1 Junni Festo cobernadori itobi, peman mate Cesaréabi nechi Jerusalenca jinue. 2 Aman Festo janunsi, mantá tan patelelabe uyan israelita mantaminlabe Pábloca duque seiton joeque cuenta quilaquinue. 3 Féstobe duque rocailainue Pábloca Jerusalenca manheredeque. Junni Pablo janaminca nosale nechi toteno jominlanue. 4 Festo mantimini beco manpato, itsantinue:

—Eretiyoe tinue. Pablo Cesaréabi dorae. Lanan ina junchinan manjino joyoe tinue. 5 Junni nula tala miraminla labe pejintsan joe. Junni Pablo seiton quimin jonari, junte culpa quilaquina! tinue.

6 Junni Festo man tominco nasi fesile Jerusalenbi chutobi, Cesaréaca manjinue. Junsi ayuna nanchi mantanunte chudito, Pábloca tanjasa mantanue culpa jonunca meráchun. 7 Junni Pablo janunsi, Jerusalenbi nechi jamin israelítala yachi awinta wiruilaito yucacurato, culpa quichi tilatinue. Junni duque culpa quichi tinatonan, podeitulajonue. 8 Junni Pablo Féstobe manpato, itsantinue:

—Israelítalachi mantaca merátumin itoyoe tinue. Diosichi yacanan seiton suwatiyoe tinue. Románolachi miyachi contranan natiya quitiyoe tinue.

Pablo tsanque cuenta quinue. 9 Junni Festo mantimini israelítalachi amico ichun, Páblobe itsantinue:

—¿Nuri Jerusalenca jinoyun? tinue. ¿La junbi jera tuca miino nube se jochunan? tinue.

10 Junni Páblori jitiyoe tinue. Junsi itsantinue:

—Nuri inte románolachi mantá tala miichi tinae la culpa jonunca o itonunca. Tsanquiniquintsan joe tinue. Aman israelítalaca natiya seiton quitiyoe. Nuri junca seque mirae tinue. 11 Junni la totentsancari jutsa quica jonari, laca totesa cariniquede! tinue. Juntonan israelítalari laca nene patosiri epele culpa quichi latinae. Tsan jonari, monantiya laca yalachi cuwapono podeilaituchunae. Laca Jerusalenca eretuna! tinue. Románolachi fe mantá tan miyachica erede! tinue yape ya patsa merása culpa jonunca o itonunca.

12 Junni Pablo tsantinunsi, Festo uyan mantaminlabe tenpato, Páblobe itsantinue:

—Nuri romano siudadano pejoto, ¿Chiquilachi fe mantá tan miyachica jino muquee tico? Se joe. Junchi jichunae tinue.

13 Junni weyan ma polenunbi, Agripa tinun miyari Cesarea puebloca jinue. Agrípabe yachi sona Berenícebe Féstoca quirabi jilainue. 14 Junto duque ma junte rasanan, Féstori Agrípabe Pábloca jera cuenta quinue. Itsantinue:

—La cobernadori caitusanan, Féliri israelita mancaca doca jominue Pablo mumunca. Junto cobernadori jomin jeraito, ya doraminca purato manjinue. 15 Junni la Jerusalenca jito rasa, israelítala in doraminca duque seitonque cuenta quito culpa quichi latie tinue. Mantá tan patelelabe mantá tan unicalabe duque rocailaie yape Pábloca totesa.

16 Junni lari itsantiyoe tinue: Te, románola tsanquituminlayoe tiyoe tinue. Románolachi mite casale nulabe Páblobeca cale cale wirucarintsan joe yape Pablo beconan pasa. Cale cale wirucaritobi, aman toteno jotori wari totesa carintsan jochunae tiyoe tinue. 17 Junni israelítala inte layainunbi, lari wanhitiyoe. Ayuna nanchi mantanunte chudito, Pábloca jasa mantayoe. 18 Junni israelítala yaca tsaracari seiton quinunca culpa quilaquichunae tenjaca jominhe. Tsan josanan seiton quinunca culpa quitulajoe tinue. 19 Yalachi mi talasiri culpa quilaquee tinue. Aman puyan oco tsachica cuenta quilaquee Jesús tinunca. Ya Jesús puyaca josanan, aman Pablo yaca puyaca itoe timin joe tinue. Mansonhica joe timin joe tinue. Yacasiri culpa quilaquee tinue.

20 Junni niyaque culpa quilaquinanunca seque miino podeituto, Pábloberi itsantiyoe: ¿Nuri Jerusalenca jinoyun? tiyoe nuca culpa jonunca junbi meráchun. 21 Aman Páblori Jerusalenca jituchique, románolachi fe mantá tan miyachica erede! tie yanan la culpa tanunca miisa. Aman tsantinunbi lari yaca mandosa mantayoe fe mantá tan miyachica ereno fecári.

22 Junni Festo tsanque jera cuenta quinunbi, Agripa itsantinue:

—Lachinan jun doraminca meráno muquee tinue.

Junni Féstori ayuna yaca meráchunae tinue. 23 Junni ayuna nanchi Agrípabe Berenícebe mantaminla joto duque urara seito jalainue. Jun pueblobi mantaminlabe, soldado mantaminlabenan meránun tamochi pewilainue pemeráchun. Junni Festo mantanue Pábloca jasa carilaquisa. 24 Junni Pábloca tanjanunsi, Festo itsantinue:

—Miya Agripa, nuri inca quirade! tinue. Uyan pejaminla, nulanan inca pequiralaquede! tinue. Jerale israelítala in tsachica totesa latinae tinue. Jerusalénbinan, junsi intenan labe duque rocailainae yape yaca totesa. 25-27 Aman tsan josanan, Pablo labe rocaie tinue fe mantá tan miyachica eredeque. Junni ereyanae tiyoe yape ya miya Pablo culpa tanunca miisa. Aman doraminca miyachica erenato, ti niyaque seiton jonunca pila quito peerentsan joe. Ya pilaca peeretunari, epelenan erenaca jun patichunae tinue. Junni la Pábloca erenatori, ¿niyaque pila quino joinhin? ti culpa tanunca miitotori. Yaca numa nasi miito, duque seiton quitumin joeque miicayoe tinue. Totentsancari jutsa quitumin joe. Junto tuino capodeitiyoe miyachi tenchi niyaque pila quito peereno jonunca. Jun tenchi nulachi cale Pábloca tanjayoe tinue yape nulanan yabe panhalaquisa. Miya Agripa, nu panhato miide! Junni Pablo manpánaminca meráto, la sele miino podeiichunae tinue niyaque pila quintsan jonunca.

<- Mantá Tanla 24Mantá Tanla 26 ->