1 Mürin, ewe mwän a emwenieila ren ewe asamalap mi sape ngeni ötiu. 2 Ikenan üa küna lingen ewe Koten Israel, a feito seni ötiu. Iwe, üngüngün an feito a usun chök üngüngün nonoon lematau, nge won fanü a saramaram ren lingan. ✡10.3-4,18-19; 11.22-23; Pwär 1.15 3 Iwe, künaei ei me ren Kot a usun chök künaei we üa küna, lupwen Kot a feito pwe epwe ataela ewe telinimw Jerusalem, pwal usun chök künaei we üa küna me arun ewe chanpupu Kepar. Iwe, üa chapetiu lepwül. 4 Nge lingen ewe Samol mi Lapalap a tolong lon ewe asamalap mi sape ngeni ötiu o tolong lon ewe Imwenfel. 5 Mürin, Ngünün Kot a ekieitä o uweeila lon ewe leni mwen Imwenfel, nge lingen ewe Samol mi Lapalap a aurala lon ewe Imwenfel.

6 Iwe, üa rongorong mwelien eman a fos ngeniei seni lon ewe Imwenfel, nge ewe mwän mi eäni ewe angangen aükük a chüen ütä ünüki. 7 Iwe, a üreniei, “Nöün aramas, ei leni ai lenien motun king me lenien puun pechei. Ikei ie üpwe imweimw lein aramasen Israel tori feilfeilachök, nge chon Israel me ar king resap chüen aitengaua itei mi pin ren ar angang ngeni anümwäl, pwal ren somän ar king, lupwen ra peiaseniir. 8 Iwe, ekewe king ra aüetä imwer lükün imwei, pwe asamalapen imwer me penkasamer ra arap ngeni asamalapen imwei me penkasaman, pwe eu chök tit a refi lefilei me ir. Iwe, ra aitengaua itei mi pin ren ar föför mi anioput. Iei mine üa aroserela fän ai song. 9 Iei repwe ükütiu seni ar angang ngeni anümwäl o atoauala seniei somän ar king. Mürin, ngang üpwe imweimw lefiler tori feilfeilachök.”

10 Iwe, ewe Samol mi Lapalap a üreniei, “Nöün aramas, kopwe aiti ngeni chon Israel lapalapen ei Imwenfel me liosun, pwe repwe säw ren ar tipis. 11 Mürin, are ra säw ren ar föför meinisin, kopwe aiti ngeniir lapalapen ei Imwenfel me liosun, pwal an lenien tolong me towu me akotan meinisin, kopwe pwal asile ngeniir pwüngün me allükün. Iwe, kopwe makei ekei mettoch me mwer, pwe repwe küna ei lios o apwönüetä ekewe allük meinisin. 12 Nge iei allükün ei Imwenfel: Unusen lenian me won ungen ewe chuk epwe unusen pin. Iei allükün ei Imwenfel.

13 Iwe, iei ükükün ewe rongen asor, lupwen ewe mwän a aükü ren ewe wokun aükük a fen aea le aükü ewe Imwenfel: Tekian longolongun ewe rongen asor ükükün rüe inis, chööchön won ililin pwal rüe inis, nge tekian repenin mi nom pwelin ünükün ükükün engol inis. 14 Tekian ewe aruuen kinikin fan seni won longolongun mi nom won pwül tori ililin ükükün rüanü fiit, nge chööchön won ililin ükükün rüe inis. Iwe, tekian ewe aülüngatin kinikin mürin seni won ililin fan tori ililin won ükükün fisu fiit, nge chööchön won ililin ükükün rüe inis.

15 Iwe, tekian ewe kinikin ia a nom ie ewe lenien ekkei ükükün fisu fiit, nge tekian mächän lepwokukun me rüanü ükükün rüe inis. 16 Iwe, langatamen ewe lenien ekkei me chölapan ra wewefengen ükükün rüe fiit. 17 Iwe, langatamen ililin ewe kinikin lukalapan me rüanü pekin ra pwal wewefengen ükükün rüe me rüanü fiit, tekian ewe repen mi nom pwelin ünükün engol inis, nge chööchön won ililin ewe longolong rüe inis. Iwe, latön ewe rongen asor a sape ngeni ötiu.” ✡Eks 27.1-2; 2.Kron 4.1

18 Mürin, Kot a üreniei, “Nöün aramas, iei aloi ngang Kot ewe Samol mi Lapalap, ‘Iei pwüngün angangen ewe rongen asor: Lupwen ei rongen asor a wes me kaü, epwe fis asoren kek won me äsupu ngeni chan ekewe mönün asor. 19 Lon ewe rän kopwe angei eman nienifön ätemwänin kow o ngeni ekewe souasor seni ewe ainangen Lefi, ir mwirimwirin Satok mi feito rei pwe repwe angang ngeniei. Ngang Kot ewe Samol mi Lapalap üa kapas. Iwe, repwe eäni asor ei ätemwänin kow fän iten asoren amusamusen tipis. 20 Nge en kopwe angei ekis seni chan o toofi ngeni ekewe rüanü mächän lepwokukun ewe rongen asor, kopwe pwal toofi ngeni lepwokukun ililin me rüanü, pwal won repenin mi nom pwelin ünükün. Iei usun kopwe limeti ewe rongen asor ren ewe asoren limelim. 21 Mürin kopwe angei ewe ätemwänin kow fän iten asoren amusamusen tipis o kenala lon ewe leni mi fil fän iten ei angang, a nom lükün ewe Imwenfel. 22 Iwe, lon aruuen rän kopwe eäni asoren limelim eman ätemwänin kuuch esap wor terin, pwe ewe rongen asor epwe limöch ren, usun a pwal limöch ren ewe ätemwänin kow. 23 Lupwen kopwe wes me limeti ewe rongen asor, kopwe angei eman nienifön ätemwänin kow me eman ätemwänin sip esap wor terir, pwe kopwe eäniir asor. 24 Kopwe uweereto rei, nge ekewe souasor repwe amwora salt wor o eäniir asoren kek ngeniei. 25 Lon eu me eu rän lon ükükün fisu rän kopwe eäni asoren amusamusen tipis eman ätemwänin kuuch, eman ätemwänin kow me eman ätemwänin sip esap wor terir. 26 Iwe, lon ükükün fisu rän ekewe souasor repwe limeti ewe rongen asor ren asoren limelim, pwe epwe pin ren. 27 Nge wesin ekewe rän, lon ewe awaluen rän, ekewe souasor repwe popuetä le eäni ämi asoren kek me ämi asoren kilisou won ewe rongen asor. Mürin ngang üpwe etiwakemi fän ümöümöch. Ngang Kot ewe Samol mi Lapalap üa kapas.” ✡Eks 29.35-37