1 Bantugan si Yahweh ug angayan sa pagdayeg, sa siyudad sa atong Dios sa iyang balaan nga bukid. 2 Maanyag diha sa kahitas-an, ang kalipay sa tibuok nga kalibotan, mao ang Bukid sa Sion, sa kasadpan nga mga bahin, ang siyudad sa labaw nga Hari. 3 Gihimo sa Dios nga mailhan ang iyang kaugalingon ngadto sa iyang mga palasyo ingon nga dalangpanan. 4 Tan-awa, ang mga hari nanagtigom; nangagi ang matag-usa kanila. 5 Nakita nila kini, unya sila natingala; sila nangadismaya, ug mipahawa ug dali. 6 Nangurog sila, sama sa kasakit nga bation sa babaye nga manganak. 7 Uban sa hangin sa silangan gipaguba nimo ang mga barko sa Tarsis. 8 Ingon sa among nadungog, busa nakita usab namo ang siyudad ni Yahweh nga pangulo sa kasundalohang anghel, sa siyudad sa atong Dios; lig-onon sa Dios ang iyang siyudad hangtod sa hangtod. Selah 9 Nakahinumdom kami sa imong matinud-anong kasabotan, Dios, taliwala sa imong templo. 10 Sama sa imong ngalan, Dios, ang pagdayeg kanimo lamang hangtod sa kinatumyan sa kalibotan; ang imong tuong kamot puno sa pagkamatarong. 11 Pagmaya Bukid sa Sion, palipaya ang anak nga babaye sa Juda tungod sa imong matarong nga mando. 12 Lakaw ug libot sa Bukid sa Sion, libota siya; ihapa ang iyang mga tore, 13 timan-i ang iyang mga pader, ug tan-awa ang iyang palasyo aron masaysay mo kini sa sunod nga kaliwatan. 14 Kay kini nga Dios mao ang atong Dios hangtod sa kahangtoran; siya mao ang maggiya kanato hangtod sa kamatayon.

<- Mga Salmo 47Mga Salmo 49 ->