IPRU 2

Usun ach küna manau mi fokun aüchea

2.1-4

1 Iei mine sipwe fokun kamwöchünük won ekewe kapas mi let sia fen rongorong, pwe sisap tokola seni. 2 Ekewe kapas, ekewe chon läng ra ngeni ach kewe lewo a pwä pwe ra let, nge are eman esap tümwünü ika aleasochis ngeni a angei liwiningauen an föför usun a fich ngeni. 3 Epwe ifa usun ach sipwe tongeni sü seni ach küna liwiningau are sisap aüseling ngeni ekewe kapas usun ach küna manau mi fokun aüchea. Ewe Samol a akomwen asile ngeni aramas usun ei küna manau, nge chokewe mi rongorong ngeni ra alletätä ngenikich pwe a let. 4 Lon ena chök fansoun Kot a apacha an kapasen pwärätä ngeni ar ren an föri asisil me manaman me sokopaten föför mi amwarar, pwal ren an aineti ekewe lifangen Ngünmifel usun mochenin letipan.

Ewe Eman mi emwenikich ngeni manau esemüch

2.5-18

5 Iwe, Kot esap awisa ngeni ekewe chon läng pwe repwe nemeni ewe fanüfan mi fö epwe fisitä, iei ewe fanüfan sia fen kapas usun. 6 Nge iei usun a mak lon eu kewe Toropwe mi Pin,

“Ai Kot, met aüchean aramas pwe ka ekieki usun,

nge met aüchean nöün aramas pwe ka tümwünü?

7 Ka föri pwe i epwe kis fän ekewe chon läng

lon fansoun mochomoch.

Ka ämwärämwära ngeni ling me iteüöch 8 o awisa pwe epwe nemeni mettoch meinisin.” A apasa pwe Kot a awisa ngeni aramas pwe epwe “nemeni mettoch meinisin”. Wewen ei, esap fokun wor och mine esap nonom fän nemenian. Iwe, lon ei fansoun kich sisap küna pwe mettoch meinisin ra nom fän nemenian. [a] 9 Nge sia küna Jesus, ewe Kot a föri pwe epwe kis fän ekewe chon läng lon fansoun mochomoch, pwe ren än Kot ümöümöch epwe mäla fänäsengesin aramas meinisin. Iwe, iei sia küna i, pwe a mwärini ling me iteüöch pokiten an riaföü me mäla. 10 A fokun pwüng pwe Kot, ewe mi föri o tümwünü mettoch meinisin, a föri pwe Jesus epwe unusöch ren an riaföü fän iten an epwe emwenato chomong nöün, pwe repwe eti i lon an ling. Pun Jesus ewe mi emweniir ngeni ar repwe küna manau.

11 Jesus a alimöchü aramas seni ar tipis, iwe, i me chokewe mi küna limöch ra semeni eman chök Sam. Iei popun Jesus esap säwäsini an aita ngeniir pwiin. 12 Iwe, a apasa ngeni Kot,

“Üpwe apworausa ngeni pwii kewe mine ka föri,

üpwe mwareituk lein ewe mwichen aramas.” [b]

13 A pwal apasa, “Üpwe anomu ai apilükülük won Kot.” A pwal apasa, “Ngang üa nom ikei me ekewe nau Kot a ngeniei.” [c]

14 Pokiten ekei nau, ir aramas seni fituk me cha, püsin Jesus a wiliti aramas usun ir o sokuni sokur. A föri ei, pwe ren an mäla epwe atala manamanen Tefil a eäni nemenem won mäla. 15 Iwe, ren ei a angasala chokewe mi fötek lon unusen manauer pokiten ar niuokusiti mäla. 16 Pun a fat pwe esap alisi ekewe chon läng. Nge usun a mak lon ekewe Toropwe mi Pin, “A alisi ekewe mwirimwirin Apraham.” 17 Wewen ei, pwe epwe wiliti aramas usun pwiin kewe lon mettoch meinisin fän iten an epwe nöür Souasor mi Lap mi eäni tong o allükülük lon an angang ngeni Kot, pwe än ekewe aramas tipis epwe musala. 18 Iwe, iei a tongeni alisi chokewe mi tolong lon sosot, pun püsin i a fen piin tolong lon sosot me riaföü.

<- IPRU 1 IPRU 3 ->