Lokpaek Kangtha thungah cabu 27 to oh. Hae canawk loe Grik lok hoiah tarik. Hae Lokpaek Kangtha cabu thung ih canawk loe hae tiah palito tapraek thaih:

1. Tamthanglok Hoih hoi Toksahkungnawk. Tamthanglok Hoih thungah Mathai, Marka, Luka hoi Johan cae hae athum o. Hae palito cabu hae Gospels, tiah thuih o. Gospel loe Tamthanglok Hoih, tiah thuih koehhaih ih ni. Jesu loe zaehaih tawn ai, toe Sithaw mah aicae long kaminawk palung parai pongah aicae zaehaih pahlong hanah hae long nuiah a capa Jesu to patoeh. Anih loe thinglam pongah duek, aphum o; cabu thungah kaom lok baktih toengah, anih loe ni thumto pacoengah Sithaw thacakhaih rang hoiah angthawk let. Anih ih athii hoiah aicae zaehaih to pasaeh boeh moe, aicae zaehaih doeh ang tahmen pae boeh, tiah Kalvary mae nui hoi taphong ih lok hae ni Gospel, Tamthanglok Hoih, tiah thuih o. Hae Tamthanglok Hoih to thaih moe, talawk pacoengah, Jesu Kri loe kai ih Angraeng boeh ni, palungthin boih hoi tang kaminawk loe pahlong ah oh o. Toksahkungnawk cabu doeh hae Tamthanglok Hoih cabu thungah athum toeng, tiah thoemto Baibul kop kaminawk mah thuih o. Hae Toksahkungnawk cabu thungah loe Tamthanglok Hoih punghaih kawng to lokpui koekah amtueng. Jesu duek moe, angthawk let pacoengah Tamthanglok Hoih kawbangmaw pung, tito hae cabu thungah amtueng. Thoemto acaeng kaminawk ih lok hoiah loe hae cabu hae patoeh ah kaom kaminawk ih cabu, tiah ahmin paek o. Loktangah khet nahaeloe, hae cabu thungah Jesu mah patoeh ih kaminawk khue mah sak ih tok kawng to tarik ai, gospel Tamthanglok Hoih tang kaminawk boih mah sak o ih tok doeh oh mang pongah, to kaminawk boih kakrum ah Englih kaminawk mah loe Acts (Toksahkungnawk) ih cabu, tiah ahmin paek o.

2. Pawl mah tarik ih ca. Pawl mah tarik ih ca thungah Rom, 1, 2 Korin, Kalati, Efisa, Philipi, Kolosa, 1, 2 Thesalonika, 1, 2 Timote, Titu hoi Philemon cae athum o. Hae cabunawk hae thoemto kaminawk mah loe ‘Capatnawk’ tiah ahmin paek o. Thoemto Pawl ih ca loe kricaanawk hanah pat pae ih ca ah oh, to pongah anih mah kricabu ih ahmin maw, to tih ai boeh loe vangpui ih ahmin to patoh, thoemto ca bae loe toksahkung angmah ih ampui khaeah pat ih ca ah oh pongah, angmah ih ampui hmin to patoh, tiah amtueng.

3. Kalah capatnawk. Hae capatnawk loe Hebru, Jakob, 1, 2 Piter, 1, 2, 3 Johan hoi Juda cae hae ni. Cabu thungah Hebru capat tarik kami ih ahmin amtueng ai pongah, hae cabu tarikkung ih ahmin loe panoek thai ai, tiah thuih o. Toe cabu thungah kaom loknawk to khet het naah Pawl mah tarik ih cabu hanah amcuk, to pongah kapop kricaanawk mah loe Pawl mah ni hae cabu hae tarik, tiah tanghaih tawnh o. 4. Lokphong. Hae cabu loe kalah cabunawk pongah lah kue. Lokpaek Kangtha cabu thungah kaom loknawk hoi kanghmong ai kalah loknawk doeh oh mangh. Tih pongah maw to tiah oh? tiah lokdueng soe nahaeloe, Johan mah tarik ih lok loe, taksa hoi thisen ah kaom Jesu na ai boeh ni, duekhaih thung hoi kangthawk let Kri, Pakhra hoi Muithla taksa ah kaom Kri mah, hnuksakhaih paek pacoengah tarik ih lok ah oh pongah ni minawk kalah mah tarik ih lok hoiah anghmong ai, tito a panoek o. Hae cabu thungah loe kaom tangcae hmuen, kaom li hmuen hoi kaom hankoi thuihcoek ih hmuen oh, tiah thumto tapraek thaih.