77
Ach chip a fis ren ach chechemeni än Kot kewe manaman
77.1-20
Ngeni ewe mi emweni chon köl: Ei köl usun ngingin förien Jetutun köl. Echö än Asaf köl.
1 Üa siö ngeni Kot fän leüömong,
üa siö ngeni Kot fän leüömong pwe epwe aüselingaei.
2 Lon ränin ai riaföü üa kütta ewe Samol.
Lepwin üa aitietä pei lupwen ai iotek,
nge üsap chipwang.
Nge letipei esap tongeni chip.
3 Lupwen üa ekieki usun Kot, üa ngüngü,
nge lupwen üa ekinlon, üa tipemösök.
4 A föri pwe üsap tongeni möür lepwin,
üa nom lon weires pwe üsap tongeni kapas.
5 Üa ekieki usun ekewe fansoun lom
o chechemeni ekewe ier ra la.
6 Üa ekiek lon lelukei lepwin,
üa ekinlon o akais ngeniei,
7 “Ifa usun, ewe Samol epwe pöütikichela tori feilfeilachök,
nge esap ümöümöchsefäl ngenikich?
8 Ifa usun, an we tong ellet a wesewesen müchüla?
Ifa usun, an kewe pwon ra ükütiu fansoun meinisin?
9 Ifa usun, Kot a manlükala an epwe kirikiröch?
Ifa usun, an song a aükätiu an tong?”
10 Mürin üa üra, “Iei ai weires,
pwe manamanen Ewe mi Unusen Tekia esap chüen usun me lom.”
11 Ai Samol mi Lapalap, üpwe achemato om kewe föför.
Ewer, üpwe chechemeni om kewe manaman ka föri me lom.
12 Üpwe ekieki usun om kewe föför meinisin
o ekiek won om kewe föför mi amwarar.
13 Ai Kot, meinisin mine ka föri a pin.
Esap wor eman kot a tekia seni en.
14 En ewe Kot mi föri föför mi amwarar.
Ka pwäri om manaman lein chon ekewe mwü.
15 Ren om manaman ka angasa noum aramas,
ir ekewe mwirimwirin Jakop me Josef.
16 Ai Kot, lupwen ekewe koluk ra künok, ra niuokus,
nge epin ewe matau a chechech.
17 Ekewe kuchu ra ninätiu koluk,
ekewe chopulap ra püng me läng.
Om kewe inefi ra fila ekis meinisin.
18 Püngün om chopulap a nom lon ewe ewiniär.
Om kewe inefi ra asarama fanüfan.
Fanüfan a chechech o mwöükük.
19 En ka pwerela won matau,
ka fetal won ekewe koluk mi watte,
nge esap wor eman a küna rasen ipwom.
20 Ka emweni noum aramas ren Moses me Aaron