1 Jo̱ mɨ˜ caguilíingˉ i̱ Paaˉ do có̱o̱ꞌ˜guɨ Bernabé fɨˊ Iconio, cangotáaiñꞌ˜ co̱lɨɨng˜ fɨˊ dsíiˊ guáꞌˉ quiáꞌˉ dseaˋ góorˋ dseaˋ Israel e siꞌˊ fɨˊ jo̱ lɨ́ꞌˆ laco̱ꞌguɨ quɨ́ꞌˉ tɨ́ɨiñˋ. Jo̱ co̱ꞌ guiarˊ jaléꞌˋ júuˆ quiáꞌˉ Dseaˋ Jmáangˉ laꞌeáangˊ có̱o̱ꞌ˜ e ꞌgøngꞌˊ quiáꞌˉ Jmɨguíˋ quiáꞌˉ Fidiéeˇ, jo̱baꞌ fɨ́ɨmˊ dseaˋ Israel có̱o̱ꞌ˜guɨ dseaˋ i̱ jaˋ lɨ́ɨngˊ dseaˋ Israel jáꞌˉ calɨ́iñˉ jaléꞌˋ e júuˆ do ie˜ jo̱. 2 Jo̱ dsʉꞌ jaléngꞌˋ dseaˋ Israel i̱ jaˋ jáꞌˉ lɨ́ɨngˋ e júuˆ e guiaˊ i̱ dseaˋ góorˋ i̱ siiˋ Paaˉ do có̱o̱ꞌ˜guɨ Bernabé, canaaiñˋ jmɨgǿømˋbre i̱ dseaˋ i̱ jaˋ lɨ́ɨngˊ dseaˋ Israel e laco̱ꞌ dseaˋ íˋ nijmérˉ e ꞌníꞌˋ níiñˉ jaléngꞌˋ i̱ dseaˋ quiáꞌˉ Dseaˋ Jmáangˉ do. 3 Jo̱baꞌ mɨ˜ canaangˋ calɨ́ˉ lado, huǿøˉbɨ caje̱ˊ i̱ Paaˉ do có̱o̱ꞌ˜guɨ Bernabé fɨˊ jo̱ e guiarˊ júuˆ quiáꞌˉ Dseaˋ Jmáangˉ e jaˋ ꞌgóꞌrˋ jí̱i̱ꞌ˜ co̱o̱ˋ, co̱ꞌ ta˜ dsíirˊ e eáamˊ jmɨcó̱o̱ꞌ˜ Fíiˋnaaꞌ Fidiéeˇ quiáꞌrˉ. Jo̱ i̱ Paaˉ do có̱o̱ꞌ˜guɨ Bernabé cangɨ́ɨiñˋ quiáꞌˉ Fidiéeˇ e nijmérˉ jaléꞌˋ e li˜ e quɨ́ɨꞌ˜ jmɨɨ˜. Jo̱ có̱o̱ꞌ˜ jaléꞌˋ e jo̱ jmili˜ Fidiéeˇ e jáꞌˉ e júuˆ e guiaˊ i̱ dseaˋ do quiáꞌˉ jial ꞌneáangˋ Fidiéeˇ dseaˋ jmɨgüíˋ. 4 Jo̱ jaléngꞌˋ dseaˋ i̱ seengˋ e fɨɨˋ Iconio do tú̱ˉ ꞌléꞌˋ caꞌuíiñˉ; co̱o̱ˋ ꞌléꞌˋ casíngꞌˉ uii˜ quiáꞌˉ jaléngꞌˋ dseaˋ Israel i̱ jaˋ caꞌíngꞌˋ júuˆ e caguiaˊ dseaˋ do, jo̱guɨ co̱o̱ˋ ꞌléꞌˋguɨ casíngꞌˉ uii˜ quiáꞌˉ i̱ dseaˋ apóoˆ do. 5 Jo̱ jaléngꞌˋ dseaˋ Israel i̱ jaˋ caꞌíngꞌˋ e júuˆ do có̱o̱ꞌ˜guɨ jaléngꞌˋ dseaˋ i̱ jaˋ lɨ́ɨngˊ dseaˋ Israel casɨ́ɨiñˉ røøˋ có̱o̱ꞌ˜ jaléngꞌˋ dseata˜ e quiáꞌˉ nijmeáiñꞌˋ gaˋ i̱ dseaˋ apóoˆ do, jo̱guɨ nijmɨhuɨ́ɨngˋneiñꞌ có̱o̱ꞌ˜ layaang˜ cu̱u̱˜. 6 Jo̱ dsʉꞌ mɨ˜ calɨñiˊ Paaˉ có̱o̱ꞌ˜guɨ Bernabé lají̱i̱ꞌ˜ e ɨˊ dsíiˊ i̱ dseaˋ do e gabˋ nijmeángꞌˋneiñꞌ, jo̱baꞌ cangolíiñˆ e sɨꞌíˆ jmɨꞌǿngꞌˋ yaaiñ˜ fɨˊ Listra có̱o̱ꞌ˜guɨ fɨˊ Derbe, co̱o̱ˋ fɨɨˋ e néeˊ lɨ˜ se̱ꞌˊ Licaonia, 7 jo̱ fɨˊ jo̱b caguiarˊ júuˆ quiáꞌˉ Dseaˋ Jmáangˉ.

8 Jo̱ mɨ˜ caguilíiñˉ fɨˊ Listra, fɨˊ jo̱ niseengˋ jaangˋ dseañʉꞌˋ i̱ nicaang˜ tɨɨˉ latɨˊ mɨ˜ cangáaiñꞌ˜, jo̱ jaˋ líˋ ngɨ́rˉ jí̱i̱ꞌ˜ capíꞌˆ. 9 Jo̱ dob guiiñ˜ e núurˋ júuˆ e guiaˊ i̱ Paaˉ do. Jo̱ mɨ˜ cangángˉ i̱ Paaˉ do dseaˋ do, dsifɨˊ lajo̱b calɨlíꞌrˆ e i̱ dseaˋ do jábꞌˉ lɨ́ɨiñˋ e quɨ́ɨbꞌ˜ Fidiéeˇ jmɨɨ˜ e nijmiꞌleáangˉ írˋ. 10 Jo̱ dsifɨˊ lajo̱b cajíngꞌˉ i̱ Paaˉ do casɨ́ꞌrˉ i̱ dseaˋ jlúungꞌ˜ do e féꞌrˋ teáˋ jo̱ cajíñꞌˉ:

—¡Ráanꞌˉ, jo̱ jmeeˉ sínꞌˉ røøˋ!

Jo̱ dsifɨˊ lajo̱b caꞌɨ́ɨngˉ i̱ dseañʉꞌˋ do, jo̱ lajo̱b casíngꞌˋ ꞌñiaꞌrˊ jo̱ canaaiñˋ ngɨˊbre. 11 Jo̱ mɨ˜ cangáˉ jaléngꞌˋ dseaˋ i̱ teáangˉ do ie˜ jo̱ lají̱i̱ꞌ˜ e cajméeˋ Paaˉ có̱o̱ꞌ˜ i̱ dseaˋ jlúungꞌ˜ do, dsifɨˊ lajo̱b canaaiñˋ féꞌrˋ teáˋ có̱o̱ꞌ˜ jmíiˊ quiáꞌrˉ e éeiñˋ i̱ Paaˉ do có̱o̱ꞌ˜guɨ Bernabé jo̱ jíñꞌˉ:

—Gángˉ diée˜ nɨcagüɨlíingˉ jee˜ jneaa˜aaꞌ i̱ lɨ́ɨngˊ la lɨ́ɨngˊ dseaˋ jmɨgüíˋ.

12 Jo̱ lajalémꞌˋbre féꞌrˋ e i̱ Bernabé do lɨ́ɨiñˊ jaangˋ diée˜ quiáꞌrˉ i̱ siiˋ Zeus jo̱guɨ i̱ Paaˉ do lɨ́ɨiñˊ jaangˋguɨ diée˜ quiáꞌrˉ i̱ siiˋ Hermes, co̱ꞌ íˋbre dseaˋ quie̱rˊ nifɨˊ e guiarˊ e júuˆ do jee˜ jaléngꞌˋ dseaˋ do. 13 Jo̱ e guáꞌˉ fɨˊ lɨ˜ jmiféngꞌˊ dseaˋ i̱ diée˜ Zeus do, dob nisiꞌˊ dseángꞌˉ lɨ˜ íˉ jee˜ fɨɨˋ do, jo̱ i̱ jmidseaˋ i̱ jmóoˋ ta˜ e fɨˊ guáꞌˉ jo̱ caguijéeiñˋ jaléngꞌˋ güɨtሠjo̱guɨ caguica̱rˇ jaléꞌˋ líˆ fɨˊ lɨ˜ neáangˊ i̱ dseaˋ gángˉ do, co̱ꞌ ɨˊ dsíirˊ e nijmifémꞌˊbreiñꞌ do co̱lɨɨng˜ có̱o̱ꞌ˜ jaléngꞌˋ dseaˋ i̱ teáangˉ do ie˜ jo̱ lafaꞌ jaangˋ diée˜ quiáꞌˉbre; jo̱guɨ lamɨ˜ ɨˊ dsíirˊ e nijngáiñꞌˉ i̱ güɨtሠdo fɨˊ quiniˇ i̱ dseaˋ gángˉ do e laco̱ꞌ nijmiféngꞌˊneiñꞌ. 14 Dsʉꞌ mɨ˜ calɨlíꞌˆ i̱ Paaˉ do có̱o̱ꞌ˜guɨ i̱ Bernabé do lají̱i̱ꞌ˜ e lɨ́ˋ dsíiˊ i̱ jmidseaˋ do có̱o̱ꞌ˜guɨ jaléngꞌˋ dseaˋ e nijmérˉ có̱o̱iñꞌ˜ do, dsifɨˊ lajo̱b caꞌguɨ́rˉ sɨ̱ꞌrˆ jo̱ cangotáaiñꞌ˜ jee˜ jaléngꞌˋ i̱ dseaˋ do, jo̱ canaaiñˋ sɨ́ꞌˋreiñꞌ có̱o̱ꞌ˜ júuˆ e teáˋ:

15 —¿Jialɨꞌˊ jmooˋnaꞌ lana? Co̱ꞌ o̱ꞌ diée˜ jneaꞌˆ, jneaꞌˆ lɨ́ɨˊnaaꞌ dseaˋ jmɨgüíˋ laco̱ꞌguɨ la lɨ́ɨngˊ ꞌnʉ́ꞌˋ. Jo̱ cajáˉnaaꞌ fɨˊ la uiing˜ jo̱b cajo̱ e cajasíiꞌˇnaaꞌ ꞌnʉ́ꞌˋ e ꞌnéˉ nitʉ́ˆbaꞌ lají̱i̱ꞌ˜ e tɨ́ɨngˋnaꞌ jmooˋnaꞌ lɨ́ꞌˆ laco̱ꞌguɨ iing˜naꞌ jmeeˉnaꞌ lana có̱o̱ꞌ˜ jneaꞌˆ, co̱ꞌ jaˋ eeˋ ta˜ íingˆ quíiˉnaꞌ jí̱i̱ꞌ˜ capíꞌˆ e jo̱, jo̱ quɨ́ꞌˉ jíingꞌˇ yaang˜naꞌ fɨˊ quiniˇ Fidiéeˇ i̱ dseángꞌˉ jáꞌˉ do, co̱ꞌ íbˋ dseaˋ cajméerˋ jmɨgüíˋ có̱o̱ꞌ˜guɨ guóoꞌ˜ uǿˉ có̱o̱ꞌ˜guɨ jmɨñíꞌˆ, lɨ́ꞌˆ lajaléꞌˋ e seaˋ laꞌúngˉ fɨˊ jmɨgüíˋ. 16 Jo̱ nañiˊ faꞌ lamɨ˜ jéengˊguɨ jaˋ cajníingˊ Fidiéeˇ quiáꞌˉ jaléngꞌˋ dseaˋ e cajméebˋ dseaˋ lɨ́ꞌˆ doñiˊ eeˋ jáˉ dsíirˊ, 17 jo̱ dsʉꞌ contøømˉ nɨcajméerˋ li˜ e seemˋbre jee˜ jaléngꞌˋ dseaˋ jmɨgüíˋ có̱o̱ꞌ˜ jaléꞌˋ e guiʉ́ˉ e jmóorˋ, co̱ꞌ íˋbre dseaˋ jmóorˋ e seaˋ jaléꞌˋ jmɨ́ɨˊ, jo̱guɨ e jlobꞌˆ cuøˊ jaléꞌˋ e dsijnea˜ fɨˊ ni˜ guóoꞌ˜ uǿˉ, jo̱guɨ e seaˋ lalíingˋ jaléꞌˋ e quiee˜naaꞌ, jo̱guɨ íˋbre cuørˊ e iáangˋ dsiˋnaaꞌ cajo̱.

18 Dsʉꞌ mɨ˜ cangɨ́ˋ e caféngꞌˊ i̱ Paaˉ do jaléngꞌˋ i̱ dseaˋ do, guidseaamˆ calɨ́ꞌrˉ cajníiñˊ e jaˋ cajngangꞌˊ i̱ dseaˋ do jaléngꞌˋ i̱ jóꞌˋ i̱ sɨꞌíˆ nijngáiñꞌˉ e nicuǿiñꞌˉ i̱ dseaˋ gángˉ do e nijmiféngꞌˊneiñꞌ lafaꞌ diée˜.

19 Jo̱ mɨ˜ cangɨ́ˋ jo̱, caguilíingˉ co̱o̱ˋ tú̱ˉ mɨ́ɨngꞌ˜ dseaˋ Israel i̱ jalíingˉ fɨˊ Antioquía có̱o̱ꞌ˜guɨ fɨˊ Iconio. Jo̱ i̱ dseaˋ íˋ cajméerˋ e calɨ́ˉ ꞌníꞌˋ níimˉ dseaˋ Listra i̱ Paaˉ do, jo̱guɨ casɨ́ɨiñˉ røøˋ e cu̱u̱b˜ nisɨꞌlóꞌrˋ dseaˋ do, jo̱ lajo̱b cajméerˋ. Jo̱ mɨ˜ cangɨ́ˋ e casɨꞌlóꞌˋreiñꞌ do cu̱u̱˜, jo̱ cajñúungˋneiñꞌ fɨˊ caluuˇ fɨɨˋ co̱ꞌ lɨ́ɨiñˉ e cajngamꞌˊbreiñꞌ do. 20 Dsʉꞌ mɨ˜ cangɨ́ˋ jo̱, caguilíingˉ jaléngꞌˋ dseaˋ quiáꞌˉ Dseaˋ Jmáangˉ fɨˊ lacúngꞌˊ lɨ˜ ráangˋ i̱ Paaˉ do fɨˊ caluuˇ e fɨɨˋ do, jo̱ dsifɨˊ lajo̱b caró̱o̱ˉtu̱iñꞌ do, jo̱ caꞌíbˉtu̱r e fɨˊ jee˜ fɨɨˋ do. Jo̱ mɨ˜ cajneáˉ e jmɨɨ˜ jo̱, caꞌuøømˋ i̱ Paaˉ do có̱o̱ꞌ˜guɨ Bernabé e fɨˊ jo̱, jo̱ cangolíiñˆ fɨˊ co̱o̱ˋ fɨɨˋ lɨ˜ siiˋ Derbe.

21 Jo̱ mɨ˜ caguilíiñˉ fɨˊ Derbe, fɨˊ jo̱b canaaiñˋ guiarˊ júuˆ quiáꞌˉ Dseaˋ Jmáangˉ, jo̱ fɨˊ jo̱ fɨ́ɨmˊ dseaˋ i̱ jáꞌˉ calɨ́ngˉ júuˆ e guiaˊ dseaˋ do ie˜ jo̱, jo̱ dseaˋ quiáꞌˉ Dseaˋ Jmáamˉ caꞌuíiñˉ. Jo̱ mɨ˜ cangɨ́ˋ jo̱, caquɨmꞌˉtu̱ i̱ Paaˉ do có̱o̱ꞌ˜guɨ Bernabé fɨˊ Listra có̱o̱ꞌ˜guɨ Iconio jo̱guɨ Antioquía. 22 Jo̱ jaléꞌˋ e fɨɨˋ na cangɨ́ɨngˊtu̱r caléꞌˋ catú̱ˉ, jo̱ caféiñꞌˊ jaléngꞌˋ dseaˋ quiáꞌˉ Dseaˋ Jmáangˉ i̱ seengˋ fɨˊ jo̱ e jaˋ nitiúuiñꞌˉ do lají̱i̱ꞌ˜ fɨˊ guiʉ́ˉ lɨ˜ nɨteáaiñˉ có̱o̱ꞌ˜ Dseaˋ Jmáangˉ; jo̱guɨ casɨ́ꞌˉguɨreiñꞌ do cajo̱ e jaléngꞌˋ dseaˋ i̱ iing˜ e Fidiéeˇ nicá̱ˋ nifɨˊ quiáꞌrˉ ꞌnéˉ nidsingɨ́ɨiñˉ jaléꞌˋ iihuɨ́ɨˊ. 23 Jo̱guɨ caꞌnáamˉbɨr fɨˊ laco̱o̱ˋ fɨɨˋ do co̱o̱ˋ tú̱ˉ mɨ́ɨngꞌ˜ dseaˋ cǿøngꞌ˜ i̱ nicá̱ˋ nifɨˊ quiáꞌˉ jaléngꞌˋ dseaˋ quiáꞌˉ Dseaˋ Jmáangˉ i̱ seengˋ laco̱o̱ˋ laco̱o̱ˋ e fɨɨˋ do; jo̱ mɨ˜ calɨ́ˉ jo̱, cajméerˋ ayuno e laco̱ꞌ jøøngˉguɨr caféiñꞌˊ Fidiéeˇ uii˜ quiáꞌˉ i̱ dseaˋ cǿøngꞌ˜ do. Jo̱guɨ caseáangˊneiñꞌ do lajaléiñꞌˋ do fɨˊ jaguóˋ Fíiˋnaaꞌ Fidiéeˇ, co̱ꞌ jábꞌˉ calɨ́ngˉ dseaˋ do júuˆ quiáꞌˉ dseaˋ íˋ.

24 Jo̱ mɨ˜ cangɨ́ˋ e cataiñꞌˉ fɨˊ, jo̱ cangɨ́ɨiñˊ fɨˊ guóoꞌ˜ uǿˉ lɨ˜ se̱ꞌˊ Pisidia; jo̱ mɨ˜ cangɨ́ˋ jo̱, caguilíingˋtu̱r fɨˊ Perge lɨ˜ se̱ꞌˊ Panfilia, 25 jo̱ fɨˊ jo̱b caguiarˊ júuˆ quiáꞌˉ Dseaˋ Jmáangˉ. Jo̱ mɨ˜ cangɨ́ˋ jo̱, cangolíingˋtu̱r fɨˊ co̱o̱ˋguɨ fɨɨˋ lɨ˜ siiˋ Atalia. 26 Jo̱ fɨˊ jo̱b cangotáaiñꞌ˜ fɨˊ co̱o̱ˋ dsíiˊ móoˊ jo̱ cangolíiñˆ la dsíˋ ni˜ jmɨñíꞌˆ carˋ caguilíingˋtu̱r caléꞌˋ catú̱ˉ fɨˊ Antioquía lɨ˜ se̱ꞌˊ Siria fɨˊ lɨ˜ cajángꞌˋ dseaˋ i̱ Paaˉ do có̱o̱ꞌ˜guɨ Bernabé fɨˊ jaguóˋ Fidiéeˇ quiáꞌˉ e cangoguiarˇ júuˆ quiáꞌˉ Dseaˋ Jmáangˉ fɨˊ jaléꞌˋ e fɨɨˋ do. Jo̱ co̱ꞌ catóbꞌˊ e ta˜ do quiáꞌrˉ, jo̱baꞌ caquɨmꞌˉtu̱r. 27 Jo̱ dsifɨˊ mɨ˜ caguilíingˉtu̱ Paaˉ có̱o̱ꞌ˜ Bernabé e fɨˊ Antioquía do, dsifɨˊ lajo̱b caseáiñꞌˋ jaléngꞌˋ dseaˋ quiáꞌˉ Dseaˋ Jmáangˉ i̱ neáangˊ e fɨˊ jo̱, jo̱ cajmeaꞌˊreiñꞌ júuˆ lajaléꞌˋ e guiʉ́ˉ e cajméeˋ Fidiéeˇ có̱o̱ꞌr˜ lacaangˋ lɨ˜ cangolíiñˉ do, jo̱guɨ jial cacuøˊ Fidiéeˇ e niꞌíngꞌˋ jaléngꞌˋ dseaˋ i̱ jaˋ lɨ́ɨngˊ dseaˋ Israel júuˆ quiáꞌˉ Dseaˋ Jmáangˉ. 28 Jo̱ mɨ˜ cangɨ́ˋ jo̱, huǿøˉbɨ caje̱ˊ Paaˉ có̱o̱ꞌ˜guɨ Bernabé fɨˊ Antioquía lɨ˜ se̱ꞌˊ Siria co̱lɨɨng˜ có̱o̱ꞌ˜ dseaˋ quiáꞌˉ Dseaˋ Jmáangˉ i̱ neáangˊ fɨˊ jo̱.

<- Hechos 13Hechos 15 ->