1 Iwe, lupwen Sona a küna ei, a oput o song ren. 2 Mürin a iotek ngeni ewe Samol mi Lapalap o apasa, “Ai Samol mi Lapalap, ifa usun, sap iei usun mine üa apasa pwe kopwe föri, lupwen üa chüen nonom won fanüei? Iei popun ai süla Tarsis, pun üa silei pwe en eman Kot mi ümöümöch o lukpwetete, ka pwal songomang o tongotam. Iwe, üa pwal silei pwe ka tipemecheres le siwili om ekiekin afeiengaua aramas kana. ✡Eks 34.6 3 Iei mine, ai Samol mi Lapalap, üa fokun tüngor ngonuk pwe kopwe angei seniei manauei, pun üa efich ai üpwe mäla mwen ai üpwe manau.” ✡1.King 19.4 4 Iwe, ewe Samol mi Lapalap a aisini Sona, “Ifa usun, mi pwüng om song?” 5 Iwe, Sona a towu seni ewe telinimw o feila ötiuan. A aüetä eu likachoch o mot fän nürün, a witiwit pwe epwe küna mine epwe fis ngeni ewe telinimw.

6 Mürin, Kot ewe Samol mi Lapalap a amärätä efoch irä, pwe epwe anürü möküren Sona o angasa seni an weires. Iwe, Sona a fokun pwapwa ren ewe irä. 7 Iwe, lupwen a tötä mallen rän, Kot a tinato eman man pwe epwe eni uapwalen ewe irä, pwe a pwasala o mäla. 8 Nge lupwen akkar a tötä, Kot a tinato och asepwäl mi pwichikar seni ötiu. Iwe, akkar a pwichiti möküren Sona pwe a fokun aiengau. Iwe, a tüngor pwe epwe mäla. A pwal apasa, “A mürina ai üpwe mäla mwen ai üpwe manau.” 9 Iwe, Kot a aisini Sona, “Ifa usun, a pwüng om song ren ewe irä?” Nge Sona a pälüeni, “Mi pwüng ai song, inamwo are üpwe mäla lon ai song.” 10 Iwe, ewe Samol mi Lapalap a üreni, “Ka achika ewe irä, nge kosap angang ngeni, kosap pwal amärätä. Pun a püsin märitä lon eu pwin, nge a pwal pwasala lon eu pwin. 11 Nge ifa usun, ngang üsap achika Ninifa ewe telinimw mi lapalap, ia a wor ie lap seni ipükü rüengeröü aramas resamwo silei lefilen öch me ngau, a pwal wor chomong man lon?”