NAHUM 3

1 Feiengauen ewe telinimw mi chofana o niela aramas,

ewe telinimw mi ur ren wöü, pokiten chon ra chök solä o angei pisekin aramas fän pöchökül.

2 Oupwe rongorong chöröüngüün ewe selin wichiwich,

ngüngün willen ekewe woken,

chopuchopun pechen ekewe oris

me akürangen ekewe wokenin maun.

3 Ekewe chon wawa oris ra che

fän ketilas mi molupolup me siles mi meriweriw.

Chomong ra ninnila,

ekewe somä ra chukuchukutä.

Chokewe mi mäla resap lea,

aramas ra chepetek wor.

4 Ei a fis ngeni Ninifa pokiten chomongun an föförün lisowu.

A liemung o föri angangen roong mi afeiengau,

a atupu chon ekewe mwü ren an föförün lisowu me an angangen roong.

5 Iei alon ewe Samol mi Unusen Manaman,

“Ngang üa ü ngonuk, Ninifa.

Üpwe pwiliti senuk üfom

o mwüt ngeni chon ekewe mwü

pwe repwe küna om selela me äsäwum.

6 Üpwe pwölü ngonuk limengau,

üpwe aitengauok

o äsäwok fän mesen aramas.

7 Meinisin mi künok repwe kul senuk

o apasa: Ninifa a tala.

Iö epwe kechüeiti?

Iö epwe mochen achipa?”

8 Ifa usun en, Ninifa, ka mürina seni ewe telinimw Tepes lon Isip mi nom arun ewe chanpupu Nil? Koluk a pwelifeili Tepes, ewe chanpupu epetin seni feiengau, nge ekewe koluk ina tittin. 9 A nemeni Itiopia me Isip, esap wor aükükün an pöchökül, chon Put me chon Lipia ir pelian.

10 Nge ekewe chon Tepes ra oola, ra feila lon fanüen chon liapeniir. Chon maun ngeniir ra atatakisi ekewe semiritin Tepes lepwokukun ekewe al meinisin, ra föti ekewe aramas tekia ngeni sein o uwerela, ra aineti lefiler ekewe mwän mi iteföüla. 11 Nge en Ninifa, kopwe pwal ün seni ewe kapen feiengau o mwäliel ren. Kopwe kütta eu lenien op pwe kopwe op seni chon oputom. 12 Om kewe leni mi pöchökül meinisin ra wewe ngeni ekewe irä fiik mi wor uar mi nup. Are eman a wichikiir, uar repwe morotiu lon awen ewe chon ochoch. 13 Noum kewe sounfiu ra usun chök fefin. Fanüom a suk ngeni chon oputom, nge ekkei epwe kenala amwöchün asamen telinimwom. 14 Kopwe üfüf koluk o amolokotä, pun chon oputom repwe pwelifeiliik, kopwe apöchöküla om kewe leni mi pöchökül. Kopwe alölü ewe pwülüpar pwe kopwe föri pilak, kopwe amolätä sekiitaan. 15 Inamwo ika ka amolokotä, nge ewe ekkei epwe chök kenukula ika kopwe mäla lon maun, kopwe kärila usun lifichimas ra ärala ekewe irä.

Ka achomongokola usun lifichimas, ka achomongokola usun lifichimas mi mwetemwet. 16 En ka achomongala noum kewe chon amömö, pwe ra chomong seni ekewe fün läng. Nge iei ra ässila usun ekewe lifichimas mi ameresala pöür o ässila. 17 Noum kewe samol ra usun lifichimas mi mwetemwet, noum kewe aramas tekia ra usun chök pwiin lifichimas mi sotiu won ekewe tit lon fansoun patapat. Nge lupwen akkar a tötä, ra ässila, esap wor eman a silei ia ra ässila ie.

18 En kingen Asiria, noum kewe samol ra mäla, noum kewe aramas tekia ra anutufoch. Noum kewe aramas ra toropasfeil won ekewe chuk, nge esap wor eman a achufengeniir. 19 Esap wor och epwe tongeni aükala om feiengau, kinasom esap tongeni mola. Meinisin mi rongorong pworausen om feiengau ra alopolop fän pwapwa. Pun iö esap nom fän om angangen ariaföü lon fansoun langatam? ✡Ais 10.5-34; 14.24-27; Sef 2.13-15

<- NAHUM 2