1 Junni nula tenchi nantari laquiino muquetuca jominhe. Junni chiquilari nulachica jino podeituto, Atenas pueblobi puraito, 2 aco Timotéoca ereca jominlayoe. Yari Crístoca paca sen fiquica micarimin joto, Diosibe seque mantaimin joe. Nulaca sonba tenca suwasa yaca ereca jominlayoe yape nula fe quereilaisa. Yari nulaca payibi jica jominhe 3 yape nula padeseinatonan, monantiya Jesuca quereino peleilaitusa. Nulari miralarae padeseinola joyoeque. 4 Nulabe cachuminnan palaquiyoe jera Jesucrístobe penenaminla padeseinola joyoeque. Chiquila tsanque paca josanan, jun tsanquenan patilaiyoeque miralaranae. 5 Tsan josanan yucan seiton quisa carichique tenfemin joe. Junni la wepanato tenca canamanyoe pansile ya nulaca peleisa carinueque. Tsanque peleica jomanpari, chiquila nulaca epenan micarica jono jominla joinhie. Junni nulaca miituto wepanato, Timotéoca ereyoe yape nulaca niyaque quereiminla jonunca manmiibi jisa.

6 Junni amanari pansi manjoyoe. Timoteo chiquilachica manjato cuenta quee. Nula Diosica duque tennato, nula tala laquiracaalaquito, seque chularae tie. Chiquilacanan laquirato mantenhiminla joe tie. Chiquila manquirachi tica cuwentanan, nulanan chiquilaca manquirachi latinae tie. 7 Junni chiquilari duque padeseinatonan, jun fiquica merasi son tilatiyoe. Nula duque seque quereilainaeque meráto, chiquila duque pansi jolajoyoe. 8 Nula Miya Jesube seque nenanari, chiquilari chiquilachi tencabi son timinlayoe. 9 Nulachi tenchi Diosibe duque acradeseinola joyoe. Nulachi tenchi Diosichi cale duque son tilatinayoe. Juncanan Diosibe tsanquenan duque acradeseinola joyoe. 10 Quepen, malon, Diosibe duque rocaiminla joyoe nulaca cale quirachun. Nula caquereitununca quereisa carino muquilaquee.

11 Chiquilachi Apa Diosibe, junsi chiquilachi Miya Jesúbenan chiquilaca ayudaideque rocailainayoe nulachica jichun. 12 Chiquilari nulaca duque laquiralarayoe. Junto Miya Diosibe rocailainayoe yape nula talanan jun tsanquenan fécari laquiracaalaquisa. Nula talanan fécari laquiracaato, piyanlelacanan jun tsanquenan laquiralarasa tenjae. 13 Chiquilachi Miya Jesús manpatano mate yabe yachi jerale sen tsachilabe parejo manpatalaichunae. Junni chiquilachi Apa Diosibe rocailainayoe yape nulanan jun mate yachi cale tsara sen jolajosa. Sonban tenca suwasa rocailainayoe yape sen jolajosa, monantiya nulaca culpa quitusa.