1 Iei alon ewe Samol mi Lapalap, “Kopwe feila o kamö eu pör mi för seni pwül. Mürin oupwe mwinela me ekoch lein ekewe souakomwen ekewe aramas, pwal ekoch souasor chinlap. 2 Oupwe towu me lon ewe Asamalapen Mökkün Sepi o feila lon ewe lemolun Hinom. Ikenan kopwe asile ngeniir ekewe kapas üpwe ürenuk. ✡2.King 23.10; Jer 7.30-32; 32.34-35 3 Kopwe apasa, ‘Oupwe rongorong, ämi kingen Juta me ämi chon Jerusalem, usun mine ngang ewe Samol mi Unusen Manaman ewe Koten Israel üa apasa: Üpwe awarato eu sokun feiengau won ei leni, pwe iteiten eman me eman mi rongorong usun epwe mairü ren. 4 Üpwe föri ei, pun ekewe aramas ra likitieila. Ra apiningaua pinin ei leni ren ar keni apach mi pwokus ngeni pwal ekoch kot, sokun kot ir me ar kewe lewo pwal ekewe kingen Juta resap sileer. Ra aura ei leni ren chan chokewe esap wor ar tipis. 5 Ra pwal senätä rongen asor won ekewe leni tekia fän iten ewe anü Paal, pwe repwe keni nöür ät pwe ar asoren kek ngeni. Ei üsap allük ngeniir, esap pwal tolong lon ai ekiek. ✡Lif 18.21 6 Iei mine ngang ewe Samol mi Lapalap üa apasa: Epwe war ewe fansoun, pwe ei leni esap chüen iteni Tofet ika lemolun Hinom, ngei epwe le iteni lemolun Ninni. 7 Iwe, lon ei leni üpwe atai än chon Juta me chon Jerusalem akot. Üpwe föri pwe ekewe aramas repwe kuf ren chon oputer o mäla lon maun. Üpwe aochocha ngeni ekewe machang me ekewe manmwacho ekewe somä. 8 Üpwe ataela ei telinimw pwe epwe eu mettoch aramas repwe turunufasei. Meinisin mi pwerela ünükün repwe mairü o turunufasei pokiten ekewe feiengau meinisin ra tori. 9 Iwe, üpwe föri pwe repwe ochei fituken nöür kewe ät me nengin, repwe pwal en me ochei fituken chon arun. Ei epwe fis, lupwen chon oputer repwe pwelifeili ewe telinimw fän pisekin maun, nge ir repwe fokun riaföü pokiten ar ariaföüür o mochen nirela.’

10 Mürin, kopwe amökkü ewe pör me fän mesen ekewe mwän mi etuk 11 o üreniir, ‘Iei alon ewe Samol mi Unusen Manaman: Usun eman a amökkü eu pör mi för seni pwül, nge esap wor eman epwe tongeni achufengenisefäli, iei usun üpwe atai ei telinimw o afeiengaua ekei aramas. Iwe, aramas repwe peiaseni ekewe somä lon Tofet, pun esap chüen wor lenien peias ekis meinisin. 12 Iei usun mine üpwe föri ngeni ei leni, pwal ngeni chokewe mi imweimw lon. Üpwe föri pwe ei telinimw epwe usun chök Tofet. 13 Ekewe imw lon Jerusalem pwal imwen ekewe kingen Juta repwe limengau usun ewe leni Tofet, fokun ekewe imw meinisin aramas ra keni apach mi pwokus wor ngeni ekewe fün läng, ra pwal ninätiu asoren ün ngeni pwal ekoch kot.’ ”

14 Mürin, Jeremaia a liwinto seni Tofet, ewe ia ewe Samol mi Lapalap a tinala ie pwe epwe osuni. Iwe, a ütä lon ewe leni lükün imwen ewe Samol mi Lapalap o üreni ekewe aramas meinisin, 15 “Iei alon ewe Samol mi Unusen Manaman ewe Koten Israel: Üpwe awarato won ei telinimw, pwal won ekewe telinimw ünükün ekewe feiengau meinisin üa fen apwüngala fän iter, pun chon ekei telinimw ra ülöförea, resap mochen aüselinga ai kewe kapas.”