Mga Papakita 18

Parti Ta Pagsamad Ta Syudad Babilonia

1 Pagtapos ta pagkita ko ta bai na gasakay naan ta makaadlek na ayep, may nakita a na isya pa na angil giling ta kalibutan alin ta langit. Kanen an may datas na katengdanan daw nalekkep gid bilog na kalibutan ta kapawa na alin ki kanen. 2 Gasinggit kanen,

“Ula en! Pirdi en bantog na syudad na Babilonia!

Anduni, Babilonia istaran nang en ta mga dimunyo

daw bisan ino klasi na mga malain na ispiritu

daw istaran man ta tanan na klasi ta mga yupan na pabilang na maligna

daw tanan man na klasi ta mga ayep na pabilang na maligna daw malaw-ay.

3 Iling tan natabo ta Babilonia tenged mga ittaw an dya

danen gadala ta mga ittaw ta tanan na mga nasyon

na magsunod ta iran na mga buat na malaw-ay ta panan-aw ta Dyos.

Paryo na mga ittaw ta mga nasyon papainem danen

ta makaingaw na inemen na yon man pagbuat ta malaw-ay.

Papalabet man danen mga ari an ta kalibutan ta iran na buat na malaw-ay

daw tenged segeng gid iran na pagpagusto ta iran na kaugalingen na liag,

tudo iran na pamalit na yon man

mga nigusyanti ta bilog na kalibutan gamanggaranen.”

4 May namatian a na isya pa na gambal na naan ta langit,

“Kyo na ake na mga ittaw na naan ta Babilonia,

malin kaw dyan aged dili kaw magsunod ta mga ittaw dyan ta iran na mga buat na sala

daw dili kaw man madapil ta mga salot na mabot ki danen.

5 Silutan danen an ta Dyos tenged dili din malipatan tama danen na mga buat na sala.

Tama gid iran na mga buat na sala na daw sampaw-sampawen, kalambot en ta langit.

6 Buaten man ki danen paryo ta pabuat danen na malain naan ta duma na mga ittaw.

Balesan danen an ta dubli pa ta iran na mga buat

na paryo timplaan danen an ta inemen na dubli pait kaysa ta inemen na patimpla danen para ta duma na mga ittaw.

7 Tenged segeng gid iran na pagpabugal daw iran man na pagpagusto ta iran na kaugalingen na liag,

bales ki danen segeng na kasakit daw kalised.

Ambal danen naan ta iran na kaugalingen,

‘Kami i mga rayna daw mga ari na gamungko naan ta ame na mga truno.

Dili kay mga balo. Yon na impusibli na mangalised kay paryo ta mga balo.’

8 Tenged ta iran na pagpabugal, ta isya nang na adlaw mabot ki danen tanan na mga salot na silot ki danen.

Mabot mga makalaton na masakit na makapatay, mga kalised, letem daw sunugon man iran na syudad

tak makagagaem Ginuo Dyos an na gasintinsya daw gasilot ki danen.”

9 Mga ari an ta kalibutan na galabet duma ta mga ittaw ta Babilonia ta iran na pagbuat ta malaw-ay daw pagpagusto man ta bisan ino na iran na kaugalingen na liag, danen an mangagal daw mag-ug-og tak makita danen aso na alin ta pagsunog ta Babilonia. 10 Naan nang danen an ta madyo magtindeg tak adlek na silutan man danen an paryo ta pagsilot naan ta mga ittaw ta Babilonia. Mag-ambal danen an, “Kaluluoy gid kyo yan na mga ittaw ta bantog daw padayaw na syudad na Babilonia! Seled ta isya nang na uras ula en inyo na syudad tenged gabot silot ta Dyos ki kyo.”

11 Mga nigusyanti ta bilog na kalibutan, mangagal danen an daw mangasebe gid tenged ta silot naan ta mga ittaw ta Babilonia tak ula en may magpalit ta iran na mga pabligya. 12 Ula en may magpalit ta iran na blawan, pilak, maalen na mga bato daw pirlas. Ula man en may magpalit ta iran na maalen na mga tila na lino,*May pasaysay parti ta lino na pwidi nyo mabasa naan ta ‘footnote’ ta Mga Papakita 15:6. bayulit,†May pasaysay parti ta bayulit na tila na pwidi nyo mabasa naan ta ‘footnote’ ta Mga Papakita 17:4. sida daw minog. Ula en may magpalit ta iran na kaoy na citron, mga gamit na buat alin ta bangkil ta ilipanti, mga gamit na buat alin ta mga maalen na kaoy, brunsi, salsalen daw marmol. 13 Ula en may magpalit ta iran na cinnamon daw duma man na panglasa daw iran na mga pang-ammot na tagek na kamangyan, mira daw insinso. Ula en may magpalit ta iran na bino, lana, arina, trigo, baka, karniro, kabayo, kalisa daw bisan mga ittaw na pabligya danen bilang ulipen.

14 Mambal mga nigusyanti an naan ta mga ittaw ta Babilonia, “Ula en tanan na mga betang na naliagan nyo. Tanan nyo na mga pagkabetang na maalen daw dayad dili nyo en makita isab.”

15 Mga nigusyanti na gamanggaranen paagi ta iran na pagnigusyo naan ta Babilonia ta mga dayad daw maalen na betang, dili danen marani ta Babilonia. Naan nang ta madyo magtindeg danen an tak adlek na silutan man paryo ta pagsilot naan ta mga ittaw ta Babilonia. Mangagal mga nigusyanti an daw mangasebe gid. 16 Mag-ambal danen, “Kaluluoy gid mga ittaw ta bantog na syudad na Babilonia! Una sa gabayo danen ta maalen na mga tila na lino, bayulit daw minog. Papunian danen iran na kaugalingen ta tama na mga nabuat alin ta blawan, maalen na mga bato daw mga pirlas. 17 Piro, seled ta isya nang na uras tanan na manggad danen ula en.”

Tanan na mga kapitan ta sakayan na pangdagat, mga pasairo, mga gurmiti daw tanan na mga ittaw na iran na pangabuian paagi ta dagat, magtindeg man naan nang ta madyo ta Babilonia. 18 Tenged makita danen aso na alin ta pagsunog ta syudad, magsinggit danen ta iran na kasebe, “Ula duma na syudad paryo ta bantog ya na syudad.” 19 Tenged ta subla na kasebe, bubuan danen ta yab-ok iran an na ulo mintras danen an mangagal daw mangasebe. Mag-ambal danen an, “Kaluluoy gid mga ittaw ta bantog na syudad na Babilonia! Tenged ta iran na manggad tanan na mga ittaw na may sakayan na pangdagat gamanggaranen. Piro, seled ta isya nang uras nasamad gid en Babilonia.”

20 “Gani, kyo tanan na naan ta langit, magkalipay kaw tenged nasamad en syudad ya. Kyo na mga ittaw na iya ta Dyos, mga apustulis daw mga manugsugid ta iya na kabebet-en, magkalipay kaw man tak nasintinsyaan din en daw nasilutan syudad ya tenged ta iran na mga buat na malain ki kyo.”

21 Nakita ko na isya na angil na may bakod na gaem gaakwat ta bato na paryo ta bakod na galingan na bato daw papilak din naan ta dagat. Ambal din, “Iling man tan matabo ta bantog ya na syudad na Babilonia. Masamad gid en daw dili en makita isab. 22 Dili en mamatian isab naan ta syudad mga manugtukar ta arpa, mga manugkanta, mga manugplawta daw mga manugtrumpita. Dili man en makita isab dya mga manug-ubra ta bisan ino na klasi na ubra. Dili man en mamatian isab na may gagaling. 23 Dili man en makita isab kapawa ta mga ilaw. Dili man en mamatian isab pag-atag an ta mga pangako ta nubyo daw nubya naan ta iran na kasal. Silutan gid mga ittaw naan ta Babilonia tenged gapabugal gid iran na mga nigusyanti na danen an bantog ta bilog na kalibutan daw tenged man na mga ittaw ta Babilonia danen galuko ta mga ittaw ta tanan na mga nasyon ta iran na mga pabuat paagi ta tabang ta mga ispiritu na kuntra ta Dyos. 24 Danen gapatay ta mga manugsugid ta kabebet-en ta Dyos daw duma man na mga ittaw na iya ta Dyos. Manabat danen ta kamatayen ta tanan na mga ittaw na papatay naan ta bilog na kalibutan.”

<- Mga Papakita 17 Mga Papakita 19 ->