1 Incanan nu mirano joe. To yucapiyarino ma quelo inasa, Jesucrístobe penenano duque tenfe jochunae. 2 Tsachilari isapun, calaca munapun, fe joyoe timin, Diosica seitonque pamin, apalaca ayanlaca merátumin jolajochunae. Acradeseitumin, Diosica respetaitumin, 3 laquiratumin jolajochunae. Paimin, yucacuramin, lu piyayan jun jolajochunae. Seitonla joto, senlaca paimin jolajochunae. 4 Amicolabenan seiton jolajochunae. Tenca catuminnan ticatiya quiniquiminla jochunae. Duque mantá tan jochi timinla jochunae. Yalachi tenca munate pansi nenachi tito, Diosibe nenatuchi timinla jochunae. 5 Diosichi tsachila jolajoyoe tinatonan, Diosichi sonbabe seituchi timinla jochunae. Junni nu Timoteo, tsantiminlabe natiya nenatuntsan joe.

6 Tsantiminlari encanabe amico ito, seque micarimin joyoe tito, tsachilachi yabi wiminla joe. Yabi wito, tenca iton sonalaca encanaminla joe. Ya sonalari duque culpa tan joyoeque tenhinatonan, niya quiraquetiya seiton quiniquichi timinla joe. 7 Duque miichi tinatonan, Diosi tsarasi paca fiquica natiya tuino podeituminla joe.

8-9 Aman matu mate paluca seiton tsachilari Moisechi contra ilainue. Jánebe Jánbrebe mumun jominlanue. Junto ya seiton quinaminlaca jeralela quirato miilainue tenca itonla joeque. Junni amana mate micariminlanan ya paluca tsachila cuwenta jolajochunae. Moisechi contra iminla cuwenta, yalanan Diosi tsarasi paca fiquica contra ilaichunae. Tenca seiton joto, tsa quereituminla jochunae. Tsan jotonan, ya tsachilari polencari encanano podeilaituchunae. Yalacanan jeralela tuca tenhilaichunae tenca itonla joeque.

10 Nuri laca numa quirato miica joe la niyan tsachi jonunca. La micarica fiquica meraca joe. Diosichi tenchi nenamin joeque mirae. Diosica tennato, ticatiya wantaito, laquirato, peleituto, seque nenamin joeque nu mirae. 11 La seitonlabe duque padeseieque mirae. Antioquíabi, Icóniobi, Lístrabi laca duque padeseieque mirae. Junni la duque padeseinamincanan Miya Jesús laca manse larie. 12 Junni jerale Jesucrístobe seque penenano munapunlanan padeseino jocaichunae. 13 Tsan josanan, seitonlanan, encanaminlanan nantanancari seiton ide ide jinilaichunae. Yalari nene fiquica micaritonan, yalanan encanaito jun nene fiquica quereilaichunae.

14-15 Nu mantimini tsarasi fiquica miito seque quereie. Na mánta Diosichi Pilaca min joe. Jun pilabe Jesucrístobe cayaito, se lono jonunca miinomanhe. Junni nuca jun fiquica micariminlari seque nenaminla jonunca mantenhide! Junca tenhito, jun fiquica meráto nenana! 16 Jerale Diosichi Pilaca Diosi chutesa carica pila joe. Ya pilari sen joe. Micarino, payino, mantucarino sen joe. Jun pila sen tenca ino miinun pila joe. 17 Diosichi tsachilari ya pilaca miitori, ti sencatiya jera quino podeicaichunae.

<- Benete Timotéochi 2Benete Timotéochi 4 ->