1 Oupwe kilisou ngeni ewe Samol mi Lapalap, oupwe köri itan.

Oupwe asilefeili an kewe föför lein chon ekewe mwü.

2 Oupwe köl ngeni, oupwe kölün mwareiti i,

oupwe apworausa an kewe föför meinisin mi amwarar.

3 Oupwe fokun ingemwareiti itan mi pin.

Chokewe mi kütta ewe Samol mi Lapalap repwe meseik.

4 Oupwe kütta ämi alilis me ren ewe Samol mi Lapalap,

oupwe kütta i fansoun meinisin.

5 Oupwe chechemeni ekewe föför mi amwarar a föriir.

Oupwe chechemeni an kewe manaman me an kewe kapwüng a eäni,

6 ämi mwirimwirin Apraham nöün Kot we chon angang,

ämi mwirimwirin Jakop kewe, ätewe mi fil me ren.

7 Ewe Samol mi Lapalap i ach we Kot,

an kewe allük ra fän iten unusen fanüfan.

8 I a chechemeni an we pwon tori feilfeilachök,

an we kapas a anüküchara ngeni engeröü täppin aramas.

9 A chechemeni ewe pwon a eäni ngeni Apraham,

ewe pwon a eäni fän akapel ngeni Isaak. [a]

10 A anüküchara ewe pwon ngeni Jakop pwe eu allük,

pwal eu pwon esemüch.

11 Iwe, a apasa, “Üpwe ngonuk ewe fanü Kanaan

pwe fanüom.” [b]

12 Lupwen nöün Kot kewe aramas ra fokun chokükün,

lupwen ra chon siamü lon ewe fanü Kanaan

13 o saifetal seni eu fanü tori pwal eu fanü,

seni eu mwü tori pwal eu mwü,

14 Kot esap mwüt ngeni eman pwe epwe ariaföüür.

A apwüngü ekewe king pokiter

15 o apasa, “Ousap atapa nei kewe mi fil,

ousap afeiengaua nei kewe soufos.” [c]

16 Lupwen ewe Samol mi Lapalap a awarato eu lengita won ewe fanü

o angei seniir ener mongö meinisin, [d]

17 a tinala eman mwän itan Josef epwe akom mwer,

ätewe ra amömöla pwe epwe eman amanau. [e]

18 Pechen ra föfö ren selimächä,

nge üan a katolong lon efoch ring seni mächä,

19 tori a fis mine a fen apasa,

nge än ewe Samol mi Lapalap we kapas a alletätä pwe a pwüng. [f]

20 Mürin, ewe kingen Isip a tinala eman pwe epwe amusa Josef,

ewe mi nemeni ekewe mwü a angasala i. [g]

21 A seikätä i pwe epwe samol lon imwan

o nemeni mettochun meinisin. [h]

22 Epwe nemenem won nöün kewe samol

o aiti ngeni nöün kewe souakom tipachem.

23 Mürin, Jakop a feila Isip

o siamü lon ewe fanü. [i]

24 Nge ewe Samol mi Lapalap a fokun achomonga nöün kewe aramas

o apöchöküleer lap seni chon oputeer.

25 A akulu leluken chon Isip, pwe ra oput nöün kewe aramas

o eäni rawangau ngeni nöün kewe chon angang. [j]

26 Mürin, Kot a tinala Moses nöün we chon angang

me Aaron ätewe i a filätä. [k]

27 Ir ra föri an kewe asisil me manaman

me lein ekewe aramas me lon ewe fanü Isip.

28 Kot a tinala rochopwak o arochokichi ewe fanü,

nge ekewe chon Isip ra chök ü ngeni an kewe kapas. [l]

29 Iwe, a awili ngeni cha ar kewe koluk,

pwe ekewe ikenen lor ra mäla. [m]

30 Fanüer a ur ren kairü,

ra mwo nge tolong lon imwen ar we king. [n]

31 Kot a kapas, nge ra war chomong pwiin loong,

pwal nikken ra nom lemenen fanüer. [o]

32 A apüngätiu wor ütten fau akasiwilin üt,

pwal fifi a fi ekis meinisin won fanüer,

33 Kot a atai ar irän wain me ar irä fiik

o atatakisi irän fanüer meinisin. [p]

34 Iwe, a kapas, nge ekewe lifichimas ra war,

pwal ekewe kükün lifichimas resap lea.

35 Ra eni meinisin mine a mär me won fanüer

o eni uän fotar irä. [q]

36 Iwe, a niela ekewe mwänichi meinisin me lon fanüer,

chokewe ra nöüniir lupwen ar pöchökül. [r]

37 Mürin, Kot a emwenawu chon Israel

fän silifer me kolt.

Esap wor eman me lein chon ar kewe ainang a apwangapwang.

38 Iwe, chon Isip ra pwapwa, lupwen chon Israel ra towu,

pun ra fokun niuokusitiir. [s]

39 Kot a anomu eu kuchu wor pwe pwölüpwölür,

pwal eu ekkei, pwe epwe asarameer lepwin. [t]

40 Ra tüngor, nge i a awarato ekewe machang iter kweil,

a ngeniir mongö mi chomong seni läng. [u]

41 A asangafeseni ewe achau pwe koluk a puwu seni,

a pulong lon ewe fanüapö usun eu chapupu. [v]

42 Pun Kot a chechemeni an we pwon mi pin

a eäni ngeni nöün we chon angang Apraham.

43 Iei mine a emwenawu nöün kewe aramas mi fil

fän pwapwa me mweireiren köl.

44 Iwe, a ngeniir fanüen chon ekewe mwü,

nge ir ra fanüeni ewe fanü o feiöchüni än ekewe aramas angang. [w]

45 Ei a fis pwe nöün kewe aramas repwe aleasochisi an kewe pwüüng

o apwönüetä an kewe allük.

Ousipwe mwareiti ewe Samol mi Lapalap.

<- KÖLFEL 104KÖLFEL 106 ->