Crístochi mantá tanla itsanquilaquinunca

(Los Hechos)

Caque fiqui: Lucas in pila chutenue. Yaca fécari miichun Lucas Chuteca Jun Sen Fiqui tenchi pila chutecaca quirade! Lucas in pilacanan aco Teófilochi erechun quinue.

In pilabi Lucas cuenta polarinue Jesucristo jamochi manlonunbi yachi tsachila niyanhilainunca. Aman bersiculo 1:8-bi quirato miintsan joe in pila tica pamin jonunca. Jun bersiculobi Jesucristo yachi tsachilabe itsantinue: Laca cuenta polarinola joe. (1) Diosichi Tenca nulachica patatobi, nulaca duque sonba tenca suwachunae tinue. Jerale tote laca cuenta polaride nenalarana! tinue. (2) Jerusalén pueblobi, in Judea tobinan, ja Samaria tobinan, (3) junsi fe nuwiri tobinan cuenta polaride nenalarana! tinue. Jun bersiculobe jera Mantá Tanla pilaca itsanque entendeino podeintsan joe:

(1) 1:1-2:13 Diosichi Tenca nulachica patanunbi ... (Jesucrístoca) cuenta polaride nenalarana! tinue. Aman 1:1-le nechi 2:13 fecári jerale Jesucrístochi tsachilaca pánae Jesucristo jamochi manlocale nechi Diosichi Tenca patano fecári.

(2) 2:14-12:25 Jerusalén pueblobinan, in Judea tobinan, ja Samaria tobinan ... (Jesucrístoca) cuenta polaride nenalarana! tinue. Capitulo 2:14-le nechi capitulo 12 fecári Jerusalenbi, junsi Judéabi, junsi Samáriabi Diosichi fiquica micaride nenaminlaca chuteca joe. In capitulolabi Pédrocari fécari panun joe.

(3) 13:1-jeraicari: Fe nuwiri tobinan (Jesucrístoca) cuenta polaride nenalarana! tinue. Capitulo 13-le nechi duque bare tobi Diosichi fiquica micarinanunca chuteca joe. In capitulolabi Páblocari fécari panun joe.

In pilabi Lúcari Diosichi Tencaca duque pamin joe. Jun tenchi weyanlari in pilaca estudiaito, uyan mumun pono jonhoe timinla joe. Crístochi Mantá Tanla Itsanlaquinunca tituto, Diosichi Tenca Itsanquinuca tino se jonhoe timinla joe.

1-2 Amico Teófilo, in pilaca nuchi erechun quinayoe. Manqui pila numa quito nuchi erecayoe. Jun casale quica jun pilabi Jesuca in tote nenaminca chutecayoe. Diosichi toca manlono ma fecári ticatiya jera quito nenamin jonunca, ticatiya jera micarica jonunca, jera chutecayoe. Aman junni Jesús weyan tsachilaca wenteca jominue yape yachi mantá tanla josa. Jesús jamochi camanlotuminnan, yalaca Diosichi Tencachi sonbabe jera mantanue. 3 Junni Jesús puyato mansonhitobi, yalabe manquiraidede nenaminue. Duque ticatiya quinue yape tsa mansonhinueque tenhilaisa. Diosi mantananun tsachi bolon niyan jonola jonunca jera micarinaminue. Junni junpalu chunca ma fecári Jesús yalabe tsantin nenaminue.

4 Junto Jesús yalabe canenaminnan, itsanque mantanue:

—Nula Jerusalén pueblobi nechi lotuto cameralarana! tinue. Lachi Apa Diosi pato, nulachica ticato ereyanae ticae tinue. Lari nulabe junca numa jera cuenta polaricayoe tinue. 5 Aman Mumunmin Juanbe penenaminlari pibiri mumunhilainue. Nula mantimini nanni ina Diosichi Tencachi mumunhilaichunae tinue. Yachi Tencaca erechunae tinue yape nulachibi wisa. Junni yaca ereno fecári Jerusalenbi cameralarana! tinue.

Jesús yachi tsachilabe tsantinue.

6 Junni Jesube penenaminla palaque tenca cato, yabe itsanque panhalaquinue:

—Miya, ¿chiquilari israelítala jolajoyoco? ¿Aman nu numasi bare to románolachi mantaca manjosolechun? tilatinue yape chiquilachi tobi mantatulajosa. ¿Amana?

7 Jun fiquica meráto, Jesús beconan itsantinue:

—Apa Diosiri junca mirae tinue. Nulari junca camiituntsan jochunae tinue numasi tsanhino jonunca. Apa Diosiri pato, junca yasiri mantano joyoe ticae tinue. 8 Aman nula mantimini laca cuenta polarinola joe. Diosichi Tenca nulachica patatobi, nulaca duque sonba tenca suwachunae tinue. Junni jerale tote laca cuenta polaridede nenalarana! tinue. Jerusalén pueblobinan, in Judea tobinan, ja Samaria tobinan, fe nuwiri tobinan cuenta polaridede nenalarana! tinue.

9 Junni Jesús tsantinunsi, Diosiri yaca jamochi manlaricanue. Quiranasanan loniinue. Aman lonaminnan, lonaminnan, numa poyobi doinue. 10 Junni Jesuri jamochi doicabinan, yabe penenaminlari jamochi caquiranaminlanue. Junni yalari quirato wirurasa quiranari, paluca tsachila yalabe quirainilainue. Ya tsachilari tsaracari fibaquin camisa pun wirurato 11 itsantilatinue:

—Galilea tsachila, ¿ti quichun jamochi caquiralaquinayun? Ya Jesús nulachile nechi quirasa loto, Diosichi toca numa locae tinue. Junni aman tsanque loto, jun tsanquenan manpatachunae tinue.

Ya anjelila Jesube penenaminlabe tsanlatinue.

12 Junni Jesuchi tsachilari Olibo tinun dubi nechi manpatato, man quilon tsansica manjato, Jerusalén pueblobi manwilainue. 13 Junni aman Jerusalenbi manfato, yala chunun tamochinan manwilainue jamobi tamochi. Chunca manca Crístochi mantá tanla junte chuminlanue Pedro, Jacobo, Juan, Andrés, Felipe, Tomás, Bartolomé, Mateo, Jacobo, Simón Zelote, Judas. Aman manca Jacobo Alféochi nao jominue. Aman Judas Jacóbochi aco jominue. 14 Junni yala piyanlela jun parejo tenca cato, Diosibe rocaito chuminlanue. Sonalanan rocaichun pelayaimin jominlanue Jesuchi ayan Maríabe, Jesuchi acolabe.

15 Junni jun malate Jesucrístochi tsachila duque layaica jominlanue patsa palu chunca tsansi. Tsanque layaito chuminlabe, Pédrori quitsabi wiruito itsantinue:

16-17 —Acola, soquila, Judas Iscariote chiquilabe peayudaimin jominhe tinue. Chiquilabe peaconpanaimin jominhe. Tsan jominnan, ya Júdari Jesuca cuwaponue. Jesuca cachi timinlachi cuwaponue. Aman Diosichi Pilabi yaca chuteca jominue Jesuca tsanque osichunaeque. Matu to David Salmo pila quinasanan, Diosichi Tencari yaca pila chutesa carinue tinue. Itsanque jominue:

18 Aman Judas Iscariote Jesuca osito, cala canue. Junni jun seiton calachi to canue. Junni jun tobi palo tala darapatito, pecolo sipito pesili fofoduiniinue. 19 Junni Jerusalenbi chuminla jeralela junca meráto, ya toca “Asan To” tilatinue. (Aman israelítalachi fiquichi “asan to” tito “aséldama” tinun jominue.) 20 Aman Salmo pilabi itsanque chuteca joe:

Diosichi Pilabi tsanque chuteca josa, jun tsanquenan patinue. Judas Iscariótechi to epe inue.

Junni Pedro manpato itsantinue:

—Junsi Diosichi matu pilabi man fiquinan cajoe tinue Salmo tinun pilabi. Junbi Judas Iscarióteca itsanque chuteca joe tinue: Yachi mantaca josoleto, uyanchi mancuwano joeque chuteca joe tinue. 21-22 Junni tsanquenan tsachi mancaca mantá tan suwantsan joe tinue yape Júdachi mantaca mancasa. Mantá petano jun tsachi chiquilabe jera peaconpanaimin jomin jochunae tinue. Miya Jesús chiquilabe penenasanan yanan parejo penenamin jomin jochunae. Juan mumunnanunle nechi Jesús Diosichi toca manlono fecári chiquilabe parejo penenamin jomin tsachi jochunae tinue. Junni ya tsachi chiquilabe Jesuca cuenta pepolarimin jochunae tinue puyato mansonhinueque.

23 Junni Pedro tsantitobi, yala tenpato, paluca tsachilaca wentelaquinue mancacari mantá tan suwachun. Aman manca José Barsabás tinun jominue. Manca Matías jominue. Aman Joseca Justo tensaato mumun tinun jominue. 24-25 Junni junbi layaica junlari Diosibe rocaito itsantilatinue:

—Miya Diosi, nu jeralelachi tencaca miramin joe. ¿Junni in palucale nechi moca mantá tan suwantsan jun? tilatinue. Judas Iscariote jutsa quito, ya mantaca jera piyarinue ya jino jonun minu jichun. Junni Miya Diosi, nu chiquilachi micuwade! ¿Nu moca wentenayun? yape Crístochi mantá tan pejosa.

26 Junni Diosibe tsanque rocaitobi, palucachi mumunca pila chutelaquinue. Aman junca jera palacarito, manca mumunca larilaquinue mochi mumun lonunca miichun. Junni Matíachi mumun lonue. Junni Matíacanan Crístochi mantá tan pejoe tilatinue.

Mantá Tanla 2 ->