1 “Iwe, lupwen ka tolong lon ewe fanü ewe Samol mi Lapalap om we Kot epwe ngonuk pwe kopwe fanüeni, lupwen ka pwal fafanü o nonom lon, 2 kopwe angei ekoch mwen ua ka kini seni uän ekewe irä meinisin mi mär lon pwül me won ewe fanü ewe Samol mi Lapalap epwe ngonuk, kopwe isenirelong lon eu chük o feila ngeni ewe leni ewe Samol mi Lapalap om we Kot epwe filätä pwe aramas repwe fel ngeni ie. ✡Eks 23.19 3 Iwe, kopwe feila ren ewe souasor mi wiseni ewe wis lon ewe fansoun o üreni, ‘Üa pwärätä ngeni ewe Samol mi Lapalap ai we Kot ikenai pwe üa tolong lon ewe fanü ewe Samol mi Lapalap a pwon fän akapel ngeni ai kewe lewo pwe epwe ngenikich.’ 4 Mürin, ewe souasor epwe angei ewe chük seni lepoum o iseis mwen ewe rongen asor än ewe Samol mi Lapalap om we Kot.

5 Iwe, mürin kopwe apasa ekei kapas me fän mesen ewe Samol mi Lapalap om we Kot, ‘Ai we lewo eman re Aramea mi siamüfetal, a feila Isip me an mwich mi kükün o nonom ikenan. Iwe, ikenan a wiliti eu mwü mi watte o pöchökül pwal chocho. 6 Nge ekewe chon Isip ra aweiresikich o ariaföüükich, ra pwal angangachoukich ren ar nöünikich amanau. 7 Mürin sa siö ngeni ewe Samol mi Lapalap än ach kewe lewo we Kot. Iwe, a rong mweliach o küna ach riaföü, ach angangachou me ach weires. 8 Iwe, ewe Samol mi Lapalap a emwenikichewu seni Isip ren pöün mi manaman o aköüpöü, fän eniweniu mi lapalap, pwal fän asisil me manaman. 9 A emwenikichelong lon ei leni o ngenikich ei fanü, eu fanü mi pwülüöch o fanüeräs. 10 Iei üa uwato mwen uän ewe pwül ewe Samol mi Lapalap a ngeniei.’ Mürin kopwe isetiu ewe chük mwen ewe Samol mi Lapalap om we Kot o fel ngeni. 11 Iwe, kopwe pwapwa ämi me chon ewe aingangen Lefi me ekewe chon ekis mi nom reöm ren ekewe mettoch meinisin mi mürina ewe Samol mi Lapalap om we Kot a ngenikemi me chon leimwom.

12 Iwe, kopwe uwätiu om eu leengol seni uän fotom irä meinisin iteiten mürin ülüngat ier o ngeni chon ewe aingangen Lefi, ngeni ekewe chon ekis, ekewe mi mäsen me ekewe fefin mi mä pwülüer, pwe repwe mongö o möt lon ar kewe telinimw. ✡Tut 14.28-29 13 Are ka wes me uwätiu, mürin kopwe apasa ekei kapas fän mesen ewe Samol mi Lapalap om we Kot, ‘Üa atowu me lon imwei ekewe eu leengol meinisin mi pin o ngeni chon ewe ainangen Lefi, ngeni ekewe chon ekis, ekewe mi mäsen me ekewe fefin mi mä pwülüer, usun ka allük ngeniei lon om kewe allük meinisin. Üsap purätiu eu lein om kewe allük, üsap pwal manlükirela.

14 Üsap mongö seni ewe eu leengol lupwen üa letipeta, üsap pwal amwökütü och seni lupwen üa limengau, ika eäni asor och seni ngeni somä. Üa aleasochisi alom, en ai Samol mi Lapalap, o föri meinisin mine ka allük ngeniei. 15 Kopwe netiu seni leniom mi pin, seni läng, o afeiöchü noum aramasen Israel, kopwe pwal afeiöchü ewe fanü ka ngenikem, usun ka fen pwon fän akapel ngeni äm kewe lewo, ewe fanü mi pwülüöch o fanüeräs.’

16 “Iwe, ikenai ewe Samol mi Lapalap ämi we Kot a allük ngenikemi ekei allük me pwüüng pwe oupwe aleasochisir. Iei mine oupwe tümwünüöchü le apwönüretä seni unusen lelukemi me unusen ngünümi. 17 Ämi oua pwärätä ikenai pwe ewe Samol mi Lapalap i ämi we Kot, oua pwal pwon pwe oupwe aleasochisi alon o apwönüetä an kewe allük me pwüüng. 18 Iwe, ewe Samol mi Lapalap a pwärätä usumi ikenai, pwe ämi eu mwichen aramas a wesewesen aücheani o nöüni, usun a fen pwon ngenikemi, nge ämi oupwe aleasochisi an kewe allük meinisin. ✡Eks 19.5; Tut 4.20; 7.6; 14.2; Tit 2.14; 1.Pet 2.9 19 Epwe seikikemiitä won ekewe mwü meinisin i a afisiretä, pwe aramas repwe mwareitikemi o aitöchükemi, repwe pwal alingakemi. Iwe, oupwe eu mwichen aramas mi pin fän iten ewe Samol mi Lapalap ämi we Kot, usun a fen pwon ngenikemi.”