1 Dayega si Yahweh. Dayega si Yahweh, kamo nga anaa sa kalangitan; dayega siya, kamo nga anaa sa kahitas-an. 2 Dayega siya, tanan niyang mga anghel; dayega siya, tanan niyang kasundalohan nga anghel. 3 Dayega siya, adlaw ug bulan; dayega siya, tanang nagasidlak nga kabituonan. 4 Dayega siya, kinatas-ang langit ug kamong katubigan nga anaa ibabaw sa kawanangan. 5 Padayega sila sa ngalan ni Yahweh, kay naghatag siya ug sugo, ug nabuhat sila. 6 Gipahimutang usab niya sila hangtod sa kahangtoran; naghatag siya ug kasugoan nga dili na gayod mausab. 7 Dayega siya gikan sa kalibotan, kamong mga binuhat nga anaa sa dagat ug ang tanang anaa sa kinahiladman sa dagat, 8 kalayo ug ulan nga ice, niyebe ug kapanganoran, naghaguros nga hangin nga nagtuman sa iyang pulong. 9 Dayega siya, kabukiran ug ang tanang kabungtoran, mga kahoy nga mamunga ug tanang mga sidro, 10 ihalas ug dili ihalas nga mga mananap, nagkamang nga mga binuhat ug kalanggaman. 11 Dayega si Yahweh, mga hari sa kalibotan ug tanang kanasoran, mga prinsipe ug tanang nagdumala sa kalibotan, 12 batan-ong lalaki man ug batan-ong babaye, tigulang ug mga bata. 13 Padayega silang tanan sa ngalan ni Yahweh, kay ang iyang ngalan lamang ang labaw sa tanan ug ang iyang himaya nilukop sa tibuok kalibotan ug kalangitan. 14 Gibayaw niya sa iyang katawhan ang sungay alang sa pagdayeg gikan sa tanang nagmatinud-anon kaniya, ang mga Israelita, ang katawhan nga duol kaniya. Dayega si Yahweh.

<- Mga Salmo 147Mga Salmo 149 ->