1 Kopwe fangafangöch ngeni aramas, pun mürin chomong rän kopwe angei liwinin. 2 Kopwe inetifeseni woum ngeni chomong, pun kosap silei met sokun feiengau epwe toruk won fanüfan. 3 Lupwen kuchu ra ur ren koluk, epwe püng rän won fanüfan. Iwe, lupwen efoch irä epwe turu ngeni ör are efeng, epwe chök nonom won ewe leni ia a turula ie. 4 Eman mi chök nenengeni asepwäl me kuchu, nge esap angang, esap fis an fofot me kinikin. 5 Kosap tongeni silei ia asepwäl a enito me ie, kosap pwal tongeni silei usun fisin eman mönükol lon luken eman fefin mi pwopwo. Ina usun kosap tongeni silei än Kot angang, ewe mi föri mettoch meinisin. 6 Lesosor kopwe amorafeili föün irä, kopwe pwal amorafeili lekuniol. Pun kosap silei meni leir epwe märöch, ika repwe märöch meinisin. 7 Saram a mürina, a pwal öch ngeni mesen aramas ar repwe küna tinen akkar. 8 Iwe, eman aramas epwe chök pwapwa lon ränin manauan meinisin. Nge ese lifilifil ükükün tamen manauan, fansoun an nom lon mäla epwe tam seni. Iwe, meinisin mine epwe fis pön chök.

9 En alüal, kopwe pwapwa le alüalum, letipom epwe meseik lon fansoun om alüal. Kopwe chök föri mine letipom a tipeni o mesom a küna. Nge kopwe chechemeni pwe Kot epwe apwünguk ren om kewe föför meinisin. 10 Iei mine kopwe atoauala öürek seni letipom, kopwe pwal ti seni inisum mine a ngau. Pun lealüalum me lepöchökülom a pön chök.