Mga Salmo 87

Salmo 87

Ang awit sa mga anak ni Kora.

1-2 Gitukod sa Ginoo ang siyudad sa Zion[a] didto sa balaang mga bungtod.

Gihigugma niya kining siyudara

labaw sa tanang mga dapit sa Israel[b].

3 Maayong mga butang ang gipanulti niya mahitungod

niining iyang siyudad.

4 Miingon siya, “Kon ilista ko ang mga nasod nga nag-ila kanako,

i-apil ko ang Ehipto[c] ug ang Babilonia,

apil usab ang Filistia, Tiro, ug Etiopia[d].

Isipon ko ang ilang katawhan nga mga lumad sa Zion.”

5 Sa pagkatinuod isulti kini mahitungod sa Zion:

“Daghang mga katawhan ang isipon nga gipanganak dinhi.

Ug ang Labing Halangdong Dios gayod mao ang molig-on niining siyudara.”

6 Ilista unya sa Ginoo ang iyang mga katawhan

ug i-apil niya ang mga katawhan gikan sa ubang nasod

nga giisip niyang mga lumad sa Zion.

7 Silang tanan mosayaw ug moawit,

“Gikan sa Zion ang tanan natong panalangin!”