1 Iwe, a fis pwe eman mwän mi aramasangau itan Sepa nöün Pikri we mwän seni ewe ainangen Peniamin a nom lon Kilkal. Ätei a ettiki ewe rappwa o üra, “Sisap eti Tafit, sisap chiechi ngeni nöün Jesi we mwän. Ämi re Israel, oupwe liwiniti en me imwan.” ✡1.King 12.16; 2.Kron 10.16 2 Iei mine ekewe re Israel ra likitala Tafit o tapwela mürin Sepa nöün Pikri we mwän. nge ekewe re Juta ra chök likitü le tapwela mürin ewe king seni ewe chanpupu Jortan tori Jerusalem. 3 Lupwen Tafit a tori imwan lon Jerusalem, a angei ülüpwülüan kewe engol, a likitirela pwe repwe tümwünü ewe imw o anomuur lon pwal eu imw fän tümwünüen chon mas. Iwe, ewe king a ngeniir alilisir, nge esap chök kon rer. Ra nonometiu lon ewe imw tori ränin ar mäla usun fefin mi mä pwülüer. ✡2.Sam 16.22

4 Mürin, ewe king a üreni Amasa, “Kopwe köri ekewe re Juta, pwe repwe mwicheto rei mürin ülüngat rän. Pwal en kopwe feito.” 5 Iei mine Amasa a feila pwe epwe körifengeni ekewe re Juta. Nge Amasa a mang seni ewe fansoun ewe king a aükü ngeni. 6 Iwe, ewe king a üreni Apisai, “Iei Sepa nöün Pikri we mwän epwe afeiengauakich lap seni Apsalom. Kopwe angei nei sounfiu o tapweri, pwe esap tolong lon ekewe telinimw mi wor tittir o sü senikich.” 7 Iei mine nöün Joap kewe sounfiu, ekewe chon Cheret me chon Pelet, pwal ekewe mwän mi pwora meinisin ra feiliwu seni Jerusalem fän nemenien Apisai pwe repwe tapweri Sepa nöün Pikri we mwän. 8 Lupwen ra tori ewe fau watte mi nom lon Kipeon, Amasa a churiir. Iwe, Joap a üföüf üfen sounfiu, a pwal fötätä won wänükün efoch pelit fiti nöün ketilas mi nom lon sittan. Nge lupwen a feil ngeni Amasa, nöün ketilas a turuwu seni sittan. 9 Iwe, Joap a üreni Amasa, “Ifa usum, pwii?” Mürin, Joap a amwöchü alusen Amasa won pöüifichin pwe epwe mitiri. 10 Nge Amasa esap afäli ewe ketilas mi nom lepöün Joap. Iwe, Joap a posu luken Amasa ngeni ewe ketilas pwe taran ra seliselitiu lepwül, nge esap posu fän ruu. Iwe, Amasa a mäla. Mürin, Joap me Apisai pwin we ra tapweri Sepa.

11 Nge eman lein nöün Joap kewe sounfiu a ütä ren Amasa o üra, “Io a tipeni Joap o peni Tafit epwe tapwela mürin Joap.” 12 Nge inisin Amasa a pwölüla ren chan me won ewe alelap. Iwe, eman me eman mi pwereto o küna Amasa a üla. Nge lupwen nöün Joap we sounfiu a küna pwe ekewe aramas meinisin ra üla, a uwala inisin Amasa seni ewe alelap ngeni ewe mälämäl o pwölüela ngeni echö üf. 13 Iwe, lupwen inisin Amasa esap chüen nom lon ewe alelap, ekewe aramas meinisin ra tapwela mürin Joap, pwe repwe tapweri Sepa.

14 Iwe, Sepa a feila lemenen fanüen ekewe ainangen Israel meinisin o tori ewe telinimw Apel Petmaka. Nge än Pikri we cho meinisin ra chufengen ren o tapweelong mürin lon ewe telinimw. 15 Iwe, ekewe sounfiu meinisin mi eti Joap ra feito o pweliela ewe telinimw Apel Petmaka ia Sepa a nom ie. Ra achukuchukätä pwül ünükün tittin ewe telinimw tori a apökü asen ewe tit me lükün, ra pwal tuw fän ewe tit pwe repwe aturätiu. 16 Mürin, eman fefin mi tipachem a köwu seni ewe telinimw, “Oupwe aüseling, oupwe aüseling! Oupwe üreni Joap epwe feito pwe üpwe kapas ngeni.” 17 Iwe, Joap a arap ngeni, nge ewe fefin a aisini, “Ifa usun, en Joap?” A pälüeni, “Ewer, ngang Joap.” Mürin, neminewe a üreni, “Kopwe aüseling ngeni aloi ngang noum chon angang fefin.” Joap a pälüeni, “Ngang üpwe aüseling.” 18 Mürin, ewe fefin a üra, “Mi wor eu kapasen lom ra kan üra, ‘Oupwe feila Apel o angei pälüen ämi kapas ais.’ Ren ei osukosuk a wesila. 19 Ai telinimw eu telinimw mi eäni kinamwe, a pwal allükülük me lon Israel. Nge iei ka mochen ataela eu telinimw mi wewe ngeni eman inelap me lon Israel. Pwota kopwe atatakisi mine än ewe Samol mi Lapalap?” 20 Nge Joap a pälüeni, “Apwi, ese fokun tufich me rei. Ese fokun tufich pwe üpwe atatakisi o ataela om ei telinimw. 21 Esap ina pwüngün äm ekiek. Nge eman mwän seni chukuchukutän ewe fanü Efraim itan Sepa nöün Pikri we mwän a ü ngeni ewe king Tafit. I chök oupwe fangewu, mürin üpwe liwin seni ei telinimw.” Iwe, ewe fefin a üreni Joap, “Nengeni, aipwe aturätiu möküran reöm me won ei tit.” 22 Mürin, ewe fefin a liwinla ren aramasen ewe telinimw meinisin o eäni kapas tipachem ngeniir. Iwe, ra pöküela üen Sepa o aturätiu möküran ren Joap. Joap a ettiki ewe rappwa, nge nöün kewe sounfiu ra säng seni ewe telinimw o liwiniti en me lenian. Nge Joap a liwiniti Jerusalem ren ewe king.

23 Iwe, Joap a nemeni unusen ewe mwichen sounfiun Israel, nge Penaia nöün Jehoiata we mwän a nemeni ekewe chon Cheret me chon Pelet. 24 Atoram a nemeni ewe mwichen chon angangen kinrosi, Jehosafat nöün Alihut we mwän i a soumak, 25 nge Sewa i a seketeri. Satok me Apiatar ir ra souasor, 26 nge Ira seni ewe telinimw Jair pwal eman nöün Tafit souasor.