1 Iwe, chon ekewe ainangen Rupen me Kat a wor chomong nöür pwiin kow. Iwe, ra küna pwe won ewe fanü Jaser pwal won ewe fanü Kiliat ra mürina le foleni kow. 2 Iei mine chon ekewe ainangen Rupen me Kat ra feito o üreni Moses me ewe souasor Eleasar, pwal ekewe souemwenin ekewe aramas, 3 “Ewe fanü ünükün Atarot, Tipon, Jaser, Nimra, Hespon, Eleale, Sepam, Nepo me Peon, 4 ewe fanü ewe Samol mi Lapalap a akufu me fän mesen ekewe aramasen Israel, a mürina le foleni kow won. Iwe, äm noum chon angang a wor chomong nöüm kow. 5 Kose mochen kopwe mwüt ngenikem ei fanü pwe aipwe fanüeni. Kosap nukikeemila pekilan ewe chanpupu Jortan.”

6 Nge Moses a üreni chon ekewe ainangen Kat me Rupen, “Ifa usun, pwimi kewe repwe feila ngeni maun, nge ämi oupwe chök nonom ikei? 7 Pwota oupwe atipetipa leluken ekewe aramasen Israel pwe resap feila pekilan ewe chanpupu Jortan o tolong lon ewe fanü ewe Samol mi Lapalap a ngeniir? 8 Iei usun mine semelapemi kewe ra pwal föri, lupwen üa tinirela seni Kates-parnea pwe repwe operi ewe fanü. 9 Iwe, ra feila tori ewe lemolun Eskol o küna ewe fanü, nge lupwen ra liwinto, ra atipetipa leluken ekewe aramasen Israel, pwe resap feila o tolong lon ewe fanü ewe Samol mi Lapalap a ngeniir. ✡Num 13.17-33 10 Iwe, lon ewe rän ewe Samol mi Lapalap a fokun song o pwon fän akapel, 11 ‘Ellet, esap wor eman me lein ekewe mwän seni ier rüe feitä mi towu seni Isip repwe küna ewe fanü üa pwon fän akapel pwe üpwe ngeni Apraham, Isaak me Jakop. Pun ir resap fokun aleasochis ngeniei. 12 Chilon chök Kalep nöün Jefune we mwän ewe chon Kenis me Josua nöün Nun we mwän, pun ir ra fokun aleasochis ngeniei ngang ewe Samol mi Lapalap.’ 13 Iwe, ewe Samol mi Lapalap a fokun song ngeni chon Israel o föri pwe repwe rikifetal lon ewe fanüapö lon ükükün faik ier, tori ra rosola ewe pilon aramas mi föföringau me fän mesen ewe Samol mi Lapalap. ✡Num 14.26-35 14 Nge iei ämi oua chök tolong lemürürün sememi kewe, ämi eu täppin aramas mi tipis. Oua chök alapala än ewe Samol mi Lapalap song mi pöchökül ngeni Israel. 15 Pun are oua kul seni ämi aleasochis ngeni Kot, i epwe likitisefäliela ekei aramas lon ewe fanüapö. Ren ei ämi oupwe awarato feiengau wor.”

16 Mürin, ra kanoto ren Moses o apasa, “Äm aipwe chök aüetä tittin sip ikei fän iten nöüm kewe pwiin sip pwal telinimw fän iten pwülüem me nöüm kewe semirit. 17 Nge äm aipwe angei pisekin maun o feila mwen ekewe aramasen Israel tori aipwe emweniir ngeni lenier. Nge pwülüem me nöüm kewe semirit repwe nonom lon ekewe telinimw mi pöchökül tittir, pwe resap feiengau ren chon ei fanü. 18 Äm aisap liwiniti imwem tori ekewe aramasen Israel repwe angei en me fanüan. 19 Äm aisap angei och fanü seniir pekilan ewe chanpupu Jortan. Pun aia fen angei inetim fanü me ötiuen ei chanpupu Jortan.” 20 Mürin, Moses a üreniir, “Are oua wesewesen mochen föri iei usun, iei oupwe angei pisekin maun o feila maun fän emwenien ewe Samol mi Lapalap. 21 Ämi mwän meinisin mi molotä ngeni maun oupwe feila pekilan ewe chanpupu Jortan fän emwenien ewe Samol mi Lapalap, tori i epwe asüela chon oputan me mwan. 22 Mürin, ika ewe fanü a nom fän nemenian, ämi oupwe liwinla, pun oua apwönüetä mine oua pwon ngeni ewe Samol mi Lapalap me ekewe chon Israel. Mürin, ewe Samol mi Lapalap epwe alletätä pwe ei fanü mi nom ötiuen ewe chanpupu Jortan fanüemi. 23 Nge are ousap apwönüetä ämi pwon, oua tipis ngeni ewe Samol mi Lapalap. Oupwe silei pwe liwinin ämi tipis epwe fokun torikemi. 24 Iwe, oupwe aüetä telinimw fän iten pwülüemi me nöümi semirit me tit fän iten nöümi sip. Nge oupwe apwönüetä mine oua eäni pwon.” 25 Iwe, chon ekewe ainangen Kat me Rupen ra üreni Moses, “Äm noum chon angang aipwe föri mine en äm samol ka eäni allük. 26 Nöüm semirit me pwülüem, pwal nöüm pwiin sip me kow meinisin repwe chök nonom lon ekewe telinimwen Kiliat. 27 Nge äm meinisin aia molotä pwe aipwe feila pekilan ewe chanpupu Jortan o maun fän emwenien ewe Samol mi Lapalap, usun en äm samol ka allük.”

28 Iwe, Moses a ngeni ewe souasor Eleasar me Josua nöün Nun we mwän, pwal ngeni mwänirelan ekewe familien ekewe ainangen Israel ei allük fän äsengesiir, 29 “Are ekewe mwän seni chon ekewe ainangen Kat me Rupen mi molotä ngeni maun repwe etikemi le feila pekilan ewe chanpupu Jortan fän emwenien ewe Samol mi Lapalap, nge ewe fanü epwe nom fän nemeniemi, mürin oupwe ngeniir ewe fanü Kiliat pwe repwe fanüeni. 30 Nge are resap etikemi le feila maun pekila, repwe chök fafanü remi lon ewe fanü Kanaan.” 31 Iwe, chon ekewe ainangen Kat me Rupen ra apasa, “Äm noum chon angang aipwe föri mine ewe Samol mi Lapalap a ürenikem. 32 Äm aipwe feila pekilan ewe chanpupu Jortan o tolong lon ewe fanü Kanaan fän emwenien ewe Samol mi Lapalap pwe aipwe maun. Nge inetim fanü epwe chök nom rem ötiuen ewe chanpupu Jortan.” ✡Jos 1.12-15

33 Mürin, Moses a ngeni chon ekewe ainangen Kat me Rupen, pwal ngeni ewe esopun ewe ainangen Manasa nöün Josef we mwän ewe mwün Sihon ewe kingen chon Amor me ewe mwün Ok ewe kingen Pasan, unusen ewe fanü me telinimwan meinisin fiti ekewe leni ünükür. 34 Iwe, chon ekewe ainangen Kat ra aüsefälietä ekewe telinimw Tipon, Atarot, Aroer, 35 Arotsofan, Jaser, Jokpeha, 36 Petnimra me Petharan. Iwe, ra aüetä tit ünükün ekewe telinimw, pwal tit fän iten nöür kewe sip. 37 Iwe, chon ekewe ainangen Rupen ra aüsefälietä ekewe telinimw Hespon, Eleale, Kiriataim, 38 Nepo me Paalmeon, nge ra siwili iter. Ra pwal aüsefälietä Sipma. Iwe, ra aitasefäli ekewe telinimw ra aüsefäliretä. 39 Iwe, ekewe mwirimwirin Makir, nge Makir nöün Manasa we mwän, ra feila Kiliat o liapeni, ra pwal asüela ekewe chon Amor mi nonom won. 40 Iwe, Moses a ngeni ekewe mwirimwirin Makir ewe fanü Kiliat. Iwe, ra nonom lon. 41 Nge Jair eman mwirimwirin Manasa a feila o liapeni wisoposopun ewe fanü Kiliat. Iwe, a aita ngeniir Hawot-jair. 42 Nge Nopa a feila o liapeni Kenat me wisoposopun kewe. Iwe, a aita ngeni Nopa püsin itan we.