ISANQUENARE IROCASHI 23

Yaanaqueri Jesoshi anta Piratoqui, icantapaaqueri: “Ainiro yantane yoca namaquerica”.

(Mt. 27.1-14; Mr. 15.1-5; Joa 18.28-38)

1 Ari ijajeitanaque, yaajeitanaqueri Jesoshi anta Piratoqui. Oromasati ini iriori, ipincatsariventajeitiri joriopee. 2 Icantapaaqueri:

—Ainiro yantanirotaqueri yoca. Yamatavijeitaqueri noshanincapee, icantajeivetacari: “Eiro pipiritsi pincatsari piirequite”. Aisati icantapiniti: “Narotaque Quirishito, pimpincatsajeitena nainti”.

3 Ari isampitiri Pirato:

—¿Queariompa? ¿Avirompa ivicatsarite jorio?

Yacanaqueri:

—Je, narotaque.

4 Impoiji yora Pirato icantajeitavaqueri:

—Te aneroji irantane yoca.

5 Aiquero icantajeiti:

—Iquisacaajeitacari atiripee, icantajeitaqueri atiri: “Tsame ajocajeri avincatsarite”. Intanacaro anta Carireaqui, meeca iquenaquenayeti aca Joreaqui, yamatavijeitaqueri maaroni.

Yaanaqueri Jesoshi anta Eroreshiqui.

6 Iquemantacarori Pirato icantajeitaqueriri, isampitaqueri:

—¿Iriompa carireasati yoca?

7 Yacanaqueri:

—Je, iriotaque.

Icantiri:

—Ari, paanajeri anta Eroreshiqui. Iriotaque pincatsariventajeitiriri carireasati. Savicatsi meeca aca Jerosarequi. Ipoqui chapinqui.

8 Ari yaajeitanajiri anta. Ineantavacariri Eroreshi Jesoshi, iquimoshiretanaque. Oshequi iquemacotapinitaqueri, itasoncantayetaque, irootaque icoantavetacaniri irineeri. Icoaveta irineerime intasoncantayeteme. 9 Oshequi isampiyevetacari paitapeerica, iro cantaincha te iranqueriji Jesoshi. 10 Oshequi yapiitapinitiniri yora amaqueriri:

—Te incameetsateji. Ainiro irantane.

11 Impoiji ishirontimentajeitacari Jesoshi yora Eroreshi aisati maaroni soraropee. Impoiji iquitsaataqueri cameetsari quitsaarentsi, ishiacantamempeacari pincatsari, irishirontimentajeitanteariri aisati. Impoiji itianquiri aisati anta Piratoqui. 12 Ari peerani iquisavacaapinita Eroreshi aisati Pirato, iro cantaincha meeca intanacaro yaacameetsatavacaaja. Yojocajiro iquisavacaaveitani.

Yoacantaqueri Pirato Jesoshi, irinti Varavashi yoipacaajiri.

(Mt. 27.15-26; Mr. 15.6-15; Joa 18.39–19.16)

13 Impoiji yapatojeitacari Pirato yora jivatacaajeitiriri saserotepee, pincatsaripee, aisati oshequi atiripee pashini.

14 Ari icantavaqueri:

—Pamene, incaranqui pamavetaquenari yoca, picantajeivetaquena yoamejeitaqueri atiri irojocajeitena narori, aisati iriori novincatsaririntepee. Pineajeitaquena nosampitaqueri paitaricapee, iro cantaincha noneacameetsatiri: te aneeroji irantane. 15 Aisati iriori Eroreshi, ineacameetsataqueri, irootaque yoipiantacariri aca. Pineaquero, tecatsi irante noacantanteariri. 16 Meeca nompasatacanteri, impoiji noimpacajeri.

17 Ari maaroni osarintsi ariorica omoncarataca oca vieshita iquenqueshiretantarori yavisantaniri peerani inampire Tasorentsi, yora oantatsiri, yora Pirato yoipacajiri aparoni shirampari yoiminqueetaqueri. 18 Ari itsipatavacaajeitaca icantajeitaqueri:

—Poacanteri yoca, irinti Varavashi poimpacajeri.

19 Ari yora Varavashi peerani icantajeitaqueri ishaninca anta Jerosarequi: “Tsame ajocajeri yora pincatsari”. Impoiji yoaqueri ishaninca, irootaque yoiminqueantacariri caravosoqui. 20 Icoaveta Pirato iroimpacajerime Jesoshi, irootaque icoantavetacari iroimajerentajerime atiripee, iro cantaincha 21 aiquero icantajeitanajatiiri:

—Pimpajacotacanteri. Pimpajacotacanteri.

22 Yapiivetajari aisati Pirato:

—¿Paita nompajacotacantanteariri? ¿Paita yantaqueri? Nosampijeivetaquempi, iro cantaincha tecatsi piotacaasanotena noacantanteariri. Nompasanatacanteri, impoiji noimpacajeri.

23 Icantani icajemajeitanaque:

—Pimpajacotacanterive. Pimpajacotacanterive.

Aiquero icantanaitii, irosati iquemisantantacariri Pirato, 24 icantiri:

—Ari nomajeitempiro oca picoacaajeitaquenari.

25 Yoipacaacantajiri Varavashi, aisati icantajeitaqueri:

—Paajeitanaqueriqueti Jesoshica, jaocarica pincanteriri.

Ijatacaajeitaqueri anta impajacoterinta.

(Mt. 27.31-32; Mr. 15.21-23; Joa 19.16-17)

26 Ari yaajeitanaqueri Jesoshi anta impajacoterinta, iquenanaque avotsiqui. Jeri itonquiojeitavacari shirenesati pajitachari Shimo. Iponeanaca oantsiqui. Ari iperanatavacari soraro yanatanaqueneri Jesoshi coroshi, ora impajacotanteariri. Yoijatapairi itapiiqui Jesoshi. 27 Yoijajeitanaqueri oshequi atiri. Otimi aisati oshequi tsinane iraacojeitaqueriri. Oshequi oashiretacotacari, irootaque ocajemacojeitantacariri aisati. Jerosaresato onajeiti. 28 Iro cantaincha yamenanaquero Jesoshi, icantajeitanaquero:

—Eiro piracojeitanatsi, avisati iracojeitajanchane, aisati piracojeiteri pitomipee. 29 Coajica ompomerentsitimojeitempi, pashinoncaajeitanaquea. Pincantajeite: “Oquimoshiretaque caari timatsi otomi”. 30 Incoajeivetea atiri ontijerime imperita. 31 Pamene, tecatsi nanteni nainti, iro cantaincha iroashinoncayena. Tempa coajica irashinoncaasanotaquea maaroni antirori caari cameetsatatsi.

32 Aisati anta yaayeetanajiri apite coshitantatsiri, intsipajeiteari iriori Jesoshi, impajacojeiteri.

Ipajacotaqueri Jesoshi coroshiqui.

(Mt. 27.33-38; Mr. 15.22-32; Joa 19.18-24)

33 Ari yareetacaajeitapaacari anta Caraveraqui, ipajacojeitapaaqueri coroshiqui, tac, tac, tac. Irinti yora coshitantatsiri, ipajacotaqueri pashiniqui coroshi anta iracosanoriqui Jesoshi. Irio itsipa ipajacotaqueri anta irampatequi. 34 Impoiji iquenquetsatacairi Jesoshi iriri:

—Apa, pincavintsayeri yocapee, eiro poasanquetaimentiritsi yoaquena. Te irioteji paitarica yantiri.

Ari icoajeitaque soraropee iraajeitero iitsaareni Jesoshi. Icanti:

—Tsame ampishonquero mapijaniqui ayojeitanteari janicarica aitajerine iitsaareni.

Icanti itsipa:

—Jaa, jentsiqueti, aneantearo.

35 Ari itimi anta oshequi atiri, amenajeitaqueriri, aisati itimi yora pincatsaripee, ishirontimentajeitacari Jesoshi, iji, iji, iji; icanti:

—Yoavisacovetacari itsipapee, jentsite amenavaquerita ariorica irimatajea iroavisacotajea irisati. Iriotasanotaquerica Quirishito, itiancane Tasorentsi, ari irimatajea irisati iroavisacotajea.

36 Aisati iriori soraropee, ishirontimentajeitacari. Ijatashitaqueri, imperime ovaja, quepishijari. 37 Icantaqueri:

—Avirorica ivincatsarite jorio, jentsite poavisacotajea avisati: iji, iji, iji.

38 Ainiro ipajacoyeetaquero anta coroshiqui sanquenarentsi, otimi iitoqui Jesoshi, jenioquiji. Osanquenataca irineanequi quereshiasati, aisati irineanequi oromasati, aisati irineanequi jorio. Osanquenataca, ocanti: “Jeri yoca ivincatsarite jorio”.

Iquenquetsatacairi Jesoshi coshitantatsiri ipajacoyeetiri.

(Mt. 27.39-53; Mr. 15.33-38; Joa 19.28-30)

39 Aisati yora coshitantatsiri ipajacoyeetaqueri, ishirontimentacari iriori.

—Avirorica Quirishito, poavisacotajea avisati, aisati poavisacotena narori.

40 Iro cantaincha iquisatsataqueri itsipa coshitantatsiri:

—Tempa pimpincatsateri Tasorentsi. Aisati avirori, irotaintsi pincame. 41 Ainiro antanepee arori ancamajeitanteari, irintiquea yoca, tecatsi irante incamanteari.

42 Aisati icantiri:

—Jesoshi, ariorica pareetea anta pimpincatsaritenta, pinquenqueshiretapeena narori, poavisacotena.

43 Yacanaqueri:

—Queario oca noncantempiri: meeca quitaiteri pintsipatanaquena anta ocameetsaitetinta.

44 Itampaticatapaaque meeca catsirincaiteri. Omapocashitanaca antearo otsitenitanaque. Ari otsitenitanaque irosati ishaaviniji. 45 Aisati itsitenitanaque catsirincaiteri. Aisati otimi anta ivancoqui Tasorentsi oticaashiro nianqui. Ari omapocashitanaca, otsereanaque, tsererere, tsati; apitemaotanaque. Impoiji antearojenca icantanaque Jesoshi:

46 —Apa, meeca noncame. Aviro quempoyeajenaneri.

Irosati icamantanaca, toren.

Yoashirejeitanaca maaroni neaqueriri Jesoshi icamaque.

(Mt. 27.54-56; Mr. 15.39-41)

47 Ineantavacariri iyapitanote soraro, icanti:

—Tempa icameetsataque Tasorentsi. Queario icameetsatasanotini yoca shiramparini. Te ontimeniji irantane.

48 Aisati yora amenajeitiriri, iquenqueshirejeitanaca maaroni. Ipiajeitanaja nampitsiqui, yoashirejeitanaca catsini. 49 Irintiquea yora iojeitiriniri Jesoshi, icatiajeitaca ara aiquetiji, yamenajeitanaque. Ocarajeitiri oca tsinanepee poneachari Carireaqui, tsipatapaacariri chapinqui Jesoshi.

Yoiminqueetaqueri Jesoshi omoroqui.

(Mt. 27.57-61; Mr. 15.42-47; Joa 19.38-42)

50-51 Ari itimi anta cameetsari shirampari, pajitachari Jose, arimateasati. Otimi Arimatea anta Joreaqui. Ari icarajeitaqueri Jose yora itsipapee pincatsariyetatsiri, yoametavacaapinijeita, iro cantaincha te incoaveteaji irinti impajacotacanteri Jesoshi. Ipincatsataqueri irinti Tasorentsi, yaamaajeitacari impoque impincatsariventajeiteri maaroni atiri. 52 Ari ijataque iriori, yameniri Pirato, icantaqueri:

—Nocoaque pishinetenari Jesoshini, naanajeri.

Icantiri:

—Ari, pijatequeti, paanajeri.

53 Impoiji yoaniireajiri, yapinaicacotaqueri tocoyaqui, cameetsamaotatsiri. Yaanajiri anta oninta mapi, ora iroaquera imoqueeti, yominqueapaaqueri tsompoinaqui. Tecatsi itsipa iroyeete anta omoroquinta. 54 Tempa irootaque Viereneshi icamantacari Jesoshi. Yovetsicajeitaquero atiri paitapeerica, tempa irotaintsi saavaro imaoreajeitantari. 55 Ora tsinanepee oijatacojeitiri Jesoshi, amenacojeitaqueri yaajeitanaqueri omoroqui, anta yoajeitaqueri tsompoina. 56 Impoiji opiajeitanaja anta ovancoqui. Ovetsicapaaquero casancajari aisati pashini casancatatsiri. Impoiji saavaro omaoreajeitanaque, omoncarataquero isanquenare Moishishi.

<- ISANQUENARE IROCASHI 22 ISANQUENARE IROCASHI 24 ->