabi peman pe me tsominue yape pilu polesa. Ya barconan Alejandría pueblobi nechi jaca jominue. Cástor y Pólux mumun barco jominue. Junni chiquilanan peman pe pisabi mératobi, jun barcobi wito jilaiyoe. Junni chiquilari barcobi wilaichinasa, ya pisabi chuminlari barcobi titiya munarano jonunca cuwalaquee. 12 Junni barcochi jito, Siracusa pueblobi féto, junte peman ma fecári chularayoe. 13 Junni junbi nechi to quelose Regio pueblo fecári jilaiyoe. Junni ayuna nanchi wu butunni tala quinanan, cajino podeilaiyoe. Junto junhayuna nanchi Puteoli pueblobi felaiyoe.

14 Junte barcobi nechi loto, Jesucrístobe penenaminlabe tulailaiyoe. Yalari rocailaie man tominco fecári pechularadeque. Junni yalabe man tominco fecári chutobi, Roma puebloca jilaiyoe. 15 Junni Rómabi chumin Jesucrístobe penenaminla chiquila jananunca meráto, minute tulaibi jalainue. Weyan weyanla Tres Tabernas tinun pueblo fecári jalainanue; weyan weyanlari Foro de Apio tinun pueblo fecári chiquilaca tulaibi jalainanue. Junni Páblori yalaca quirato, Diosibe acradeseito, sonba tenca cae. 16 Junsi aman Roma pueblobi felaiyoe. Junni capitanni doraminlaca coronelichi cuwaponue. Pábloca mantimini donun yabi potuto, chicanle chusa carilaquee yaca cuidaimin soldadobe.

17 Junni Pablo peman ma Rómabi chuminnan, junbi chumin israelita mantaminlaca jasa carie. Junni layailainunbi, Pablo yalabe itsantie:

—Israelítala, lanan israelítayoe. Tsan jomincanan Jerusalenbi chumin israelítalari laca románolachi cuwapoto dosa carilaquee. La israelítalaca natiya seiton quitusanan, chiquilachi tatalachi mite nenanoca natiya yucacuratusanan, laca dosa carilaquee. 18 Junni románolari laca miitobi, manlarichi latie. Totentsancari jutsa iton joe latie. 19 Tsan josanan, israelítalari laca manlaritulajona! latie. Jun tenchi la románolabe rocaiyoe nulachi fe mantá tan miyachica erelaquedeque. Aman tsan josanan, romano miyachi cale israelítalaca beconan culpa quino muquetue. 20 Junto nula israelítalaca quiran, cuenta quin, quebi jasa rocaiyoe. Aman puyaca junlaca Diosi mansoncarichunae tito mérayoe uyan israelítala cuwenta. Jun tenchisiri amana in cadenachi telarayoe tie.

21 Junni Pablo tsantinunsi, Rómabi chumin israelítalari yabe itsanlatie:

—Israelítalachi tobi nechi nuca paito pila eretulajoe. Junsi junbi nechi jamin israelítalanan nuca seitonque patulajoe latie. 22 Aman Jesucristo tinunbe penenaminlaca meracalayoe. Aman jerale tote nulaca seitonhe latie. Junni nu niyan tinunca meráno muquilaquee latie.

23 Israelítala tsantito, man mate Páblochica jachun trato quilaquee. Junni jun mate duque israelítala junchi jalaie. Yalabe Pablo man malon yalaca tucarichun cuenta quee. Diosi mantananun tsachi bolon niyan jono jonunca micarie. Aman Moisechi mantacanan, Diosichi mantate chuteca pilacanan cuenta quee. Tsanque Diosichi Pilaca duque micarie yape Jesús Diosichi Nao joeque quereilaisa. 24 Junni weyan weyanla tsa joe latie; weyan weyanlari nene joe tilatie. 25 Junto tsanque man tala man tala tenca canaminnan manjilaie. Junni yalari manjilaichinasanan, Páblori itsantie:

—Matu to Isaíachi fiquica mantenhilaide! tie. Diosichi Tenca yaca matu to israelítalabe tsarasica cuenta quisa carinue. 26 Diosi Isaíaca israelítalachica ereto, yalabe itsanque cuenta quisa carinue:

—Meralaquede! Diosichi sen fiquica israelita itonlacanan micarilaquinayoe tie Diosi jutsaca puyarimin joeque. Nula merátuminla josanan, yalari meralaquichunae tie.

29 Junni Pablo tsantinunsi, israelítala tala duque pacaanato manjilaie.

30 Junsi Pablo palu wata fecári Rómabi doratonan, tenca mánta ya arendaito chuminhe. Motiya yachica janari, seque facariminhe. 31 Yalabe cuenta quito Diosi mantananun tsachi bolonca pamin jominhe. Miya Jesucrístocanan cuenta quimin jominhe. Luratuto micarinaminhe; monantiya yaca deisa caritue.

<- Mantá Tanla 27