1 Ekewe aramasangau ra sü, lupwen esap wor eman a tapweriir, nge ekewe chon pwüng ra pwora usun eman laion. 2 Are chon eu mwü ra tipis, epwe wor siwilikisin nöür sounemenem. Nge eu mwü epwe nüküchar o nonomotam, are mi wor aramas mi mirit o tipachem ra nemenem lon. 3 Eman aramas mi wor manan, a ariaföüü ekewe chon mwelele, a usun chök eu üt mi püngüchou, a atai uän irä. 4 Chokewe mi aleasolap ngeni ekewe allük ra mwareiti ekewe aramasangau, nge chokewe mi aleasochisi ekewe allük ra ü ngeniir. 5 Aramas mi ngau resap weweiti pwüng, nge chokewe mi niuokusiti ewe Samol mi Lapalap ra unusen weweiti. 6 Eman chon wöüngau mi wenechar a mürina seni eman chon wöümong mi manau rikirik. 7 Eman mi aleasochisi ekewe allük i eman nau mi tipachem, nge eman mi chiechi ngeni chon mongömong a aitengaua saman. 8 Eman mi awattela wöün ren an angei manauan me winnan, a ionifengeni wöün fän iten ätewe mi kirikiröch ngeni chon wöüngau. 9 Are eman esap aleasochisi ekewe allük, Kot epwe oput an iotek. 10 Eman mi emweningaua ekewe chon wenechar ngeni mine a ngau epwe turulong lon ewe pwang a püsin tuw, nge chokewe esap wor ar tipis repwe angei feiöch. 11 Eman aramas mi pisekisek a püsin ikeetä pwe a tipachem, nge eman chon wöüngau mi mirit a silei pwe ewe chon pisekisek esap iei usun. 12 Lupwen ekewe chon pwüng ra nemenem, a lapalap än ekewe aramas pwapwa, nge lupwen ekewe aramasangau ra nemenem, aramas ra opola. 13 Eman aramas mi aopala an tipis esap fefeitä lon manauan, nge eman mi pwärätä o likitala, Kot epwe ümöümöch ngeni. 14 Feiöchün eman aramas mi niuokusiti ewe Samol mi Lapalap fansoun meinisin, nge ätewe mi ülöförea lelukan epwe tolong lon feiengau. 15 Eman sounemenem mi ngau mi nemeni chon wöüngau a usun chök eman laion mi wörüwör, ika eman pear mi cheri liapan. 16 Eman sounemenem mi ngau esap wor an mirit a ariaföüü aramas, nge ätewe mi oput an epwe angei winnan fän pwüngingau epwe manauatam. 17 Eman aramas mi nimanauei eman, i epwe süsüfeil tori ränin an mäla. Esap wor eman epwe alisi. 18 Eman mi wenechar esap tolong lon feiengau, nge eman mi manau rikirik epwe tolong lon feiengau. 19 Eman mi angang won fanüan epwe wor chomong anan mongö, nge eman mi föri sokopaten angang mi lomotongau epwe watte an wöüngau. 20 Eman aramas mi allükülük epwe wor an feiöch mi somwola, nge eman mi amüttiri an epwe pisekisek epwe küna apwüng. 21 Esap mürina ach sipwe lifilifil aramas, nge fän iten essät pilawa eman aramas a tongeni föri mine esepwüng. 22 Eman aramas mi tipemong a mochen müttir küna pisekisek, nge esap silei pwe wöüngau epwe tori. 23 Eman aramas epwe kilisou ngeni ewe mi apwüngü, lap seni ewe mi eäni kapas amichimich ngeni. 24 Eman mi soläni mettoch seni saman ika inan o ekieki pwe esap tipis, i a wewe ngeni eman chon solä. 25 Eman aramas mi tipemong a afisätä fitikoko, nge eman mi apilükülükü ewe Samol mi Lapalap epwe wöümongola. 26 Eman mi püsin apilükülükü, i eman chon tiparoch, nge eman mi apwönüetä än ekewe chon tipachem öüröür epwe manau. 27 Eman mi fang ngeni ekewe chon wöüngau esap osupwang, nge eman mi amona mesan seniir, aramas repwe chök otteki. 28 Lupwen ekewe aramasangau ra nemenem, aramas ra opola, nge lupwen ra tur seni wiser, ekewe chon pwüng ra nemenem.