ARÜANÜN PUK
90
Kot a nom tori feilfeilachök, nge manauen aramas a chök mochomoch
90.1-17
Eu iotek än Moses ewe aramasen Kot.
1 Ai Samol en äm lenien op seni eu täppin aramas tori eu täppin.
2 Mwen ekewe chuk resamwo fis,
pwal mwen kosamwo föri unusen fanüfan
en chök Kot seni fansoun esepop
tori fansoun esemüch.
3 Ka awili aramas ngeni pwül o üra,
“Ämi nöün aramas, oupwe liwinsefäliti pwül.”
4 Pun engeröü ier ra usun chök eu rän me reöm,
ra usun chök ewe rän näneu a fen la,
ika usun chök eu leülüngatin eu pwin. ✡2.Pet 3.8
5 En ka angekaiela manauen aramas usun müttirin puun eu chanpupu.
Ra usun chök eu tan mi müttir manlüküla,
ra pwal usun chök fetil mi märifötä lesosor.
6 Lesosor ewe fetil a aümanau o märifötä,
nge lekuniol a aümämä o pwasala.
7 Pun äm aia rosola ren om song,
äm aia fokun niuokus ren om lingeringer.
8 Ka anomu äm pwüngingau me mwom,
äm tipis mi monola ka särifätä pwe ka tongeni küneer.
9 Pun ränin manauem meinisin ra la senikem ren om lingeringer,
nge ierin manauem kewe ra müchüla usun eu ngasangas.
10 Iwe, ierin manauem ra tori fik,
nge are eman a pöchökül, a tori walik ier.
Nge lon ekewe ier a chök masou ren angang me weires.
Ra müttir wesila usun chök aia ässila.
11 Nge iö a mefi manamanen om song,
nge iö a silei an epwe niuokusiti om lingeringer?
12 Kopwe aiti ngenikem pwe aipwe eiteita ränin manauem mi mochomoch,
pwe aipwe tipachemela.
13 Ai Samol mi Lapalap, kopwe kul ngenikem. Ifa ükükün fansoun kopwe song ngenikem?
Kopwe tongei noum kewe chon angang.
14 Kopwe aurakem ren om tong ellet iteiten lesosor,
pwe aipwe köl o pwapwa lon ränin manauem meinisin.
15 Kopwe apwapwakem lon aükükün ekewe rän ka ariaföüükem lon,
pwal lon aükükün ekewe ier aia küna weires lon.
16 Kopwe pwäri ngeni noum kewe chon angang om kewe föför,
pwal om manaman mi ling ngeni nöür kewe.
17 Äm Kot Samol mi Lapalap, om ümöümöch epwe nom wom.