1 Iwe, Samuel a üreni Saul, “Ewe Samol mi Lapalap a tinieito, pwe üpwe epituk pwe kopwe king won nöün aramasen Israel. Iei mine kopwe aüselinga alon ewe Samol mi Lapalap. ✡1.Sam 10.1 2 Iei alon ewe Samol mi Unusen Manaman, ‘Üpwe apwüngü ekewe chon Amalek pokiten ar kewe lewo ra ü ngeni chon Israel, lupwen ra towu seni Isip. ✡Eks 17.8; Tut 25.17-19 3 Iei kopwe feila, kopwe maun ngeni chon Amalek o wesewesen ataela meinisin mine ar. Kosap achikeer, nge kopwe niela mwän me fefin, semirit me ekewe mi chüen oupw, pwal nöür ätemwänin kow me sip, nöür kamel me aas.’ ”

4 Iei mine Saul a amwichafengeni ekewe sounfiu o aleani iteiter me lon Telaim. Iwe, iteiter ükükün rüepükü ngeröü sounfiun Israel mi fetal me engol ngeröü re Juta. 5 Iwe, lupwen Saul me nöün mwichen sounfiu ra tori ewe telinimwen chon Amalek, ra op o witiwit lon ewe lemol. 6 Nge Saul a üreni ekewe chon Ken, “Oupwe feila o towu seni lein ekewe chon Amalek, pwe üsap arosakemiila fitiir. Pun oua kirikiröch ngeni ekewe aramasen Israel meinisin, lupwen ra towu seni Isip.” Iei mine ekewe chon Ken ra towu seni lein ekewe chon Amalek. 7 Iwe, Saul a maun ngeni ekewe chon Amalek o akufuur seni Hawila tori Sur mi nom ötiuen Isip. 8 Iwe, a liapeni Akak ewe kingen chon Amalek, nge a chüen manau, a pwal fokun arosala ekewe aramas meinisin ren ketilas.

9 Nge Saul me ekewe aramas ra achika Akak, resap pwal niela ekewe sip me ätemwänin kow mi fokun öch, ekewe man mi öümanau me ekewe nienifön sip me meinisin mine a mürina. Nge meinisin mine esap nien mürina pwal meinisin mine a lomotongau ra fokun arosala.

10 Mürin, ewe Samol mi Lapalap a üreni Samuel, 11 “Üa lamalamala ren ai seikätä Saul pwe epwe king, pun a kul seniei o aleasolap ngeni ai kewe allük.” Iwe, Samuel a riaföü o siö ngeni ewe Samol mi Lapalap lon unusen ewe pwin. 12 Nge lesosorusich Samuel a pwätä pwe epwe churi Saul lon ewe soran. Iwe, Samuel a rong pwe Saul a feila Karmel o aüetä eföü föün achem fän itan pokiten an win. Mürin a feila Kilkal. 13 Iwe, Samuel a feila ren Saul, nge Saul a üreni, “Kopwe feiöch me ren ewe Samol mi Lapalap. Üa aleasochis ngeni än ewe Samol mi Lapalap allük.” 14 Nge Samuel a ais, “Pwota chök üa rongorong tikin sip me wörüwörün ätemwänin kow?” 15 Saul a üra, “Ekewe sounfiu ra uweereto seni ekewe chon Amalek. Pun ra achika ekewe sip me ätemwänin kow mi fokun öch, pwe repwe eäniir asor ngeni ewe Samol mi Lapalap om we Kot. Nge ekewe lusun äm aia fokun aroserela.” 16 Mürin, Samuel a üreni Saul, “Kopwe ükütiu le kapas! Ngang üpwe ürenuk mine ewe Samol mi Lapalap a eäni kapas ngeniei lepwinewe.” Saul a üreni, “Kopwe kapas.”

17 Iwe, Samuel a üra, “Lupwen ka ekieki usum pwe ka tekison, Kot a seikukutä won ekewe ainangen Israel. Ewe Samol mi Lapalap a epituk pwe kopwe king lon Israel. 18 A tinukela pwe kopwe fokun arosala ekewe chon Amalek mi tipis. A urenuk pwe kopwe maun ngeniir tori ka nirela meinisin. 19 Pwota kosap aleasochisi alon ewe Samol mi Lapalap? Pwota ka ürüng won mine ka liapeni o föri mine a ngau me fän mesen ewe Samol mi Lapalap?” 20 Nge Saul a üreni Samuel, “Ngang üa aleasochisi alon ewe Samol mi Lapalap. Üa feila ia a akünöüeila ie. Üa fokun arosala ekewe chon Amalek o emwenato Akak ar we king. 21 Nge ekewe sounfiu ra angei sip me ätemwänin kow mi fokun mürina seni mine ra liapeni, ekei man repwe ninnila, pun ra pin fän iten Kot. Ra uweereto pwe repwe eäniir asor ngeni ewe Samol mi Lapalap om we Kot me lon Kilkal.” 22 Mürin, Samuel a apasa, “Ifa usun, ewe Samol mi Lapalap epwe efich asoren kek me sokun asor usun an efich aleasochisi alon? Nengeni, aleasochis a mürina seni asor, nge aüseling a mürina seni ach eäni asor iwien ätemwänin sip. 23 Pun lükümach a wewe ngeni tipisin pwee, nge ülöförea a wewe ngeni föföringau me angangen anümwäl. Pokiten ka pöütala alon ewe Samol mi Lapalap, i a pwal pöütukela pwe kosap chüen king.”

24 Mürin, Saul a üreni Samuel, “Üa tipis ren ai purätiu än ewe Samol mi Lapalap allük pwal om kapas, pun üa niuokusiti ekewe aramas o aleasochisi alor. 25 Iei mine üa tüngor ngonuk, kopwe amusala ai tipis o etiei le liwinla Kilkal pwe üpwe fel ngeni ewe Samol mi Lapalap.” 26 Nge Samuel a üreni Saul, “Ngang üsap etuk le liwinla. Pun ka pöütala alon ewe Samol mi Lapalap, nge i a pöütukela pwe kosap chüen king lon Israel.” 27 Mürin, Samuel a kul pwe epwe feila, nge Saul a amwöchü lepwülün üfan owokot pwe a kam. 28 Iwe, Samuel a üreni, “Ewe Samol mi Lapalap a kamwei senuk mwün Israel ikenai o ngeni eman chon arum mi mürina senuk. ✡1.Sam 28.17; 1.King 11.30-31 29 Ewe mi Allükülük lon Israel esap chofana ika ekieksefäl, pun i esap eman aramas pwe epwe ekieksefäl.” 30 Mürin, Saul a apasa, “Üa tipis, nge kopwe chök pwäri om meninitiei iei me fän mesen ekewe souakomwen nei aramas me chon Israel meinisin. Kopwe etiei le liwinla pwe üpwe fel ngeni ewe Samol mi Lapalap om we Kot.” 31 Iei mine Samuel a eti Saul le liwinla Kilkal, nge Saul a fel ngeni ewe Samol mi Lapalap.

32 Mürin, Samuel a apasa, “Oupwe emwenato rei Akak ewe kingen chon Amalek.” Nge Akak a feito ren fän pwapwa, pun a ekieki, “Ellet, ewe weiresin mäla a wes.” 33 Nge Samuel a apasa, “Usun noum ketilas a niela nöün chomong inelap pwe esap chüen wor nöür, iei usun epwe pwal fis ngeni inom, pwe esap chüen wor nöün.” Iwe, Samuel a pökükisietiu Akak fän mesen ewe Samol mi Lapalap me lon Kilkal.

34 Mürin, Samuel a feila Rama. Nge Saul a feitä ngeni imwan mi nom lon Kipea, iei fanüan. 35 Samuel esap chüen künasefäli Saul tori ränin an mäla. Nge Samuel a letipeta usun Saul. Iwe, ewe Samol mi Lapalap a lamalamala ren an seikätä Saul pwe epwe king lon Israel.