1 Iwe, Setiro ewe souasor seni Mitian semen pwülüen Moses a rongorong meinisin mine Kot a föri fän iten Moses pwal fän iten nöün aramasen Israel, lupwen a emwenirewu seni Isip. 2 Lon ena fansoun Setiro a anomu Sipora pwülüen Moses, pun Moses a likiti ngeni 3 me nöün kewe ruoman ät. Iwe, iten eman Kersom, pun Moses a apasa, “Ngang eman chon siamü lon fanüen chon ekis.” ✡Eks 2.21-22; Föf 7.29 4 Nge iten pwal ewe eman Elieser, pun a apasa, “Än semei we Kot a alisiei o angasaei seni än Farao mochen nieila.” 5 Iwe, Setiro semen pwülüen Moses a feito fiti nöün Moses kewe me pwülüan we lon ewe fanüapö ia Moses a nom ie arap ngeni ewe chukun Kot. 6 Iwe, eman a asile ngeni Moses, “Setiro semen pwülüom we a war fiti pwülüom we me nöün kewe ruoman ät.” 7 Iei mine Moses a feila pwe epwe churi semen pwülüan we. Iwe, a pworotiu me mwan o mitiri, nge wesin ar akaisfengen usun pworauser, ra tolong lon imwen Moses imw mangaku. 8 Mürin, Moses a apworausa ngeni semen pwülüan we meinisin mine ewe Samol mi Lapalap a föri ngeni Farao me chon Isip meinisin, lupwen a angasa chon Israel. A pwal apworausa ngeni usun chomong weires a toriir lupwen ar sai, pwal usun än ewe Samol mi Lapalap amanaueer. 9 Iwe, Setiro a pwapwaäsini än ewe Samol mi Lapalap föför mürina meinisinn ngeni chon Israel, pwe a angaserewu seni fän nemenien ekewe chon Isip.

10 Iwe, Setiro a apasa, “Üpwe mwareiti ewe Samol mi Lapalap, a angasakemiiwu seni fän nemenien chon Isip, pwal seni lepöün Farao. 11 Iei üa silei pwe ewe Samol mi Lapalap a tekia seni ekewe kot meinisin, pun a angasa ekewe aramasen Israel seni lepöün chon Isip, lupwen ra turunufaseer.” 12 Mürin, Setiro semen pwülüen Moses a eäni asoren kek me sokun asor ngeni Kot, nge Aaron me ekewe souakomwen Israel ra feito pwe repwe mongöfengen me semen pwülüen Moses fän mesen Kot.

13 Iwe, sorotän ewe rän Moses a mot pwe epwe eäni kapwüngün ekewe aramas. Nge ekewe aramas ra ütä ünükün Moses seni lesosor tori lekuniol. 14 Iwe, lupwen semen pwülüen Moses a küna meinisin mine Moses a föri fän iten ekewe aramas, a aisini, “Met ei ka föri fän iten ekewe aramas? Pwota ka mot akaleman le eäni kapwüng, nge ekewe aramas ra ütä ünükum seni lesosor tori lekuniol?” 15 Iwe, Moses a üreni semen pwülüan we, “Ekewe aramas ra feito rei pwe üpwe kütta letipen Kot fän iter. 16 Lupwen ra fitikokofengen, ra feito rei pwe üpwe apwüngü lefilen eman me eman, üa pwal asile ngeniir än Kot allük me pwüüng.” 17 Mürin, semen pwülüen Moses a üreni, “Esap öch ngonuk mine ka föri. 18 En me ekewe aramas oupwe chök apwangapwangala, pun ei angang a kon chou ngonuk, kosap tongeni akaleman le föri. 19 Iei kopwe aüselinga aloi. Üpwe aiti ngonuk mefiei, nge Kot epwe etuk. En kopwe tupuni ekewe aramas fän mesen Kot le uwato ar fitikoko ren. 20 Kopwe pwal aiti ngeniir än Kot allük me pwüüng o afata ngeniir mine a pwüng ngeni manauer, pwal mine repwe föri. 21 Nge kopwe filätä me lein ekewe aramas mwän mi lipwäköch o meniniti Kot, ir mi wenechar o oput lifangen amichimich. Ekei sokun mwän kopwe seikiretä, pwe repwe nemenem won ngeröü me pükü, won lime me engol aramas. 22 Iwe, ir repwe eäni kapwüngün ekewe aramas fansoun meinisin. Iteiten fitikoko mi weires repwe uwato reöm, nge ekewe fitikoko mi kis repwe püsin apwüngü. Iei usun ewe angang epwe ekis mecheres ngonuk, nge ir repwe pwal mwärelong fän om weires. 23 Are kopwe föri ei, Kot epwe apöchökülok pwe kopwe tufichin sopwela ei angang. Iwe, ekei aramas meinisin repwe pwal liwiniti lenier fän kinamwe.”

24 Iwe, Moses a aüselinga alon semen pwülüan we o apwönüetä meinisin mine a üra. 25 A filätä mwän mi lipwäköch me lein chon Israel meinisin o seikiretä pwe repwe nemenem won ekewe aramas, won ngeröü me pükü, won lime me engol. 26 Iwe, ra eäni kapwüngün ekewe aramas fansoun meinisin. Ekewe fitikoko mi weires ra uwato ren Moses, nge ekewe fitikoko mi kis ra püsin apwüngü. 27 Mürin, Moses a afeilai semen pwülüan we pwe a liwiniti poputän fanüan.