1 Mürin, ewe mwän a emwenieilong lon ewe Imwenfel o aükü üran. Iwe, ükükün öün ekewe ür me rüepek engol fiit. 2 Iwe, chölapen ewe asamalap ükükün engol me walu fiit, nge malulun etippen lepekin me ruu ükükün walu fiit. Mürin a aükü langatamen lon ewe Imwenfel ükükün wone me walu fiit, nge chölapan ilik me rüanü fiit. 3 Mürin a tolong lon ewe rum mi nom lesopun ewe Imwenfel o aükü öün üren asamalapan ükükün ülüngat fiit, a pwal aükü chölapen lon ewe asamalap ükükün engol fiit, nge malulun etippen lepekin me ruu ükükün engol me ruu fiit. 4 Iwe, a aükü ewe rum mi nom lesopun ewe Imwenfel ükükün langatamen me chölapen epek ilik me rüanü fiit. Iwe, a üreniei, “Iei ewe leni mi unusen pin.”

5 Mürin, ewe mwän a aükü chööchön won etippen ewe Imwenfel ükükün engol fiit. A pwal aükü ekewe rum mi nom lon ewe pwalang mi nom pwelin ünükün ewe Imwenfel, iwe, chölapen ekewe rum ükükün fisu fiit. 6 A pwal wor ülüngat sässärin pwalangen ewe Imwenfel, nge lon iteiten sässär a wor ilik rum mi pachefengen. Iwe, mi wor along mi iti seni etippen lepekin ewe Imwenfel, pwe irälapen ekewe rum ra nom won ekewe along, nge resap tolong lon etippen ewe Imwenfel. 7 Iwe, chölapen ekewe rumwen won a watte seni chölapen ekewe rumwen fan, pun malulun etippen ewe Imwenfel a kisikisila me asan. Iwe, lepekin ewe Imwenfel eu latö a feitä seni sässärin ekewe rumwen fan tori sässärin lukalapan, pwal tori sässarin won. 8 Üa pwal küna eu lenien fetal mi ekis tekia, a för seni fau o nom pwelin ewe Imwenfel, nge a fiti longolongun ekewe rum, tekian ükükün langatamen ewe wokun aükük ika engol fiit. 9 Iwe, chööchön won etippen ekewe rum me lükün ükükün walu fiit, nge chölapen ewe lenien fetal ünükün ekewe rum ükükün walu fiit. 10 Iwe, chölapen ewe leni lefilen longolongun Imwenfel me ekewe rumwen souasor ükükün ilik me rüanü fiit ekis meinisin. 11 Nge asamalapen ekewe rumwen pwalangen ewe Imwenfel ra sape ngeni ewe lenien fetal, eu ngeni efeng, eu ngeni ör, nge chölapen ewe lenien fetal lükün ekewe rum ükükün walu fiit ekis meinisin.

12 Iwe, a wor eu imw mi nom lotoun ewe lenien Imwenfel, chölapan ükükün ipükü engol me wonu fiit, langataman ükükün ipükü lime fiit, nge chööchön etippan ükükün tiu fiit pwelin ünükün.

13 Mürin, ewe mwän a aükü ewe Imwenfel me lükün ükükün ipükü wone me walu fiit. Iwe, langatamen ewe leni me ewe imw mi nom lotou fiti etippan ükükün ipükü wone me walu fiit. 14 Nge chölapen fän mesen ewe Imwenfel me ewe leni ünükün mi sape ngeni ötiu ükükün ipükü wone me walu fiit. 15 Iwe, a pwal aükü langatamen ewe imw mi nom lotoun ewe leni lükün Imwenfel fiti pwalangan me rüepek ükükün ipükü wone me walu fiit.

Iwe, etippen lon ewe Imwenfel me kengkangan, pwal etippen lon ewe rum mi unusen pin 16 ra cheech ngeni pap mi mürina, a pwal wor asammwachor mi tit ngeni mächä. Ekewe etippen lon ewe Imwenfel meinisin ra cheech ngeni pap seni fan tori ekewe asammwacho mi tit ngeni mächä. 17 Iwe, etippen lon ewe Imwenfel tori asen asamalapan, pwal etippen ewe rum mi unusen pin me ewe kengkang ra kula ren lios mi rup, 18 nge ekewe lios ra liosun kerop me ewe irä palm. Iwe, lefilen liosun akaruoman kerop a wor liosun efoch irä palm, nge iteiten kerop a wor ruu won mesan. 19 Eu won mesan mi sape ngeni ewe irä palm me epek a liosun won mesen eman aramas, nge eu won mesan mi sape ngeni ewe irä palm me pwal epek a liosun won mesen eman laion. Iwe etippen lon ewe Imwenfel meinisin a kula ren lios mi rup, 20 pwe a wor liosun kerop me irä palm seni fän etippan tori asen asamalapan.

21 Iwe, chölapen me langatamen penkasamen lon ewe Imwenfel ra wewefengen. Iwe, fän mesen ewe rum mi unusen pin a wor och mettoch mi wewe ngeni 22 eu rongen asor seni mwüch ükükün tekian limu fiit, nge langataman me chölapan ruanü fiit. Lepwokukun pwal longolongun me lepekin ra för seni mwüch. Iwe, ewe mwän a üreniei, “Iei ewe chepel a nom fän mesen ewe Samol mi Lapalap.” 23 Iwe, a wor eu asamalapen ewe Imwenfel me eu asamalapen ewe rum mi unusen pin, 24 nge iteiten ekewe asamalap a wor akaruu asaman mi tufichin suk me kapüng. 25 Iwe, me won asamalapen lon Imwenfel a rup liosun kerop me irä palm usun chök me won ekewe etip. Nge fän mesen kengkangen Imwenfel a wor eu siis seni mwüch. 26 Iwe, won etippen ewe kengkang me rüepek a wor asammwacho, a pwal rup liosun ewe irä palm lepekir me ruu.

<- ISIKIEL 40ISIKIEL 42 ->