1 Alang sa pangulong musikero. Usa ka awit, ang salmo. Paghimo ug malipayong kasaba ngadto sa Dios, tibuok kalibotan; 2 Awita ang himaya sa iyang ngalan; himoa nga mahimayaon ang iyang pagdayeg. 3 Isulti sa Dios, “Pagkamakalilisang sa imong mga buhat! Tungod sa kadako sa imong gahom moyukbo kanimo ang imong mga kaaway. 4 Ang tibuok kalibotan magsimba kanimo ug mag-awit kanimo; magaawit sila sa imong ngalan.” Selah 5 Ngari ug tan-awa ang mga gibuhat sa Dios; kahadlokan siya ug ang iyang mga gibuhat ngadto sa mga anak sa katawhan. 6 Gipamala niya ang dagat; milatas sila sa suba; didto nagmalipayon kita diha kaniya. 7 Pinaagi sa iyang kusog nagdumala siya hangtod sa kahangtoran; nagtaw-an siya sa kanasoran; ayaw itugot nga magpataas ang mga masupilon sa ilang kaugalingon. Selah 8 Dayega ang Dios, kamong katawhan, ipalanog ang pagdayeg alang kaniya. 9 Giampingan kita niya taliwala sa mga buhi, ug wala niya gitugot nga madalin-as ang atong mga tiil. 10 Kay ikaw, O Dios, nagsulay kanamo; gisulayan nimo kami sama sa plata nga giulay. 11 Gihatod nimo kami sa pukot; gibutang nimo sa among likod ang labihang palas-anon. 12 Gipayatakan nimo sa mga tawo ang among mga ulo; miagi kami sa kalayo ug sa tubig, apan gidala mo kami sa usa ka hawan nga dapit. 13 Moadto ako sa imong puluy-anan nga dala ang mga halad nga sinunog; akong tumanon ang akong panumpa 14 nga gisaad sa akong mga ngabil ug ang gisulti sa akong baba sa dihang anaa ako sa kagul-anan. 15 Maghalad ako kanimo ug sinunog nga tambok nga mga mananap nga adunay humot sa laking karnero; maghalad ako ug mga torong baka ug mga kanding. Selah 16 Ngari ug paminaw, kamong tanan nga may kahadlok sa Dios, ug imantala ko ang gibuhat niya alang sa akong kalag. 17 Mituaw ako kaniya pinaagi sa akong baba, ug gidayeg siya sa akong dila. 18 Kung aduna akoy makita nga sala sa akong kasingkasing, ang Ginoo dili maminaw kanako. 19 Apan ang Dios naminaw gayod; gitagad niya ang tingog sa akong pag-ampo. 20 Dalayegon ang Dios, nga wala niya pasagdi ang akong pag-ampo o ang iyang pagkamatinud-anon sa kasabotan nganhi kanako.

<- Mga Salmo 65Mga Salmo 67 ->