LIJE'E SAN PABLO LOCUENA LINIȽ'EPOLA' LAPIMAYE LEFOT'ȽEPOȽTSI LIȽYA' TESALÓNICA

1 Illanc' ninPablo, Silvano y Timoteo aliniƚ'elhuo' imanc' unc'aƚpimaye olafot'ƚepoƚtsi liƚya' Tesalónica. Imanc' iƚxanuc' ȽanDios caƚ'Ailli' y ƚaƚPoujna Jesucristo. Iƚniya joupa epenufpolhuo'. 2 ȽanDios caƚ'Ailli' y ƚaƚPoujna Jesucristo titoc'itsolhuo', tipac'e'etsolhuo' loƚpicuejma'.

3 Aicalimenc'ecolhuo' imanc' loƚ'ejma'. Itine itine xonca toƚ'huaiyijnyi ȽanDios, itine itine xonca tonƚ'eyoƚtsi capic'a. Anuli anuli imanc' toƚta'a loƚ'ejma'. Toƚiya aƚs'najtsi'iyi ȽanDios, ticuicomma. 4 Maƚ'nujuaitsilhuo' toƚta'a loƚ'ejma' illanc' jouc'a aƚpalaicolhuo'. Maƚpalaic'ola' locuenaye lapimaye ƚefot'ƚepola' ȽanDios, lu'ila': “Laƚpimaye nomana' Tesalónica, mihuetsoquinnila' iƚne ti'hua tixnet'ƚyi. Tama titeƚcoyi ti'hua ti'huaiyijnyi ȽanDios, aimixospola'.” 5 Moƚsnet'ƚyi loƚteƚcopa, ȽanDios tilanc'e'elhuo' loƚpicuejma'. Tijouƚa' toƚtsulfoƚaita pe locuxeyopa iƚque. Toƚta'a timujyoxi ac'a lipicuejma' ȽanDios. Timujyoxi tixpic'e ma le'a al c'a.

6 Cacua: ȽanDios tixpic'e al c'a. Ti'ay ma le'a al ƚijca. Ti'najtse'e'mola' iƚniya noteƚ'mipolhuo' itsiya, titeƚ'mi'mola'. 7 Imanc' ituca' lo'iyacolhuo'. Itsiya toƚteƚcoyi, tijouƚa' tolunxajta. Ma' anuli lunxajta. Toƚta'a laƚ'iyaconga' litine ticuaiconanni ƚaƚPoujna Jesús. Jiƚpe litine timuj'moxi ƚaƚPoujna to qui'ic'. Iƚque ƚinca juaiconapa icueya limane, toƚiya ticuxela' lepaluc' quema'a. Iƚniya ƚaƚPoujna y lepaluc' timulcu. 8 Jiƚpe mimulumma tunaita ƚunga. Jiƚpe litine ti'e'ma al ƚijca. Titeƚ'mi'mola' nulemma iƚniya pe aimimetsaicoyi ȽanDios jouc'a pe aimihuejcoyi Lataiqui', iƚe litaiqui' ƚaƚPoujna Jesucristo. 9 Iƚne tepenuf'me liƚjunac'. Tecani'e'mola' nulemma. Aimitsulfoƚaiyacu pe lopa'a ƚaƚPoujna. Jiƚpe lomujyoyacoxi acueca' juaiconapa. Timuj'moxi ma' anDios. 10 Toƚta'a lo'iya litine ticuaiconanni ƚaƚPoujna. Jiƚpe litine timuj'moxi ma' anDios. Jouc'a aƚmuj'moƚtsi aƚinca i'huexi iƚquiya. Iƚe litine lahuelojntsonga' jahuay illanc' naƚ'huaiyijmpá ȽanDios, tines'me: “Iƚque Jesús ƚinca apaxi. Joupa ipai'ipola' iƚne.” Laƚnespa: “… jahuay illanc' naƚ'huaiyijmpá”, aƚnescopolhuo' jouc'a imanc', joupa olapenufpá Lataiqui' lalu'ipolhuo'.

11 Aƚ'nujuaisyi iƚe al cueca' al c'a laƚ'iyaconga' jiƚpe al Cueca' Quitine locuaicoya. Toƚiya itine itine aƚsa'hueyi ȽanDios titoc'itsolhuo', ti'hua tolihuejle ȽanDios, iƚque ijoc'ipolhuo'. Ja'ni ti'iƚa' toƚta'a loƚ'ejma' aimixhueƚcoya ȽanDios te quijoc'icopolhuo'. Aƚsahue'eyi ȽanDios ti'iƚa' acueca' lo'eya. Tenant'ƚiƚa' jahuay al c'a loƚspic'epa tonƚ'eƚe. Tenant'ƚiƚa' jahuay iƚe al c'a lopo'nopa ȽanDios jiƚpe loƚpicuejma' ma moƚ'huaiyijnyi iƚque. 12 Ja'ni toƚta'a lotoc'iyacolhuo' ƚalanDios y ƚaƚPoujna Jesucristo, lan xanuc' tixim'me acueca' ƚaƚPoujna Jesús, tipalaico'me al c'a. Imanc' epenufpolhuo' ƚaƚPoujna tixim'molhuo' ti'onƚcospolhuo' to iƚque.