1 Ai Samol mi Lapalap, lupwen üa uwato ai osukosuk fän mesom,

a pwä pwe en ka pwüng.

Nge iei üa mochen pwe sipwe kakapasfengen won pwüngün kapwüng.

Pwota ekewe aramasangau ra pisekisekila?

Pwota chokewe meinisin resap allükülük ra fefeitä?

2 Ka fotukiretiu, iwe, a tö warer.

Ra mämäritä o ua.

Ra föüni itom lon awer,

nge leluker a toau senuk.

3 Nge en ai Samol mi Lapalap, ka sileei,

ka künaei

o sotuni ai ekiek ngonuk.

Kopwe nukiela ekewe aramasangau usun sip ra nukunuk ngeni ar repwe ninnila,

kopwe aimwürela fän iten ewe ränin ninnila.

4 Ifa ükükün fansoun än ewe fanü epwe pwasapwas,

nge fetilin lon iteiten mälämäl epwe pwasala?

Ekewe man me mansüsü ra ärela

pokiten ekewe aramas mi nom lon ewe fanü ra föföringau,

ir ekewe aramas mi apasa, “Kot esap küna mine sa föri.”

5 Iwe, ewe Samol mi Lapalap a pälüeni,

“Are ka kitir ngeni aramas, nge ka malülü ren,

ifa usun om kopwe kitir ngeni oris?

Are ka chepetek me lon eu leni mi öch,

met kopwe föri me lein ewe wöllap ünükün ewe chanpupu Jortan?

6 Pun püsin pwiüm kewe me chon leimwen semom ra afangamääk,

ra tapweruk nge puchör.

Kosap lüküür, inamwo ika ra kapas pwetete ngonuk.”

7 Iwe, ewe Samol mi Lapalap a üra,

“Ngang üa likitala ekewe chon Israel

o pöütala nei aramas.

Üa asechala chokewe üa echeniir lepöün chon oputer.

8 Püsin nei aramas ra ü ngeniei,

ra wörüwör ngeniei

usun eman laion lein wöllap,

iei mine üa oput ir.

9 Nei aramas ra wewe ngeni eman machang mi tiketik,

nge ekewe machang mi mwacho ra feito seni ekis meinisin o fiu ngeni.

Kopwe feila o achufengeni ekewe manmwacho meinisin

pwe repwe feito o ochoch.

10 Chomong chon mas ra atai ai tanipin wain,

ra purätiu fanüei.

Ra föri pwe fanüei mi mürina a wiliti eu fanüapö.

11 Ra awili ngeni eu fanüapö,

a pöön o pwasapwas me fän mesei.

Unusen ewe fanü a pö,

nge esap wor eman a ekieki usun.

12 Ekewe chon kata ra feito won ungen ekewe chuk meinisin me lon ewe fanüapö.

Üa awarato maun pwe unusen ewe fanü a tala ren.

Esap wor eman aramas epwe kinamwe.

13 Ra amwora föün wiich, nge ra kini iräfölüföl,

ra olusumwäliir le angang, nge esap wor lomotan.

Repwe säw ren mine ra kini

pokiten ai song mi watte.”

14 Iwe, ewe Samol mi Lapalap a apasa, “Mi wor mine üa mochen apasa fän äsengesin chon arun Israel mi atai ewe fanü üa ngeni nei aramasen Israel pwe fanüer. Ngang üpwe ütti ekei aramasangau seni fanüer, usun eman a üttätä efoch irä. Nge üpwe amanaua chon Juta seni lepöür. 15 Nge mürin ai üttiretä, üpwe pwal tongeesefäliir o aliwiniir ngeni en me fanüan, pwal en me lenian. 16 Iwe, are repwe etiwa än nei aramas lamalam ren unusen leluker o eäni akapel, ‘Mwo manauen ewe Samol mi Lapalap,’ usun ra aiti ngeni nei aramas pwe repwe eäni akapel iten Paal, mürin repwe fefeitä me lein nei aramas. 17 Nge are chon eu mwü resap mochen aleasochis, mürin üpwe fokun üttiretä o aroserela. Ngang ewe Samol mi Lapalap üa kapas.”

<- JEREMAIA 11JEREMAIA 13 ->