1 Joon mo gangɨ́ɨi¹gɨ dyatyʉ́² jiin²¹ joon gangó³oon tún¹ Jerusalén coon'¹³ Bernabé. Joon gajée¹moo jon Tito. 2 Gangó³oon tsʉ Dios gajma'²a jna júu³ 'e 'ná¹ ní³ii. Joon fu Jerusalén do ga'e'³ee 'in tsá² do 'e júu³ tyʉ́² 'e nigacwo'²oo 'in tsá² 'in jo seein²¹ Israel. Pe ga'e'³ee lɨ' coon'²¹ 'in lɨ́ɨi¹ tsacøøi'¹³ jee²¹² 'ii tsʉ jo gali'iin²¹²na wa'a 'e to² 'e nigajmáa³aa sɨ 'e to² ijmáa³aa 'ee ilí² jo 'ee to² tí². 3 Joon 'in Tito do, xʉfiin'¹³ jo lɨ́ɨ¹i tsá² seein²¹ Israel do, jo galɨ́² wa'a 'ii'²¹in 'ido 'e li² circuncisión, 4 xʉfiin'¹³ 'inlɨ́ɨi¹³ tsá² do gali'iin²¹²in wa'a 'ii'²¹in Tito do 'e li² do. Joon 'in tsá² do, 'in gali'iin²¹²in la joon, jo lɨ́ɨ¹i tsaru'¹u' la jai'², jiin'¹³ ga'í² jee²¹² jna'a 'uun²¹mo. Ga'í² 'in tsá² do jee²¹² jna'a wa'a ilí² jøø²ø xiaala galáai² Cristo Jesús jna'a la to² tyʉ'² ley do, joon 'iin²¹²in wa'a lí² 'ñúu¹i jna'a coon'¹³ ley do tún¹. 5 Pe jiin'¹³ catá² jo gacwóo¹³o'o wa'a jée¹i jna'a, tsʉ gali'iin²¹²moo'o 'e lí² 'e 'oo²gɨɨ' 'e júu³ jai'² do tya' 'e tiin'¹³ tsá².

6 Joon 'in tsacøøi'¹³ do jo gatsaa'²¹a jiin'¹³ coon²¹ wa'a lí² un'láai² 'e júu³ tyiia. Pe cwáain¹ tyiia jo 'ee tsa'goo¹‑tsii tya' 'in tsacøøi'¹³ do tsʉ jo jmoo¹o Dios 'ii'²¹ coon'¹³ 'e ní² tsá². 7 Xʉ la wa'a tsa'láai² júu³ tyiia, galiñí² 'in tsá² do 'e nigacwo'¹o Dios jna 'e to² do wa'a cwo'³oo 'in tsá² jo seein²¹ Israel 'e júu³ tyʉ́² tya' 'e tiin'¹³ tsá². Nigacwo'¹o Dios jna 'e to² do jiin'¹³ la nigacwo'¹o Tʉ́³ to² wa'a cwo'¹o tsá² 'e júu³ tyʉ́² do tya' tsá² Israel. 8 Tsʉ coon²¹ røø²¹ 'in Dios 'in nigasii¹in Tʉ́³ lɨ́ɨi¹ apóstol jee²¹² tsá² Israel, 'ii jon nigasii¹in jna lɨ́ɨ¹na apóstol jee²¹² tsá² 'in jo seein²¹ Israel.

9 Tsʉ 'wii'¹³ joon, Jacobo, coon'¹³ Tʉ́³ coon'¹³ Wó³, 'in lɨ́ɨi¹ 'in tyiin²gɨ jee²¹² 'ii, mo galiñii¹i xiiala nigajmaa¹a Dios coon'¹³ jna, gason'¹on cwóo³oo coon'¹³ cwoo²¹ Bernabé lawa coon²¹ li² 'e røø²¹ sɨɨ²¹ɨ'ɨ coon'¹³on. Sɨɨ²¹ɨ'ɨ røø²¹ wa'a tsá² jna'a 'e tsajmoo²¹o'o to² jee²¹² 'in tsá² jo seein²¹ Israel la 'ɨɨ²¹² tsajmaa¹a 'ido to² jee²¹² tsá² Israel do. 10 Gamɨɨ¹o wa'a jiin'¹³ jo 'íin²‑tsii'i 'in tsá² tañíi² do. Joon gacwo'²‑tsii nigajmá³aa 'elo.

11 Pe mo gacwéi¹ Tʉ́³ fu lɨ taan²¹²na fuu²¹ Antioquía gajíi²na 'ii tyaníi¹i tsʉ nigajmaa¹a 'e jo tɨ́ɨi² jmaa¹a. 12 Tsʉ la nifu mo gatyíi¹a Antioquía do gagøø'²¹o caain²¹ coon'¹³ 'in tsá² jo seein²¹ Israel do. La joon gajmaa¹a ca mo gatyalíin² 'inlɨ́ɨi¹³ tsá² gasii¹in Jacobo. Mo ngayuui'¹³ joon ga'láa² Tʉ́³ 'wii²¹² jmaa¹ coon'²¹ 'ña'a, jo gøø'²¹gɨ caain²¹ coon'¹³ 'in tsá² jo seein²¹ Israel do tsʉ 'goo'²¹o Tʉ́³ nei'² liñi¹ 'in tsá² coon²¹ poo²¹² 'in jin'²in 'e 'ná¹ 'ii'²¹ tsá² 'e li² circuncisión do joon jmáa¹a jilaa'²¹ tɨɨsi'² tya' tsá² Israel. 13 Joon 'in tsá² Israel catyaai² 'in jai'² lɨ́ɨi² Cristo néei¹ do galɨ́² tún² 'ɨ¹‑tsi coon'¹³ Tʉ́³ do joon cagɨ Bernabé gasɨ́ɨ²i røø²¹ coon'¹³ 'ido coon'¹³ 'e gó² jmoo¹o. 14 Pe mo gamó³oo xiiala jo nijmoo¹o røø²¹ coon'¹³ 'e jai'² tya' 'e júu³ tya' 'e tiin'¹³ tsá² gafuu²¹²uu Tʉ́³ tyani jileei'²¹ tsá² do: “'Nʉ‑ʉ, 'in lɨ́ɨi¹ tsá² Israel, joon nigajmaa²'a la jmoo¹o 'in tsá² jo seein²¹ Israel, jon'on la jmoo¹o 'in tsá² Israel; ¿xiia lɨ'ɨ 'iin²¹²u'un tyʉ'²'ʉ to² tsá² jo seein²¹ Israel wa'a jmáa¹a la jmoo¹o tsá² Israel?”

15 Jna'a lɨ́ɨ¹na'a tsá² Israel coon'¹³ 'e seen²¹na'a, jo lɨ́ɨ¹na'a tsá² 'noo¹o tsaa² lagɨ 'in tsá² catyaai². 16 Xʉfiin'¹³ joon né²oo'o 'e jo mo gajmeei¹ Dios tsá² tyúi¹ tyaníi¹i jiin'¹³ jaain²¹ tsʉ 'wii'¹³ nigajmaa¹a 'ido jiin'¹³ la to² tyʉ'² ley tya' Moisés. Gajmeei¹ Dios tsá² tyúi¹ tsʉ 'wii'¹³ ja'²mo galɨ́ɨi¹ Jesucristo. Tsʉ 'wii'¹³ joon jo'¹o galɨ́ɨi² jna'a Jesucristo 'e coon'¹³ la joon lí² jmeei¹ Dios tyú¹na'a tsʉ 'wii'¹³ 'e jai'² lɨ́ɨ²na'a jon' wa' tsʉ 'wii'¹³ nigajmoo²¹o'o la to² tyʉ'² ley. Tsʉ jo untyúi¹ Dios jiin' jaain²¹ tsá² tsʉ 'wii'¹³ 'e nigajmaa¹a la to² tyʉ'² ley.

17 Joon jna'a, wa'a 'iin²¹²na'a 'e untyúi¹ Dios jna'a 'wii'¹³ cwáain¹ tya' Cristo galɨ́² 'e lɨ́ɨ¹na'a tsá² 'in røøi²¹ tsaa². Wana la joon, ¿tɨ lí² 'øøi'²¹‑tsi tsá² 'e Cristo nigajmaa¹a wa'a 'ná² jna'a tsaa²? ¡Esa la joon tsʉ jo lí² jmá¹ Cristo wa'a 'ná² jna'a tsaa²! 18 Tsʉ wana gajma'³aa tún¹ 'e ni'íin¹na do pe jna‑a nigarøø²¹na tsaa². 19 Tsʉ najúun²moo cwáain¹ tya' ley do, joon 'e ley do nigajngaa'¹³mo jna. Najúun²moo cwáain¹ tya' ley do yʉ to² 'e liseen²¹na tya' Dios. 20 Jna ni'lɨɨ²¹²moo tsʉ najúun²moo caan²¹mo coon'¹³ Cristo tsaa'¹ crúu¹³. Tsʉ 'wii'¹³ joon jon' jna 'in seein²¹ nano pe Cristo seein²¹ coon'¹³ jna. Joon xʉfiin'¹³ 'e seen²¹mogɨɨ, seen²¹moo tsʉ 'wii'¹³ 'e jai'² lɨ́ɨ²na 'in Jóon¹ Dios, 'in nigali'iin²¹²in jna joon gajan'²mo 'ña'a 'e júun²in 'wii²¹² tyiia. 21 Joon jo jmáa³aa 'e jo 'ee to² tí² 'e feei'¹‑tsi Dios tyiia tsʉ wana gajmeei¹ Dios xʉfiin'¹³ jaain²¹ tsá² 'e tyúi¹ tsʉ 'wii'¹³ nigajmaa¹a la to² tyʉ'² ley jo 'ee to² 'íi³ 'e nigajuuin² Cristo wa' la joon.

<- GÁLATAS 1GÁLATAS 3 ->