1 “Ikkei ekewe allük kopwe aiti ngeni ekewe aramasen Israel: 2 Lupwen kopwe möni eman chon angang re Ipru, epwe angang ngonuk lon ükükün wonu ier, nge lon ewe afisuen ier epwe ngasala, nge esap mönätiu och. 3 Are a tolong lon an angang lon an lipich, epwe pwal towu lon an lipich. Iwe, are a tolong nge mi pwüpwülü, epwe pwal towufengen me pwülüan. 4 Iwe, are än ewe chon angang samol epwe ngeni eman pwülüan, nge a nöünöü ät me nengin me won, ewe fefin me nöün repwe nöün ewe samol, nge ewe mwän chök epwe feila. 5 Nge are ewe chon angang epwe apasa, ‘Üa tongei ai samol pwal pwülüei me nei, üsap mochen ngasala,’ 6 mürin, an we samol epwe emwenala lon imwenfel ren Kot. Epwe anomu lon ewe asamalap ika ren üren ewe asamalap o pwangeni selingan ngeni efoch pwangapwang. Mürin i epwe chon angang ngeni an we samol lon ränin manauan meinisin. ✡Lif 25.39-46
7 Iwe, lupwen eman aramas epwe amömöla nöün fefin pwe epwe chon angang, neminewe esap ngasala usun ekewe chon angang mwän. 8 Are an samol a ekiekin pwülüeni, nge mürin esap chüen efich, epwe mwütätä pwe eman epwe mönisefäli. Esap tufich an epwe amömöla ngeni chon ekis pokiten a kirikiringau ngeni. 9 Nge are ewe samol a filätä nöün chon angang fefin pwe kofotun nöün mwän, epwe tümwünü usun eman nöün fefin. 10 Iwe, are ewe samol epwe pwal pwülüeni eman me lükün nöün chon angang, esap tongeni akisätiu anan me üfan me an pwüngün pwüpwülü. 11 Nge are esap föri ngeni ekewe ülüngat mettoch, neminewe epwe ngasala, nge esap mönätiu och moni.”
12 “Iwe, eman mi wichi eman aramas pwe a mäla, epwe fokun ninnila. ✡Lif 24.17 13 Nge ika esap amolätä lon an ekiek an epwe niela ewe aramas, pwe a chök föri fän chechengau, epwe tongeni sü ngeni eu leni üpwe filätä fän itemi. ✡Num 35.10-34; Tut 19.1-13; Jos 20.1-9 14 Nge ika eman a ekiekietä lon lelukan pwe epwe nisoläi eman, ätewe kopwe ätekini seni ai rongen asor pwe epwe ninnila. 15 Eman mi wichi saman ika inan epwe ninnila.
16 Eman mi soläni eman aramas, inamwo ika a amömöla ika a chüen nom ren, nge lupwen a pwäla, epwe chök ninnila. ✡Tut 24.7
17 Eman mi otteki saman ika inan epwe ninnila. ✡Lif 20.9; Mat 15.4; Mark 7.10
18 Iwe, are mwän ra aninifengen, nge eman a wüsi ngeni eman eföü fau ika öfölü ngeni pöün, nge ätewe mi feiengau esap mäla, pwe a chök akonoson, 19 mürin, ika a pwätäsefäl o wokuukuni, ätewe mi wüsi esap chüen tipis. Nge epwe mönätiu liwinin fansoun an esap tongeni angang, pwal liwinin mine epwe pöchökülöch ren.
20 Iwe, are eman mwän a wichi nöün amanau mwän ika amanau fefin ren efoch wok pwe ewe amanau a mäla ren, ätewe epwe angei chappen an föför. 21 Nge ika ewe amanau epwe chüen manau eu ika ruu rän, ätewe mi wichi esap angei chappen an föför, pun ewe amanau ina nöün moni.
22 Iwe, are ekoch mwän ra fiufengen, nge eman leir a üngüri eman fefin mi pwopwo pwe a lus seni nöün, nge esap pwal fis feiengau me mürin, ätewe mi üngüri ewe fefin epwe püngütiu liwinin ükükün än pwülüen ewe fefin filätä, pwal ükükün mine ekewe soukapwüng repwe apwüngala. 23 Nge are epwe fis feiengau me mürin, kopwe liwini manau ngeni manau, 24 eföü mas ngeni eföü mas, efoch ngi ngeni efoch ngi, efoch pau ngeni efoch pau, efoch peche ngeni efoch peche, ✡Lif 24.19-20; Tut 19.21; Mat 5.38 25 eu kar ngeni eu kar, eu kinas ngeni eu kinas, me eu mwoochol ngeni eu mwoochol.
26 Iwe, are eman mwän a öfölü eföü mesen nöün amanau mwän ika amanau fefin, nge a chunela, ätewe epwe mwüt ngeni ewe amanau epwe ngasala, pwe ina liwinin mesan we mi feiengau. 27 Nge are ewe mwän a tülü ngin nöün amanau mwän ika amanau fefin, ätewe epwe mwüt ngeni ewe amanau epwe ngasala pwe ina liwinin ngin we mi tül.”
28 “Iwe, are eman ätemwänin kow a opura eman mwän ika eman fefin pwe a mäla, ewe ätemwänin kow epwe momon ngeni fau, nge esap wor eman epwe ochei fitukan. Nge mine nöün ewe ätemwänin kow esap tipis. 29 Iwe, ika ewe ätemwänin kow a fen örüni opuropur me mwan, nge ätewe mine nöün ewe kow a fen silei o esap föti, iwe, are epwe niela eman mwän ika eman fefin, ewe ätemwänin kow epwe momon ngeni fau, nge mine nöün ewe ätemwänin kow epwe pwal ninnila. 30 Nge ika a püngüla pwe ewe mi tipis epwe püngütiu penmanauan ren moni, epwe püngütiu ükükün mine a filitä fän iten mön manauan. 31 Iwe, are eman ätemwänin kow a opura nöün eman mwän ät ika nengin pwe a mäla, epwe chök fis ngeni pwüngün ewe allük me mwan. 32 Nge ika ewe ätemwänin kow a opura eman amanau mwän are amanau fefin pwe a mäla, ätewe mine nöün ewe ätemwänin kow epwe ngeni än ewe amanau samol ilik föün moni silifer *wewen 30 föün moni silifer ina epwe ükükün 9 chala, nge ewe ätemwänin kow epwe momon ngeni fau.
33 Iwe, are eman aramas a suki pwölüpwölün eu pwang ika tuw eu pwang, nge esap pwölü, pwe eman ätemwänin kow ika eman aas a turulong lon, 34 ewe än ewe pwang epwe liwini ewe man. Iwe, epwe liwini won moni ngeni mine nöün ewe man, nge ewe man mi mä epwe nöün.
35 Iwe, are nöün eman aramas ätemwänin kow a afeiengaua pwal nöün eman aramas kow, nge a mäla, repwe amömöla ewe ätemwänin kow mi chüen manau o inetifengeni liwinin. Nge fituken ewe man mi mäla repwe pwal inetifengeni. 36 Iwe, ika a pwä pwe a fen örüni opuropur me mwan, nge ätewe mine nöün esap föti, epwe möni ngeni ewe mine nöün ewe kow eman ätemwänin kow mi manau, nge ewe man mi mäla epwe nöün.”
<- EKISTOS 20EKISTOS 22 ->- ~7~ wewen 30 föün moni silifer ina epwe ükükün 9 chala
✡21:13: Num 35.10-34; Tut 19.1-13; Jos 20.1-9
✡21:17: Lif 20.9; Mat 15.4; Mark 7.10
✡21:24: Lif 24.19-20; Tut 19.21; Mat 5.38