1 Junni Apolo Coríntobi chusanan, Pablo duse poleto Efeso puebloca jinue. Junsi Diosibe cayaiminlabe tulaito, 2 itsanque panhanue:

—¿Nulari Diosibe cayainan, yachi Tencaca nulachibi wisa carin? tinue.

Junni yalari itsantilatinue:

—Te, Diosichi Tencaca natiya camerátucala joyoe tilatinue.

3 Junni Páblonan itsantinue:

—Diosichi Tencaca cameracá itotori, ¿ti micarica fiquica meracá joto mumunhilaiyun? tinue.

Junni yalari Mumunmin Juanchi fiquica meráto mumunhilaiyoe latinue. 4 Junni Páblori yalabe itsantinue:

—Juanbe mumunhinato, ¿nulari jutsa quinunca telaquepoto, casan tala tenca mancayoe tito mumunhilainuco? tinue. Juan mantimini nulaca mumunnato, man fiquicanan nulaca micarinue. Juanchi benechi jano jominbe cayailaina! tie tinue. Aman Juan tsantinato, Jesucristo tinunca tsantinaminue tinue.

5 Junni ya tsachila Páblochi fiquica meráto, Miya Jesuchi iyoe tito manan manmumunhilainue. 6 Junni Pablo yalaca tedechi tale quinan, Diosichi Tenca yalachibi patanue. Diosichi Tenca patato, yalaca merátunun fiquichi pasa carinue. Junsi Diosichi mantate palaquinue. 7 Jerale nechi chunca paluca tsachila tsansi jominlanue.

8 Junni aman Pablo Diosichi fiqui miinun yabi wito, Diosi mantananun tsachi bolon niyan ino jonunca jera micarinue. Luratuto, sele tuca pánaminue. Junni peman pe fecári tsanque micarinasa, 9 weyanlari paito merátuchi latinue. Quereituchi tito, junsi jeralelachi cale pato, Jesucrístoca duque seitonque palaquinue. Tsanlatinan, Pablo yalaca purato, Jesucrístochi tsachilabe chicanle lonue. Tiranno mumunchi escuela tamochi wito, junbi Diosichi fiquica ma cura micarinaminue. 10 Palu wata fecári junbi micarinaminue. Junni jerale Asia tobi chuminla, israelítalabenan israelita itonlabenan, Miya Jesucrístoca paca fiquica meralaquinue. 11 Junni Diosi Pábloca uyan quiraqueman wepanato quirantsancari seque quisa carinue. 12 Tsachila Pablo talanun tsanpaca cato, quiyanpunlachica tanjilainue. Junni jun panube quiyanpunla manseilainue. Junsi yucanchi ocolanan jun panube tsachilachibi nechi manloto sujilainue.

13 Junni tsan josanan uyan israelítalanan manca manca yucanchi ococa mansularide nenaminlanue. Junni weyanlari Jesucrístochi tsachila itotonan, Jesucrístochi mantate yucanchi ocolaca mansularichique tenfenaminlanue. Yucanchi ocobe itsantimin jominlanue: Pablo panun Jesuchi mantate nuca mantanayoe timin jominlanue.

14 Junni sieteca acola tsantin nenaminlanue. Esceva mumun mantá tan patelechi naola jominlanue. Junni yalari yucanchi oco mancaca suerechi latinasanan, 15 yucanchi ocori beco pato itsantinue:

—Jesuca quiramanyoe tinue. Páblocanan mirayoe. Nulaberi mantaitiyoe tinue.

16 Tsantisi, yucanchi oco wica jun tsachi yalaca cawiyale tito quiniquinue. Junsi yalaca fe lonan, tamochi nechi fupuca mansujilainue fudachi. 17 Junni piyanle Efésobi chuminla junca meralaquinue israelítalabenan, israelita itonlabenan. Junto jele tito, Miya Jesucrístoca tsara seque cuenta quinaminlanue.

18 Junsi Efésobi duque Jesucrístobe cayaica jun tsachila ti seiton quiminla jototiya jera cuenta quito, tsanque seiton quimin jominlayoe tilatinue. 19 Aman weyanlari duque majia pila tamin jominlanue. Junto jun pilaca tanjato, jera nin polaquinue jerale tsachila quiralaquinasanan. Nisi mica jonuncari minari, mante chunca mili duque mica cala piti tsansi jominue. 20 Junni ya pilaca nin polaquinunbi, nantanancari duque tsachila Miya Jesucrístoca paca fiquica meralaquinue.

21-22 Jera tsanquinunbi, Pablo Jerusalenca jino tenhinue. Junni casale paluca peayudaiminlaca Macedonia to fecári yachi caquenan erenue Timotéobe Erástobeca. Aman Páblori Asia tobi nasi cachutobi, yanan Macedóniaca jino jominue. Junni Macedóniase polede, junsi Acaya tose polede jito, Jerusalenca jiyanae tinue. Aman junchi jitobi, Roma pueblocanan jino joyoe tinue.

23 Aman Pablo Asia tobi nechi calotuminnan, Efésobi canenasanan, duque firara tilatinue. Efésolari Jesucrístobe penenatuchique duque paito firara tilatinue. 24 Itsanque jominue: Jun pueblobi weyanla calaca yanan quiran nacá quimin jominlanue. Jun yanan quiran calaca quito, Diana tinun diosichi ya joe tito osimin jominlanue. Junni calaca yanan quiran nacá quimin manca Demetrio tinun jominue. Yari jun necosioca duque serawomin jominue. 25-27 Junni Demétriori weyanla Diánachi yanan quiran quiminlaca jera layaisa carito, weyan calaca quiminlacanan jera layaisa carito, yalabe itsantinue:

—Amicola, jerale Asia tobi chuminla Diana tinun diosica tennamin jolajoyoe tinue. Piyanle tobinan Diánaca tennaminla joe tinue. Aman nula tsara miralarae chiquila Diánachi ya nacaca ositosiri duque cala calaquinayoeque. Tsan josanan case jerale Asia tobi Pablo chiquilaca seiton quinae tinue. Pablo chiquilaca seitonque pato, Tedechi quica diosiri tsa diosi itoe timinhe tinue. Pablo tsantinato, duque tsachilaca uyan tala jera tenca casa carimin joe tinue yape Diánaca telaquepolaquisa. Aman tsachilari Diánaca tennatulajonari, chiquilari duque perdeicaichunae tinue. Junsi pansile tsachilari Diánachi wa iclesia yacanan epele telaquepolaquichunae tinue. O Diana patsacanan telaquepolaquichunae tinue. Telaqueponari, nantanancari seitochunae tinue.

28 Demetrio tsantinanunca meráto, calaca quiminlari duque paito, biba Diana tilatinue. Yasiri Efésobi chuminlachi diosi joe tilatinue. Tsanque sonba pato, 29 jerale Efésobi duque firara tinaminlanue. Junto Páblochi amicola palucaca cato, layainun yabi muricade tanjilainue. Ya amicolari Gáyobe Aristárcobe mumun jominlanue. Páblobe Macedóniabi nechi pejaca jominlanue. 30 Junni Páblonan layainun yabi wichi tinasanan, Jesucrístobe penenaminla yaca wisa carilaquitunue yape totelaquitusa. 31 Asia tobi mantá tanlanan Páblochi amicola joto fiqui ereto, layainun yabi tina wituna! tilatinue.

32 Tsan josanan, layainun yabi weyan weyanla man tala otilatinue; weyan weyanlari uyan tala otilatinue. Firara tinatonan fécari tsachila niyaito layaicala jonunca miitominlanue. 33 Junni israelítala Alejándroca cato, layainun yabi wisa carito, tsachilachi cale wirucarilaquinue yape yalabe pasa. Junni Alejándrori tedechi nosasa ilaide quinue isa pachun. 34 Tsanquinasanan layaiminlari Alejándroca quirato, israelita joeque tenhilainue. Junca tenhito yaca natiya merátuchi latinue. Case palu óra fecári sonba pato, biba Diana tinaminlanue. Diánasiri Efésobi chuminlachi diosi joe tinaminlanue. 35 Junnasa Efeso pueblo secretarionan pato, yari jeralelaca nosasa isa carino podeinue. Junni yari itsantinue:

—Efésobi chuminla, laca meralaquede! tinue. Diana tsara sen joe tinue. Efésobi chuminla Diánachi wa iclesia yaca cuidaimin jolajoyoe. Jamochi nechi pataca Diánanan quiran sucanan cuidaiminlayoe. Jeralela yaca miralarae tinue. 36 Ya fiquica nene joe tino natiya podeilaituchunae tinue. Junni nula deinilaide! tinue. Tenca iton tala quilaquituna! 37 In israelítalari Diánaca seitonque paminla itolajoe tinue. Diánachi yacanan tarintuminlae. Tsan josanan, nulari yalaca epe inchi tanjalaie tinue. 38 Aman Páblola Demétrioca seiton quica jonari, o Diánachi ya quiminlaca seiton quica jonari, comisariochica jito cuenta quintsan joe. Culpa quicaano muquinari, junbi quintsan joe tinue. ¿Jun tenchi comisariola jotuncan? tinue. 39 Junni nulachiri fécari cuenta caquino muquilaquinari, tsa layaino mate cuenta quintsan joe. 40 Aman epenan firara tilatinayoe. Wari miya chiquilabe manpanhato ¿Ti quichun layailaiyun? tinari, ¿niyan ticaichunan? Pansile chiquilacanan culpa quichunae tinue in firara tinun tenchi.

41 Secretario tsantitobi, layaica junlaca jera manherenue.

<- Mantá Tanla 18Mantá Tanla 20 ->