1 Angraeng khaeah anghoehaih lok to thui ah; anih ih ahmin to kawk oh; a sak ih hmuennawk to kaminawk khaeah amtuengsak oh.

2 Angmah khaeah laasah oh loe, angmah khaeah saam laa to sah oh; a sak ih dawnrai hmuennawk to thui oh.

3 Anih ih ciimcai ahmin to lensawkhaih hoiah amoek o haih ah; Angraeng pakrong kaminawk ih palungthin loe anghoe nasoe.

4 Angraeng hoi a thacakhaih to pakrong oh; a mikhmai to pakrong oh!

5 A sak ih dawnrai, anghmang thok hmuennawk, angmah ih pakha hoi tacawt lokcaekhaihnawk to pakuem oh,

6 a tamna Abraham ih caanawk, a qoih ih Jakob ih caanawk to panoek oh!

7 Anih loe aicae Angraeng Sithaw ah oh; a lokcaekhaih loe long nui boih ah oh.

8 Anih loe angmah sak ih lokmaihaih to dungzan khoek to panoek poe, a thuih ih lok to adung sangto khoek to panoek,

9 [a]anih loe Abraham hoi a sak ih lokmaihaih, Isaak khaeah sak ih lokkamhaih to panoek poe;

10 [b]to lokmaihaih to Jakob khaeah a caksak moe, Israel khaeah dungzan lokmaihaih ah a suek:

11 Kanaan prae to kang paek han, nangmah ih taham ah kaom qawk baktiah na toep tih, tiah a naa.

12 Nihcae loe kami tamsi o, ue, paroeai tamsi kaminawk loe prae thungah angvin ah oh o.

13 Nihcae mah acaeng maeto hoi maeto khaeah caeh o moe, prae maeto hoi kalah kaminawk khaeah a caeh o naah,

14 [c]mi doeh kasae hmuen to sahsak ai; ue, nihcae pongah siangpahrangnawk to a thuitaek,

15 situi ka bawh ih kami to sui o hmah; kai ih tahmaanawk to nganbawh kana paek o hmah, tiah a naa.

16 [d]Anih mah prae thungah khokhahaih to phaksak; caaknaek boih amrosak.

17 [e]Nihcae hmaa ah kami maeto, tamna ah zawh o ih, Joseph to patoeh.

18 [f]Anih ih khok to thlongthuk pae o moe, sumboeng hoiah pacaekthlaek o;

19 a thuih ih lok acung ai karoek to, Angraeng ih lok mah anih to tanoek.

20 [g]Siangpahrang mah kami to patoeh moe, loisak; kaminawk ukkung mah doeh anih to loisak.

21 [h]Anih to a imthung ah angraeng ah suek, a tawnh ih hmuennawk boih ukkung ah a suek,

22 Anih mah angraeng capanawk to a koeh baktiah patuk, to tiah anih loe kacoehtanawk palunghahaih patuk hanah oh.

23 [i]Israel doeh Izip prae thungah angzoh; Jakob loe Ham prae thungah oh.

24 [j]Angraeng mah angmah ih kaminawk to pungsak moe, nihcae ih misanawk pongah tha a caksak kue.

25 Anih ih kaminawk hnukma moe, a tamnanawk kasae sak pacaeng hanah, nihcae ih palungthin to a paqoi pae.

26 [k]A tamna Mosi hoi a qoih ih Aaron to patoeh.

27 Nihnik mah nihcae khaeah Angraeng ih angmathaih to sak pae hoi, anghmang thok hmuennawk to Ham prae ah a sak pae hoi.

28 [l]Vinghaih to patoeh pae moe, prae to khovingsak; to tiah nihcae mah anih ih lok to aek o ai.

29 [m]Nihcae ih tuinawk to athii ah angcoengsak moe, tanganawk to dueksak.

30 [n]Nihcae ih prae thungah ukongnawk to a pungsak, angmacae siangpahrang iihhaih ahmuen khoek to ohsak.

31 [o]Lok a thuih moe, taksaenawk to a pungsak, prae thung boih ah alungh to koi.

32 [p]Anih mah khotui zuengah qaetui to paek moe, a prae thungah hmai kangqong to phaksak.

33 Misurkung hoi thaiduetkungnawk to amrosak king moe, prae thung ih thingnawk to amtimsak boih.

34 [q]Anih mah lokthuih let naah, pakhuhnawk to angzoh o, kroeklaek ai langkawknawk to angzoh o,

35 angmacae prae thung ih kahing aanqamnawk to caak pae o king moe, long ah kamprawk thingthai qumponawk doeh caak pae o boih.

36 [r]Angmacae prae thungah kami ih athaih tangsuek ah kaom a calunawk to a hum pae boih.

37 [s]Anih mah nihcae han sui hoi sumkanglung to phawsak; angmah ih acaengnawk thungah thacak ai kami maeto doeh om ai.

38 Izip kaminawk mah nihcae to zit pongah, nihcae amlaem o naah prae boih anghoe o.

39 [t]Nihcae khuk hanah tamai to amzamsak, aqum ah aanghaih paek hanah hmai to a paek.

40 [u]Kaminawk mah hnik o naah, kuikoem to a paek, van ih takaw hoiah nihcae to zok amhahsak.

41 [v]Anih mah thlung to paongh moe, tui to tacawt; tui loe prae karoem ah vapui baktiah longh.

42 Anih loe a tamna Abraham khaeah paek ih, kaciim a lokkamhaih to panoek poe.

43 Anih mah angmah ih kaminawk to anghoehaih hoiah caeh haih, a qoih ih kaminawk to anghoehaih hoiah a zaeh,

44 [w]Sithaw panoek ai kaminawk ih prae to nihcae hanah a paek; minawk mah sak tangcae ih prae to nihcae mah qawk ah toep o,

45 nihcae mah anih ih kaalok to pakuem o moe, a paek ih loknawk to pazui o thai hanah, to tiah a sak pae. Angraeng to saphaw oh!

<- Saam 104Saam 106 ->