1 Junni Pablo israelita mantaminlaca tenca cato quirato, itsantinue:

—Israelítala, lari na mánta Diosibe seque nenamanyoe tinue luratuchun.

2 Junni Pablo tsantinaminca, Ananías tinun mantá tan pateleri yaca painue. Junni quelole raminlaca mantanue Pábloca fiqui forole tedechi quedeque. 3 Junni Páblori patelebe beconan pato itsantinue:

—Diosi nucanan quichunae tinue. Nuri Diosichi mantate laca miichi tinae culpa tanunca. Tsan jotonan, nunan Diosichi mantaca merátuto laca quede! tie tinue. Tsanquinato, nu fiban pintaquica serica cuwenta joe. Urachi uraran jotonan, tenperi seiton joe tinue.

4 Junni Pablo tsantinunsi, junte raminla itsantilatinue:

—¿Niyaito Diosichi pateleca yucacurayun? latinue. Mantá tan patele joe latinue.

5 Junni Páblori itsantinue:

—Tsa tie tinue. Diosichi Pilabi mantaca joe tinue israelita mantaminlaca yucacuratusa. Junni lari miitomanyoe tinue mantá tan patele jonunca.

6 Junni mantaminlari weyan weyanlari saduséola jominlanue man tala Diosica tenca caminla. Aman weyan weyanlari fariséola jominlanue uyan tala Diosica tenca caminla. Junni Páblori junca mantenhito, sonba pato itsantinue:

—Israelítala, la fariseo joyoe tinue. Lachi apalanan fariséola jominlanue. La fariseo joto, puyaca junlaca mansonhilaichunae timin joyoe tinue. Tsantinun tenchisiri nulari laca amana culpa quilaquinae tinue.

7 Aman Pablo tsantinunsi, fariséolabe saduséolabe beco beco pacaalaquinue. Mantaminla tala pataato pacaalaquinue. 8 Aman jerale fariséola itsantiminla joe: Anjelilanan, ocolanan jolajoe timinla joe. Puyaca junlanan mansonhilaichunae timinla joe. Aman saduséola mantimini junca epe pato tsanlatinae timinla joe. Jun tenchi saduséolabe fariséolabe pacaalaquinaminue. 9 Junni firara tinato, fariséola weyan weyanla wiruilainue mantaca micariminla. Yala wiruito, itsanlatinue:

—Páblori culpa itoe latinue. Pansile anjeli yabe paca jonari, o sen espíritu yabe paca jonari, junni culpa iton patichunae latinue. Tsan jonari, Pábloca casticaquilaquitori, Diosibe pa tala patilaiyanae latinue.

10 Junni duque sonba pacaanasanan, coroneli jele tinue Pábloca jera pisulelaquichunaeque. Junto soldadolaca mantanue yape Pábloca josoleto cuartelica mantanjisa. 11 Junni jun quepen Miya Jesucristo Páblobe quirainue. Yachite wiruito, itsantinue:

—Sonba tenca cade! tinue. Nuri Jerusalenbi lachi tenchi panun cuwenta, Roma pueblobinan lachi tenchi pano jochunae tinue.

12-13 Junni ayuna nanchi quepente junpalu chunca fécari israelítala yala tala trato quilaquinue. Pábloca totelaquechinayoe tilatinue. Ano fitun, pi cuchitun, joto nenalaranae tilatinue Pábloca toteno fecári. Juraquito, tsarasica pánayoe tilatinue. 14 Junsi mantá tan israelítalachica jilainue. Patelelanan, mantá tan unicalanan junte raminlanue. Junni trato quiminlari itsantilatinue:

—Chiquilari tsarasica pato, juraquito, trato quilaquiyoe tilatinue. Pábloca toteno fecári anoca man pititiya fitulajoanae latinue. 15 Junni nulabe uyan mantaminlabe chiquilaca ayudailaide! yaca totechun. Coronelibe rocailaide! latinue yari ayuna Pábloca inchi eresa. Nanni fe tuca miino muquee tilatina! latinue. Junni chiquilari inchi janaminca totechun meralaranae tilatinue.

16 Junca Páblochi soquichi nao meránue Pábloca totechi latinunca. Yaca merasi, Páblobe jera cuenta manpolaribi cuartelica jinue. 17 Junni Pablo jun fiquica meráto, capitanca jasa tito, in mosoca coronelichica tanjide! tinue. Yabe ticatiya pano joe tinue. 18 Junni capitan ya mosoca coronelichica tanjinue. Doramin Pablo labe rocaie tinue yape in mosoca nuchica tanjasa. Nuchi fiqui tanjae tinue. 19 Junni coroneliri yaca tedele cato, chicanle tanjito, nosale itsantinue:

—¿Labe niyan tino muquin? tinue.

20 Junni Páblochi sobrino itsantinue:

—Israelítala tala tenpato, nube rocailaichunae tinue. Ayuna Pábloca yalachica tanjanaque rocailaichunae tinue yaca nanni fe tuca miichun. 21 Junni yala panunca tina merátuna! tinue. Junpalu chunca fécari israelítala Pábloca totechun meralarae tinue. Yalari tsarasica pato, juraquito, trato quilaquinue Pábloca totechun. Yaca toteno fecári ano fitun, ni pi cuchitun, nenanola joyoe latinue. Aman israelítala tsaina meralarae tinue yape nu Pábloca ereyanae tisa.

22 Junni coroneli jun mosoca jera meráto manherenato, itsantinue:

—Mobenantiya patuna! tinue labe tsantiyoeque.

23 Junsi coroneli paluca capitanlaca jasa carito, itsantinue:

—Soldadolaca seisa carilaquede! tinue. Nula Cesarea puebloca jilaichunae. Palu patsa espadachi quicaamin soldadolabe, siete chunca calubi chudimin soldadolabe, palu patsa lansachi quicaamin soldadolabeca tanjinola joe tinue. Nuebe de la nochete jilaina! tinue. 24 Aman Páblochi tenchinan calu manca sede! tinue yape yanan pechudito jisa. Junto Pábloca Félix tinun cobernadorichi fecári seque tanjino podeilaichunae tinue.

25 Junto coroneli tsantisi, pila quinue. Capitanlabe peerechun, itsanque pila quinue:

26 Mantamin Félix cobernadori, la Claudio Lisias nuchi saludo erenayoe. 27 In pilaca erenato, doramin tsachi Pablo mumunca peerenayoe. Israelítala yaca sonba inato cato, totechinaminlanue. Junnasa Páblocari romano siudadano joeque miiyoe. Junto soldadolabe jito yaca josoleyoe yape totelaquitusa. 28 Yaca josoleto, miino munaramanyoe ti quichun yaca totechi latinanunca. Junca miichun Pábloca israelita mantaminlachica tanjiyoe. 29 Junni yalachi mantá chutecabe culpa quinaminlanue. Tsanlaquinanan, yaca natiya toteno itominue. Dononan itominue. Aman Pábloca tsanque miiyoe. 30 Junnasa tsachi manca labe cuenta quee israelítalari Pábloca nosa totechi latinaeque. Aman junca miisi, yaca nuchica wewe erenayoe. Junni yaca culpa quiminlaca nuchica jisa mantaquechinayoe Pablo niyaque culpa tanunca manpabi. Tsanqueri pano joyoe.

31 Junni coroneli tsanque pila quinunsi, soldadolari yachi mantate jilainue. Jun quepente Pábloca Antípatris pueblo fecári tanjilainue. 32 Junsi ayuna nanchiri caluchi jimin soldadolasiri Pábloca catanjilainue. Weyanlari cuartelica manjalainue. 33 Junni Cesarea pueblobi féto, Pábloca cobernadorichi cuwapolaquinue pilabele. 34 Junni cobernadoriri ya pilaca quirato, Páblobe panhanue ti tobi nechi jayunque. Junni Cilíciabi nechi janueque miito, 35 itsantinue:

—Nuca culpa quiminla jalainunbi nucanan meránae tinue.

Jun fecári Pábloca miya Heródechi wa yabi dosa mantanue.

<- Mantá Tanla 22Mantá Tanla 24 ->