1 Pwal iei alon ewe Samol mi Lapalap, “Läng ai lenien mot, nge fanüfan lenien puun pechei. Met sokun imw oupwe aüetä fän itei are ifa lenien ai asösö? ✡Mat 5.34; 23.22; Mat 5.35; Föf 7.49-50 2 Pun pei a föri ekei mettoch meinisin, iei mine ir meinisin nemeniei.” Pwal iei alon ewe Samol mi Lapalap, “Ngang üpwe chök aücheani eman aramas mi tipetekison o luketatakis, pwal eman mi niuokusiti ai kapas o aleasochis ngeni.
3 Nge eman mi niela eman kow fän iten asor, nge esap föri letipei, a usun chök eman mi niela eman aramas. Eman mi eäni asor eman sip a usun chök eman mi niela eman kolak. Iwe, eman mi uwato asoren mongö a usun chök eman mi eäni asor chan pik, nge eman mi keni apach mi pwokus a usun chök eman mi fel ngeni uluulun anümwäl. Iwe, ekana sokun aramas ra chök püsin filätä letiper, nge leluker a pwapwaiti ar föför mi anioput. 4 Iei mine ngang üa pwal filätä ai üpwe ariaföüür o atoto wor mine ra niuokusiti. Pun esap wor eman a pälüeniei, lupwen üa kökkö, esap pwal wor eman a aüselingaei, lupwen üa kapas. Nge ra chök föri mine a ngau fän mesei o filätä mine üsap pwapwaiti.” 5 Oupwe rongorong alon ewe Samol mi Lapalap, ämi mi niuokusiti o aleasochisi an kapas, “Pokiten ämi allükülük ngeniei, ekoch lein pwimi ra oputakemi o asükemiila. Ra esitakemi o apasa, ‘Ewe Samol mi Lapalap epwe fokun pwärawu an ling o amanauakemi pwe aipwe küna ämi pwapwa.’ Nge fokun ir repwe küna säw.”
6 Oupwe aüseling! Mi wor akürang me lon ewe telinimw, pwal miiniinin mwelien eman seni lon ewe imwenfel. Iei mwelien ewe Samol mi lapalap a ngeni chon oputa liwinin ar föföringau. 7 “Sion a wewe ngeni eman fefin a nöünöüla, nge esamwo tori an cheuchen fam. A nöüni eman ät mwen esamwo tori an metekin nöünöü. ✡Pwär 12.5 8 Iö a rongorong ei sokun pworaus? Iö a küna ekei sokun mettoch? Ifa usun, eu fanü a tongeni masou ren aramas lon eu chök rän? Ika ifa usun, eu mwü epwe tongeni fis lon fansoun mochomoch? Pun lupwen a tori Sion an cheuchen fam, a fen nöüni nöün kana. 9 Ifa usun, üpwe föri pwe epwe tori fansoun än nei aramas repwe uputiu, nge üsap mwüt ngeniir ar repwe uputiu? Ifa usun, ngang ewe chon aupup üpwe pinei pwe esap fis nöünöü? Iei alon ewe Samol mi Lapalap ämi we Kot.
12 Iei alon ewe Samol mi Lapalap, “Üpwe apupuolong kinamwe lon Jerusalem usun chök eu chanpupu, pwal wöün ekewe mwün fanüfan usun chök öütöüten lon öüwö. Iwe, Jerusalem epwe aoupukemi, epwe ämmwakemi o apwapwakemi won afön. 13 Usun eman inelap a achipa nöün, iei usun ngang üpwe achipakemi. Iwe, oupwe küna chip lon Jerusalem. 14 Lupwen oupwe küna mine a fis lon Jerusalem, letipemi epwe meseik, nge inisimi epwe öümanau usun fetil mi pwüküfö. Mürin, epwe pwä pwe ngang ewe Samol mi Lapalap üa alisi nei chon angang, nge üa song ngeni chon oputaei.”
15 Nengeni, ewe Samol mi Lapalap epwe feito lon ekkei won wan woken mi usun chök mölümöl. Epwe apwönüetä an song mi fokun pöchökül me an apwüng mi usun chök pulopulen ekkei. 16 Iwe, ewe Samol mi Lapalap epwe apwüngü aramas meinisin ren nöün ketilas me ekkei, nge chokewe mi küna ninnila me ren repwe chomong.
17 Iwe, iei alon ewe Samol mi Lapalap, “Chokana mi apiniir o limetiir pwe repwe fel ngeni anümwäl lon ekewe tanipi o tapwela mürin ewe souasor mi angang ngeniir, pwal chokana mi ochei fituken pik me lakich me sokun man mi anioput repwe mäfeiengau ir meinisin.
18 Iwe, pokiten üa silei ar föför me ar ekiek, üpwe feito o achufengeni chon ekewe mwü meinisin. Repwe feito o nenengeni ai ling. 19 Iwe, üpwe aürätä eu asisil lefiler. Üpwe tinala ekoch mi chüen manau me leir ngeni ekewe mwün fanüfan, ngeni Tarsis me chon Lipia me chon Litia, ir ätekewe mi föükus le likapich, ngeni Tupal me Kriis, pwal ngeni ekewe fanüen lematau resamwo rongorong iteüöchi ika küna lingei. Iwe, repwe pwärätä ai ling lein chon ekewe mwün fanüfan. 20 Iwe, repwe uwato pwimi kewe seni mwün fanüfan meinisin, pwe eu lifang ngeniei. Repwe uweereto won chuki mi pin lon Jerusalem won oris me woken, won lenien keki, pwal won aas me kamel, usun chon Israel ra uwato ar asoren mongö lon sepi mi limöch lon imwei mi pin. 21 Nge üpwe filätä ekoch me leir, pwe repwe souasor me aramasen Lefi,” iei alon ewe Samol mi Lapalap.
22 “Pun usun föriei we läng mi fö me ewe fanüfan mi fö repwe nonom fochofoch fän mesei, iei usun mwirimwirimi kana me itemi repwe nonom fochofoch. ✡Ais 65.17; 2.Pet 3.13; Pwär 21.1 23 Iwe, iteiten popun maram me iteiten ränin sapat aramasen fanüfan meinisin repwe feito fän mesei o fel ngeniei lon Jerusalem,” iei alon ewe Samol mi Lapalap. 24 “Iwe, lupwen repwe towu, repwe nengeni somän ekewe aramas mi ü ngeniei. Ekewe möttö mi eniir resap mäla, nge ewe ekkei mi keniir esap kunula. Iwe, aramas meinisin repwe nioputäsiniir.” ✡Mark 9.48
<- AISEA 65