1 Iwe, ewe Samol mi Lapalap a kapas ngeniei, 2 “Nöün aramas, iei aloi ngang Kot ewe Samol mi Lapalap ngeni ewe fanü Israel: A tori sopolan. A tori sopolan unusen ewe fanü. 3 Israel, iei a tori sopolom. Iei üpwe fokun song ngonuk, pun üpwe apwünguk won ükükün om föför, üpwe pwal liwini ngonuk liwinin om föför mi anioput. 4 Iwe, üsap chüen achikok, üsap pwal chüen tongeek. Üpwe liwini ngonuk liwinin om föför mi anioput ka chök sopwela le föri. Ren ei kopwe silei pwe ngang ewe Samol mi Lapalap.”

5 Iei alon Kot ewe Samol mi Lapalap, “Feiengau epwe war, feiengau epwe chök afawun. 6 A tori sopolan, a tori sopolan. Nengeni, a wareituk sopolom. 7 Feiengau epwe torikemi aramasen ei fanü. A tori ewe fansoun, a pwal arap ewe rän, eu ränin osukosuk, nge sap eu ränin mweireir me won ekewe chuk. 8 Iei a arap ai üpwe awarato ai lingeringer womw o amüchü ai song ngonuk. Üpwe apwünguk won ükükün om föför o liwini ngonuk liwinin om föför mi anioput. 9 Iwe, üsap chüen achikok, üsap pwal chüen tongeek. Üpwe liwini ngonuk liwinin om föför mi anioput ka chök sopwela le föri. Ren ei kopwe silei pwe ngang ewe Samol mi Lapalap, ewe mi afeiengauok.”

10 Ewe rän a war. Feiengau a feito womw. Pwüngingau a pwükütä, nge lamalamtekia a fokun wattela. 11 Föförün mwänewüs a mämäritä o afisätä föföringau. Ekewe aramas meinisin repwe rosola, esap pwal chüen wor wöür mi somwola me ar ling. 12 Iwe, a tori fansoun, a pwal arap ewe rän. Esap wor popun än ewe chon kamö epwe pwapwa ika ewe chon amömö epwe lolilen, pun Kot a song ngeniir meinisin. 13 Iwe, ewe chon amömö fanü esap chüen tongeni liwin ngeni mine a amömöla. Inamwo ika a chüen manau, pun än Kot song a nonom wor meinisin, nge esap sü seniir. Iwe, pokiten ar tipis esap wor eman a tongeni amanaua manauan.

14 Iwe, ra ettiki rappwa o amolätä meinisin. Nge esap wor eman a feila maun, pun Kot a song ngeniir meinisin. 15 Maun a fis won ekewe al, nge mätter me lengita ra fis lon ekewe imw. Ir mi nom lemäl repwe mäla lon maun, nge ir mi nom lon ewe telinimw repwe mäla ren lengita me mätter. 16 Iwe, chokewe meinisin mi chüen manau repwe süla won ekewe chuk usun chök lisom mi ässitä seni ekewe lemol pokiten ar niuokus. Repwe ngüngüres pokiten ar tipis. 17 Pöür meinisin repwe chök ititiu, nge lepwäsukur meinisin repwe chechech. 18 Iwe, repwe üföüf üf seni tuk, nge niuokus watte epwe nom rer. Won meser epwe wowon säw, mökürer epwe pwal reipöpöla. 19 Repwe moneela ar silifer me kolt won ekewe al, usun mettoch mi limengau. Pun ar silifer me kolt resap tongeni amanaueer lon ränin än ewe Samol mi Lapalap song, resap pwal tongeni aura luker o amötüür lon ar echik. Pun ar echeni silifer me kolt iei popun ar tipis. 20 Me lom ra sikesik ren fouter seni kolt mi aüchea. Ra pwal aea ekewe kolt o föri ar kewe uluulun anümwäl mi anioput. Iei mine ewe Samol mi Lapalap a anioputa ekewe mettoch me rer. 21 Iwe, ewe Samol mi Lapalap a apasa, “Üpwe mwüt ngeni chon ekis pwe repwe liapenala ekewe mettoch, nge chon föföringau won fanüfan repwe angei wöür meinisin o turunufaseer. 22 Üpwe kul seniir, nge chon ekis repwe atai pinin imwei mi pin o aüchea. Chon solä repwe tolong lon o turunufasei.

23 Kopwe amolätä selimächä, pun ewe fanü a uren föförün nimanau, nge ewe telinimw a uren föförün mwänewüs. 24 Üpwe awarato chon ekewe mwü mi ngau seni meinisin, pwe repwe imweni imwer kana. Üpwe awesi än ekewe chon pwora lamalamtekia, nge ar kewe leni mi pin repwe küna turunufas. 25 Lupwen niuokus watte epwe toriir, repwe kütta kinamwe, nge resap fokun küna. 26 Feiengau epwe war, feiengau epwe chök afawun, nge epwe chök wor pworausen afeiengau. Iwe, repwe tüngor ngeni soufos pwe repwe osuni ngeniir. Ekewe souasor resap chüen aiti ngeniir ekewe allük, ekewe souakom esap chüen wor ar öüröür. 27 Ewe king epwe letipeta, ewe samol epwe apilükülükingau, nge aramasen ewe fanü repwe chechech ren ar niuokus. Üpwe liwini ngeniir ükükün liwinin ar föför, üpwe pwal apwüngüür won ewe aükük ir ra püsin eäni apwüng won. Ren ei repwe silei pwe ngang ewe Samol mi Lapalap.”