1 Eu kapasen pälüen mi pwetete a awesi lingeringer, nge eu kapas pöchökül a afisätä song. 2 Än ekewe chon tipachem kapas ra amwärärei aramas ngeni silelap, nge ekewe chon tiparoch ra eäni kapasen umwes. 3 Ewe Samol mi Lapalap a küna mine a fis ekis meinisin, a ouwasacha ekewe chon föföringau me chon pwüng. 4 Kapas pwetete ra atoto manau, nge kapas pöchökül ra atai letipen aramas. 5 Eman mi tiparoch a pöütala än saman kapasen öüröür, nge ätewe mi etiwa kapasen fön a mirit. 6 Lon imwen ekewe chon pwüng mi wor chomong wöü, nge liwinin än ekewe aramasangau angang a aworato osukosuk. 7 Ekewe chon tipachem ra achöfetalei silelap, nge ekewe chon tiparoch resap föri iei usun. 8 Ewe Samol mi Lapalap a oput än ekewe aramasangau asor, nge a pwapwa ren än ekewe chon wenechar iotek. 9 Ewe Samol mi Lapalap a oput än ekewe aramasangau föför, nge a echeni chokewe mi föri mine a pwüng. 10 Mi wor eu apwüng mi chou fän iten ätewe mi föri mine a ngau, nge ätewe mi oput kapasen fön epwe mäla. 11 Ewe lenien sotup me ewe leni mi alolol ra pwä me mwen ewe Samol mi Lapalap. Ifa usun, än eman aramas epwe tongeni aopala ekiekin letipan me fän mesen Kot? 12 Eman chon turunufas esap aücheani än eman epwe apwüngü, esap mochen angei öüröüran seni ekewe chon tipachem. 13 Eman mi pwapwa lon lelukan a pwal wopwapwa won mesan, nge eman mi letipeta a wololilen. 14 Eman mi mirit a kütta silelap, nge eman mi tiparoch a menemenöch ren an wewemang. 15 Ränin manauen eman mi nom lon riaföü a chök ingau, nge eman mi pwapwa lon lelukan a chök pwapwa fochofoch. 16 A mürina än eman epwe wöükükün, nge a niuokusiti ewe Samol mi Lapalap, lap seni än eman epwe wöümong, nge a nom lon weires. 17 A mürina ach mongöfengen iasai, nge mi wor tong lefilach, lap seni ach ochochfengen fituken kow mi kiris, nge mi wor koput lefilach. 18 Eman aramas mi songokai a afisätä anini, nge eman mi mosonotam a afisätä kinamwe. 19 Eman mi chipwang a tolong lon chomong weires, nge eman mi wenechar esap tolong lon osukosuk. 20 Eman alüal mi mirit a apwapwai saman, nge eman mi tiparoch a chök oput inan. 21 Eman esap wor an mirit a pwapwaiti umwes, nge eman mi mirit a föri mine a pwüng. 22 Are esap wor kapasen öüröür, esap fis mine aramas ra ekiekietä. Nge are a wor chomong chon öüröür, a fisiöch mine ra ekiekietä. 23 Eman aramas a pwapwa, lupwen a sileöchü mine epwe apasa, sokun kapas mi fichiti eu me eu fansoun. 24 Chon tipachem ra fetal won ewe al mi aletä ngeni manau, pwe resap fetal won ewe al mi aletiu ngeni mäla. 25 Ewe Samol mi Lapalap a ataetiu imwen chon lamalamtekia, nge a tümwünü kiännin fanüen eman fefin mi mä pwülüan. 26 Ewe Samol mi Lapalap a oput än ekewe aramasangau ekiek, nge a pwapwaiti än chokewe mi limöch leluker kapas. 27 Eman mi tipemong ngeni an epwe angei winnan fän pwüngingau a aworato osukosuk won chon leimwan, nge eman mi oput lifangen amichimich epwe manau. 28 Ekewe chon pwüng ra akomwen ekieköchü mine repwe pälüeni ngeni kapas, nge ekewe aramasangau ra müttir atowu kapas mi afisätä osukosuk. 29 Ewe Samol mi Lapalap a rongorong ngeni än ekewe chon pwüng iotek, nge esap afäli ekewe aramasangau. 30 Wopwapwan won mesen eman a apwapwai leluken aramas, nge pworaus mi mürina a akinamwei inisin aramas. 31 Eman mi aüselingafichi ekewe kapasen fön mi atoto manau epwe nonom lein ekewe chon tipachem. 32 Eman mi asorongorongola ngeni kapasen emirit a püsin oput i, nge eman mi afäli kapasen fön a fefeitä lon an weweöch. 33 Ach niuokusiti ewe Samol mi Lapalap iei alen ach kaiö tipachem, nge ach sipwe atipetekisonakich, a iei akomwen ach angei iteüöch.

<- ÄN SALOMON FOS (PROFERPIS) 14ÄN SALOMON FOS (PROFERPIS) 16 ->