2
Diosichi Tenca patanunca
1 Junni aman Pentecostés fiesta ma fanan, Jesube penenaminla jeralela layaito man tencari cato chuminlanue.
2 Jun quiranari jamochi nechi sonban wu quinasa tsanni mera jominue. Jun yabi jeralete mera jominue.
3 Junni jun quiranari nin lolonca tsanni patanue. Junsi ya nin lolonca tsan jera arajito, tsachilachi butuchi jera chudinue mancachibi mancachibi.
4 Tsanhinasa Diosichi Tenca patsa yalachica patato, jeralelachibi wito jera mantanue. Junsi Diosichi Tenca yalaca merátunun fiquichi jera cuenta quisa carinue.
5 Aman junni jun fiesta mate Jerusalenbi duque israelítala jato nenaminlanue. Diosica tenca camin israelítala junte penenaminlanue piyanle tobi nechi jato. 6 Junni yalari uyan fiquichi uyan fiquichi pánanunca meráto, quirachun layailainue. Layaito quiranari, jeralela tencachique fiquichi pánaminca meranilaquinue. 7 Junni ¿Ti jonhoncan? tito wepananato itsanlatinue:
—¿Inte cuenta quiminla jeralela Galilea to israelítala jolajotuncan? latinue.
8 Tsanla jotori, ¿niyaito chiquilachi to fiquichi palaquinan? tilatinue.
9 Partia tobi chuminla Partia to fiquica meralaquinayoe latinue. Media tobi chuminlari Media to fiquica meralaquinayoe latinue. Jun tsanquenan Elam tobi chuminla, Mesopotamia tobi chuminla, Judea tobi chuminla, Capadocia tobi, Ponto tobi, Asia tobi, 10 Frigia tobi, Panfilia tobi, Egipto tobi, Cirene quelote Africa tobi chuminla jeralela yalachi fiquichi pánaminca meralaquinayoe latinue. Junsi uyanlari Roma pueblobi nechinan jaca jolajoe latinue weyanlari tsa israelítala, weyanla israelítalabe peito Diosica tenca pecaminla. 11 Junsi Creta tobi nechinan, Arabia tobi nechinan jaca jolajoe latinue. Junni jerale bare tobi nechi jaminlatiya Jesucrístochi mantá tanla pánaminlaca meráto wepanalainue. Diosi jera seque quica jonunca chiquila jerale tolachi fiquichi polarilaquinae tilatinue.
12 Jeralela junca niyaquenantiya tenca cano podeituto, duque wepanalainue. Niyaito tsanque palaquin quinanque beco beco panhalaquinue. 13 Aman weyanla mantimini cacarito, winanni jolajoe tilatinue.
Pedro itsanque micarinunca
14 Junni chunca paluca Jesucrístochi mantá tanla wiruilaito, Pédrori sonba pato, layaica jun tsachilabe itsantinue:
—Judea tobi chuminla, jerale Jerusalenca jaca junla, nulabe cuenta quino muquee. Niya josatiya la pánaminca seque meralaquede! tinue. 15 Weyanlari chiquilaca winan jolajoe tilatinae. Te, natiya winan itolajoyoe. Quepenanan cajoe. Nuebe tsansiri joe. Monantiya in órate winan caitulajochunae. 16 Inni Diosichi cosa joe. Joel matu tote Diosichi mantate pamin joto, itsan ichunaeque pato, itsanque pila chutenue tinue:
17 To yucapiyarino ma quelo inasa, Diosi yachi Tencaca jeralelachica ereyanae tieque chuteca joe.
Nulachi naolabe namalabe Diosichi mantate cuenta quilaquichunae.
Diosi nalan nalan unilalachi quirajasa carichunae.
Unicalachi quipi quirasa carichunaeque chuteca joe.
18 Diosibe mantaiminlachica yachi Tencaca ereyanae tie unilalachibinan, sonalachibinan.
Yalanan Diosichi mantate cuenta quilaquichunaeque chuteca joe.
19 Yoquidobi duque ticatiya quirawoanae tie wepanarichun.
Tobinan ticatiya quirawoanae tieque chuteca joe asanca, ninca, nin poyoca, yape tsachila junca quirato tenca calaquisa.
20 Yo neme ichunae. Penan asan cuwenta luban ichunaeque chuteca joe.
Jun tsanhichunaeque chuteca joe Miya Diosi to yucapiyarino ma quelo inasa.
Seque wepanato quirantsan sen ma jochunae.
21 Juntonan Miyabe rocaiminlaca se lariyanae tieque chuteca joe.
22 Junni Pedro Diosichi Pilabi chutecaca tsanque manpasi, ya tsachilabe itsantinue:
—Israelita tsachila, la pánaminca meralaquede! tinue. Jesús Nasareno Diosi wenteca jun tsachi jominhe tinue. Yape nulari junca tenhilaisa, Jesús duque wepanato quirantsancari seque quimin jominhe. Diosichi mantate jera tsanquinaminhe tinue nula nenanunte. Nulanan yaca miralaranae. 23 Tsan josanan, nulari Jesuca totesa carinilaquinue tinue. Nulari Jesuca cato cuwapolaquinue tinue yape seiton tsachila yaca corosibi totelaquisa. Junnasa mantimini Diosiri junca natiya wepanatunue. Matulenan Diosi miraminue Jesuca totenola joeque. Diosi paca jominue tsanhiniino joeque. 24 Junni yari tsanle puyaca tsono itonan, Diosi ya puyaca jominca mansoncarinue tinue. 25 Aman matu to David Diosichi Pilaca chutenato, Jesuchi tenchi pato itsantinue tinue:
Miya Diosi numasitiya labe pejochunaeque mirayoe tie tinue.
Lachi tsa tede nanchi rato ayudainanan, peleituanae tie tinue.
26 Junni lachi tencabi pansi joto, duque son tito cuenta quimin joyoe tie tinue.
La puyano jotonan, wepanatiyoe; mansonhino joyoeque mirato, wepanatuto meranirayoe tie tinue.
27 Diosi, nuri lachi tencaca puyan ocolachibi natiya puratuchunae tie tinue.
Laca, nuchi sen tsachi jonan, nu petesa carituchunae tie tinue.
28 Sonnanun minuca lachi micuwachunae tie tinue.
Nu labe penenato, laca duque pansi josa carichunae tie tinue.
29 Junni David chuteca fiquica jera patobi, Pedro itsantinue:
—Amicola, Miya Davica tuca pantsan joe tinue. Yari matu mate puyato menaito, ¿natiya camansonhituco? tinue. Amananantiya ya menaranun postoca quirantsan rae. 30-31 Tsan josanan, Diosi miya Davibe tsarasica juraquito pato, itsantinue tinue: Davichi alica mancaca miya suwanae tinue Davica cuwenta. Junni Davichi alicari puyato mansonhino jominue tinue. David Diosichi mantate pamin joto, yaca miramin jominue tinue. Junto Daviri puyan ocolachibi puraino itoyoe tito, tencachiquenan patue; Cristo tinun alicachi tenchiri pánaminue tinue. Junni jun tsanquenan patinue; Diosi Cristo tinunca puyan ocolachibi puratunue tinue. Yaca petesa caritunue tinue. 32 Diosi ya Jesuca mansonhisa carinue tinue puyaca jominca. Chiquilanan jeralela yaca manson nenaminca manquirato, jera cuenta polarilaquinayoe tinue. 33-35 Aman David man postote itsanque pila chutenue tinue:
Miya Diosi lachi Miyaca jamochi losa tichunae tinue yape yachi tsa tede nanchi pechusa.
Junte chude! tichunae tinue nube pa jominlaca fe losa carino fecári.
Junni Pedro David chuteca fiquica tsanque pato, tsachilabe itsantinue:
—Junni ya jamochi lomin tsachiri David itominue; Jesús jominue tinue. Diosi Jesuca mansoncarito, jamochi chutenue tinue. Yachi tsa tede nanchi chutenue yape yabe pemantasa. Junni Jesús junte chusanan, Diosi yachi mantaca cuwanue tinue yape Diosichi Tencaca chiquilachibi eresa. Junni amana ticatiya pánanunca jera wepanato meráto, ticatiya quinanunca jera wepanato quirato, nulari itsanque tenca calaquede! tinue: Tenca mánta tsanlaquitue; Diosichi Tencari tsansa carinaeque tenca cantsan joe tinue. Diosi matu mate cuenta quica jominue tinue tsanhino joeque. 36 Tsan josanan, nula israelítalari ya Jesuca corosibi totesa carilaquinue tinue. Tsanni nula Jesuca totesa carica josa, Diosi yaca wenteto miya suwanue tinue. Yaca wenteto Cristo tinun suwanue tinue. Nula jeralela junca meralaquede! Tsarasica pánayoe; nene pátiyoe tinue.
Pedro tsanque cuenta polarinue. 37 Junni tsantinunca meráto, israelítalari tencabi duque wepanalainue jutsa quiminlayoeque. Junni Pédrobenan weyan Crístochi mantá tanlabenan itsanque panhalaquinue:
—Acola, palaquede! tilatinue. ¿Ti quinola jowan? tilatinue.
38 Junni Pédrori yalabenan itsantinue:
—Nula jeralela jutsa quinunca telaquepoto, casan tala tenca mancato, mumunhilaide! tinue Jesucrístochi icayoe tito. Junni Diosi nulachi jutsaca piyarito, yachi Tencaca nulachibi wisa carichunae tinue. Epe cuwanique cuwenta, yachi Tencaca nulachibi wisa carichunae.
39 Chiquilachi Miya Diosi jutsaca piyariyanae tito, nulachi tenchinan tsantinue tinue. Duque tsachilaca yabe cayaisa tinae tinue nulacanan, nulachi nalalacanan, barebi chuminlacanan. Jerale cayaisa tica jun tsachilachi jutsaca piyarino joe tinue.
40 Junni Pedro yalabe duque fiqui polarito, yalaca payito itsantinue:
—Amana mate sonnamin tsachilachi tenca yucapiyaca jolajoe tinue. Junni nulari yalaca jera telato, se lolaide! tinue. Pedro tsanque payinue.
41 Junni Pedro pacaca quereiminlari mumunhilainue. Jun matenan peman mili tsachila tsansi Jesucrístochi tsachilabe peilainue. 42 Junni Jesucrístobe penenaminla duque ne layaimin jominlanue yape Crístochi mantá tanla yalaca micarilaquisa. Man junnique tenca cato nenaminlanue. Diosibe rocain, bibu pisulaito fin, quichun layaimin jominlanue.
Jesucrístobe penenaminla itsanque chuminla jonunca
43 Junni Crístochi mantá tanla duque wepanato quirantsancari seque quinaminlanue yape tsachila tenca cato miilaisa. Junnan jeralela jele tilatinue.
44 Junni jerale Jesube cayaica junla layaito, man junni tenca cato, jeralela man layanni taminlanue.
45 Toca, ticatiya tanunca osito, jerale munaraminlachi cuwamin jominlanue.
46 Diosichi yabi ma cura layaito, tsachilachi ya curanan bibu pisulaito fimin jominlanue. Duque son tito, sen tenca tato, beco beco ano fimiyamin jominlanue.
47 Diosica seque pamin jominlanue. Junni jerale tsachila Jesucrístobe penenaminlaca quirato, sen jolajoe timin jominlanue. Junni Miya Diosi ma cura uyan tsachilacanan se larinan, yalanan Diosichi tsachilabe pelayailainue.
<- Mantá Tanla 1Mantá Tanla 3 ->
