“Israel, üa chechemeni om angangöch ngeniei leföpwülum we,

pwal om echeniei, lupwen sa kärän pwüpwülü.

Üa chechemeni usun om etifeiliei lon ewe fanüapö,

lon eu fanü esap wor eman a fofot ie.

3 Israel, en ka pin fän itei,

ngang echök üa nöünuk.

Chokewe meinisin mi afeiengauok üa ariaföüür o afeiengaueer.

Ngang ewe Samol mi Lapalap üa kapas.”

4 Oupwe aüseling alon ewe Samol mi Lapalap, ämi mwirimwirin Jakop, ämi chon ekewe ainangen Israel meinisin.

5 Iei alon ewe Samol mi Lapalap,

“Met mwäli ämi kewe lewo ra küna,

pwe ra feila toau seniei?

Ra fel ngeni ekewe uluulun anümwäl mi lomotongau

o wiliti aramas mi lomotongau.

6 Resap ekiekiei,

nge ngang üa fen amanaueer seni ewe fanü Isip

o emwenirela lon ewe fanüapö.

Ei fanüapö eu fanü mi pön o pwokurokur,

eu fanü esap püngütiu üt won, a chök wor feiengau lon,

eu fanü esap wor eman a nom ie,

esap pwal wor eman a mochen pwerela won.

7 Ngang üa emwenirelong lon eu fanü mi fokun res,

pwe repwe pwapwa le mongö uan o pwapwaiti ekewe mettoch mi mürina lon.

Nge lupwen ra tolong lon, ra alimengaua fanüei

o föri pwe fanüei epwe anioput.

8 Ekewe souasor resap ais, ‘Ifa i ewe Samol mi Lapalap?’

Chokewe mi silelap allük resap sileei,

ekewe souemwen ra ü ngeniei,

nge ekewe soufos ra osuni fän iten ewe anü Paal

o fel ngeni ekewe uluulun anümwäl mi lomotongau.

9 Iei mine ngang ewe Samol mi Lapalap üpwe atipisi nei kewe aramas,

üpwe pwal atipisi mwirimwirir kewe.

10 Oupwe feila ngeni ewe fanü Saipiros o katol,

oupwe tinala eman lon ewe fanü Ketar o nenengenifichi.

Oupwe pi ika mi wor ena sokun lapalap mi fis ikenan.

11 Esap wor chon eu mwü mi ekesiwili ar kewe kot,

nge ir resap wesewesen kot.

Nge nei aramas ra ekesiwiliei

ngang ar we Kot mi ling

ngeni pwal ekoch kot mi lomotongau.

12 Iei üpwe kapas ngeni läng usun ei,

pwe epwe mairü o weitifengeni ren mine a fis.

13 Pun nei aramas ra föri ruu tipis:

Ra likitieila,

ngang ewe puächen kolukun manau,

nge ra tuw chönüttu fän iter,

sokun chönüttu mi sangang, esap tongeni mwöch koluk lor.

14 Ifa usun, Israel eman amanau?

Ifa usun, a upulong lon eu familien chon angang?

Pwota chök chon oputan ra liapeni?

15 Ra leüömong le wörüwör ngeni usun laion ra wörüwör.

Ra ataela fanüan,

an kewe telinimw ra tatakis, nge resap chüen so.

16 Pwal ekewe aramasen Memfis me Tapanes

ra reipöpöla meten möküran.

17 Ifa usun, sap püsin en Israel ka awarato womw ei feiengau

ren om likitieila ngang ewe Samol mi Lapalap,

lupwen üa emwenukela won ewe al?

18 Met om feiöch ren om feila Isip

pwe kopwe ün seni kolukun ewe chanpupu Nil?

Ika met om feiöch ren om feila Asiria

pwe kopwe ün seni kolukun ewe chanpupu Oifrat?

19 Püsin om kewe föföringau repwe apwünguk,

nge om kul seniei epwe atipisuk.

Kopwe mefi pwe a ingau o weires ngonuk om kopwe likitieila,

ngang ewe Samol mi Lapalap om we Kot.

Esap wor menini me reöm.

Ngang ewe Samol mi Lapalap, ewe Kot mi Unusen Manaman üa kapas.”

20 Ewe Samol mi Lapalap a pwal apasa,

“Chomong ier ra la, en Israel, kosap mochen anomuk fän ai nemenem.

Kosap mochen aleasochisiei o fel ngeniei.

Nge ka fel ngeni ekewe koten leres

won iteiten chuk

pwal fän iteiten irä mi mwuresires.

21 Nge ngang üa fotukuk usun efoch irän wain mi mürina,

a pwük seni föün mi unusen mürina.

Pwota ka ingauala

o wiliti efoch irän wain mi mwacho o lomotongau?

22 Inamwo ika ka püsin limetuk ren sarasko

o sopuluk ren chomong soop,

limengauen om tipis a chüen nom fän mesei.

23 Pwota ka tongeni apasa, ‘Ngang üsap limengau.

Ngang üsap fel ngeni ekewe anü Paal.’

Kopwe nenengeni om kewe föför ka föriir me lon ewe lemol

o chechemeni mine ka föri.

Ka usun chök eman liefefinin kamel mi säfeil ekis meinisin,

lupwen a mochen etieti.

24 Ka pwal usun chök eman liafefinin aas mi mwacho mi nom lon ewe fanüapö

a afongofonga ewe asepwäl lon fansoun an mochen etieti.

Iö a tongeni pinei an mochen?

Ekewe ätemwän mi tapweri resap resin kütta,

pun repwe küna lon fansoun ar etieti.

25 Kopwe tümwünü pwe pecheöm esap malülü

ika chiorom esap pwasapwas

ren om tap me mürin pwal ekoch kot.

Nge en ka apasa, ‘Üsap chüen tongeni kulsefäl.

Üa echeni ekewe koten ekis,

üpwe chök tapwela mürir.’

26 Usun eman chon solä a itengau lupwen a oo, iei usun ämi chon Israel oupwe itengau: Ämi me ämi kewe king, pwal nöümi kewe nöüwis, nöümi kewe souasor me soufos. 27 Oupwe itengau ämi meinisin mi kapas ngeni efoch irä, ‘En semem,’ nge ngeni eföü fau, ‘En ka nöünikeemitiu.’ Pun oua kulu sökürümi ngeniei, nge ousap kulu mesemi ngeniei. Nge lupwen fansoun osukosuk oua apasa, ‘Kopwe feito o amanauakem.’ 28 Nge ikafa ir ämi kewe kot oua püsin föri fän itemi? Ir repwe feito o manauakemi lon fansoun ämi osukosuk are ra tongeni. Pun ükükün chomongun ämi kewe telinimw, iei ükükün chomongun ämi kewe kot, ämi chon Juta.”

29 Iei alon ewe Samol mi Lapalap, “Pwota oua lal ngeniei? Ämi meinisin oua ü ngeniei. 30 Esor lomoten ai apwüngükemi, pun ousap mirit ren. Usun eman laion mi kütta ochan, iei usun ämi oua niela nöümi kewe soufos. 31 Ämi aramasen Israel, oupwe aüselinga aloi. Ifa usun, üa wewe ngeni eu fanüapö me remi, ika eu fanüen rochopwak me feiengau? Pwota ämi nei aramas oua apasa, ‘Äm aipwe chök föri letipem, aisap chüen liwinsefälito reöm.’ 32 Ifa usun, eman föpwül a tongeni manlükala foutan, ika eman fin apwüpwülü söfö üfan üföüfen apwüpwülü? Nge nei aramas ra manlükieila lon chomong rän resap lea.

33 Israel, ka fokun silelap le kütta alen om kamwet. Pwal ekewe fefin mi fokun ingau ra tongeni kaiö senuk. 34 A pwä me won ufom chan ekewe chon wöüngau esap wor ar tipis, nge ka küna pwe sap ir chon solä. Iei mwo an fis ekei föför meinisin, 35 nge ka apasa, ‘Esap wor ai tipis. Ellet ewe Samol mi Lapalap ese chüen song ngeniei.’ Nge ngang üpwe apwünguk pokiten om apasa pwe esap wor om tipis. 36 Pwota a fokun mecheres ngonuk om kopwe siwili alom? Kopwe lichipüng ren chon Isip, usun ka fen lichipüng ren chon Asiria. 37 Kopwe pwal kul seni Isip o rotiu fän om säw, pun ngang ewe Samol mi Lapalap üa oput chokewe ka eäniir apilükülük. Kosap feiöch rer.”

<- JEREMAIA 1JEREMAIA 3 ->