1 Anuritam psaan, Israelchichshitisin ichingarusin tputs kapung punirangusin, tanuksin zamangaranganaya. 2 Ashirangsin, yuwshat zandkana anshat Móysisaa, Aaronaatstam mantsirsha ichingarusin tputs tsiyataranganaya. ¿Tamashtaja nda Ijiptoshuri tsap tsiparangini? Ambiritanaari tsiparanguni, ashireeja ningsha apusapsha tsap kiyung kachiyeeruch tsipachich, tárangusin, 3 Apanlleetssha, ¿Mayaamshitaja Apanll iyaa ningeemsha tsap apusapsha wayarang? Waani ningiri tsap tsipambanllina. Undarar waratkatssin, k'chirpungpa pachapana. Ashkatssin, waani yachanllina. Wizanlleewaatstam, mishat wipaatstam waani putambanchina atuparee, iyaa ningeem yushindarangiya. Nda ashishtamaam, pzaa, wapitam Ijiptop kanapunda átpari, táranganaya. 4 Tárangusin, waanpatatshitisin tsiyatarangsin, ¿Tamanda áta? ¿Ndushat chaama kurakarich minum tputs ipuseeruch ínanda át? ambinaapa sheeruch, uwshat chiyaa yusur Ijiptoptam tsap maachchiya, táranganaya. 5 Ashirucha, Móysissha zoonllpa Aaronpa, kapung mang' mantsarangusin, tputsee tasaseersin, tsapush tutunlltayarusin, timuchta ashiranganaya.

6 Anumunsha, Josueysha Nomarini wip, mishat Kaleb, Jefonarini wip ashirusin anshutam shanee ashiranganaya. Anshitisin, tsapoo nararangtamsinaya. Ashirucha, tputs zapan ngatarangana anoo parangusin, uwshtisin kapung mang' mantsarangusin, waanaatsi wamar putayarusin, izichiranganaya. 7 Sheersin, uwshtisin Israelchichee tputs tsiyataranganaya; ¿Mayaamshitaja watsta táchich? watam iy naataranguni, tsap kizpur wanasir paranginiwa. ¿Tamareeja ashimaa chiyshat watsitpari táchich? 8 watam Apanll iyaa kapung chinaku wanasir ksutkuwa. Uru amb naakchuch, chiyaam kapung istachiya. Apanllsha iyaam anoo tsap wanasiree, maachi zapan katungats, mishat wakaratam mimir, kinduratam zapan taaru anoo chiyaamsha tsapuneemaritich panachiya. 9 Itaru, siysat mangutis tsiyantayarus, Apanll kamachtarangu anoo watsitparee, tárintspa.*Utaáshucheema 3.16 tsiyatsis nipta tatsamooru taaritamta. Mishat, ambchee tputs yaktashchee punirintspa. ¿Mayaamaja punichich? watam nda waritachinllinawa. Chiyamariparee pangaa katungtarich sheeruch kachingachchee. ¿Chakaja anshucheem tputs tapachindaku tapachindach? watam iyaatsina Apanll waana ksutaruwa. Ashiriya, iynaa Apanllirini taaru ¿mayaamshitaja punichich? tárangana. 10 Tputsshitisin anumand kapung tsiyantayarusin, ¿Mayaamsha amb atanaya? Pzaa, pachayaruni kasayani, tárangusin, patumbchee ashparitssin tputs yátartaranganaya. Yuwari sheechinllina anuritam Apanllsha, waanaatsi wizpur wanshu pang' Israelchichish shaniyshini tuyamandarangu kizpur 'sineerangiya, yuwash Israelshuch shaneerana anshu. 11 Apanllsha Móysisee, ¿Ashinshtaja nishuch tputs yuw nuwaa niyrkana anin yusur nuwash tachiteechinllina? Mishat, ¿ashinshitaja nuwaa kuki zurkupari Apanll atiya, atusin nuwamun mang' tateechinllina? Yuwaa kamachtaki anoo nda payukanawa. Nuwaanaatsi wanasirimshiri tuyamandaktaati, anoo nda yasakanaya. 12 Ashiriya, yuwamand ashkana anumand nuwshat tsutashish tsipatsimash zanganchima. Ashkachinaareena, ayamtaati Kanaanash tsap nda kuschinllinaya. Itaru, Móysisee, shiyaamamari kapung istachinllpa. Chinllineemaritish watsapun kizpur wanasiree yachinllinaya. Ashkatssin, waamaritin Israelchich kizpur taachinllinaya. Apanll tárangiya. 13 Itaru, Móysissha; Apaa, mangishish kaapa chinangcha, ¿watam shaana wizpurirpatish tputsireetsish Ijiptosh tsap tashitungarangshawa? Waanari tputsireetsish waneekchush, uru anoo Ijiptoshuchsha mazinakchusin, 14 waanpatatshitisin kaman, kaman ashkatssin, Kanaanshucheetstam tputs kamanchinllinaya. Watam shiy tputsireetsish kapung chinarangush, msasish tsapush karuwarangush, iyshat shiyaa kchiptaritani paranginiwa. Shaana iyaa imachirangush, ichingaru zar msas pantsatarangiya; kaschiritam, psaantam sumas ashiru kizpur 'sineerangiya. Ashiri amb ashirangush, ¿mayaamsha natsha shaantatam tputsee tpachingamaam zandaksha? 15 Itaru waanari shiy tputsireetsish shaantatam izuuru tpachingakchush, Kanaánshuchshapsinaya anoo mazinakchusin, waanpatatshitisin tsiyatkusin, 16 Apanlltaa ¿tamayanlla tiptsireetsi? Iyaa tsapunni Kanaanaa itutseeruri, siyaamsha Israelshucheemis panachintspa, tárangitaa, ndusha waritarangu, tiptsireetsimsha na izuuru apusap tsap tpachingayaru kasayanllu, táchpasinaya shiyaatsiya. 17 Ashiriya, Apaa, watsta. Tsiyaneetsish mbizangcha. Kapung tsiyantarinllpa, watam, Siyaam nuwaanpataa wizpuriri istachintspa, shaana tárangshawa 18 Mishat, Apaa, watam shiy nuw musá tsiyantama yasareezi, Tputsireetsi kapung chinakina. Tputs yutaritaatstaa nuwaa kuki nda payukana anootstaa, nuw kapung chinakuri yutaritshishirineetsi tachingina, tárangshawa, Apaa. Itaru, yuwaatsimari tputs shiyaa kukish kapeetarangsin, mantsirimash chinarangana anootsimari urutamari waneekush taachsha. Waparimand yutaritshishirini wipaatstam, wachinllinootstam, wachinllinootstam wip urutamari waniwantarush taachsha. 19 Ashiri Apaa, shiyamari, kchinamishtishcha. Nuw shiyaa mashkina. Natu mikeerush tputsee yutaritshshirini mbizangcha. Sirú tputsireetsish Ijiptosh tsap tashitungayashinush, yutaritshishirineetsi tachingarangush, ningsha yushindarangsha. Natsha ambitam shingcha. Móysis Apanllee tárangiya.

Ashiriya, na kamaneena yuwaa Apanll Israelchichee wanimaam zandarangtaa, Móysissha Apanllee waneerinllpa tárangu anootsi.

20 Apanllsha zuraktishcha. Yuwaa átish anoo mazinakina. Ashiri nuwsha tputsee yutaritshishirini tachingchima. 21 Itaru yuwaatsimari nuwaa kuki kapeetarangana anootsimari wanimaam waritaktana. Ashiriya, anin tputs nda ayamtaati yuwash nuw Kanaana tsap wanasirimshee ipusarangi anush nda taachinllinaya. 22 Nuwaa wizpuriri wanasirimshee parangitaatssin, ashiritaa nda nuwaa kuki payurangusin, izuuru ngataranganaya. Wanipaja nuw kamachtakuri xapoorangi; Ijiptoshtam tsap, apuspitam tsap yap naatarangana anshutam xapoorangitamna. Zapancha sheenllina. Antaati nuwaa kuki payukazinllinaja. 23 Ashiriya, nuw sirútama zitaminarneetsi, uru nuw siyachcheem chinllinis nee tsap Kanaana panachintspa tárangitaateena, ashiritaa natsha yuwamand nuwaa kuki kapeetarangana anumand ayamtaatiya anchich tputs minumtiyam nda Kanaanash tsap taachinllinaya.*Utaáshucheema 3.18 tsiyatsis nipta tatsamooru taaritamta. 24 Itaru, minumari nuw tputsiri, Kalebamari nuwaa kuki payurangiya. Izuuru zurampatari nuwaa k'keetsi tatsamoorangiya. 25 Itaru, siysa yap Amalekshuch, Kanaanshuchtam tándsamun taakana amb naarintspa. Nimandari pu zar wapitam kanapeerus, apusap tsap naangints, yap mus Chumbeepimash taaru ambi, Apanll tárangiya. 26 Móysisaa, Aaronpatari wanasir tsiyatarangiya. 27 Wanipaja nuw k'kuzee mantsirimshee mazinayanlli yuwaa Israelshuch nuwaa yutaritam ínaksin, mantsirimash tsiyatkana anootsi. 28 Ashiriya, shiyshat nuwaa kuki tputsee kamaningcha, Apanll shiyaa ateeja; Nuw Apanlltana; uru zurampatari k'keetsi tatsamchima yuwaa ashtachi anootsi. Watam nuw siyaa kukis mazinaranginawa. 29 Na ichingaru tputsee sur yandayaana, veintimandari masachirini yaru arang wachinawa annandari uru apusap tsap tsipachinllinaya, nuwaa mantsir tsiyatarangana anumandaya.*Utaáshucheema 3.17 tsiyatsis nipta tatsamooru taaritamta. 30 Ayamtaatiya, siyachich tputs nda minumtiyam, yap nuw tputsiri Kaleb, Josueypa taachinllina amb nda kuschinllinaya. Tsapoo nuw yap wanasiree zurampatari panachintspa tárangi ambiya. 31 Itaru, iparimarishtis yap siy kundarareetsis punikus, tsapoo wanasireetstaa ngatarangis amb, uwshtisin pshtuyarusin, undararee kachingeersin, watsapuneemarisha Kanaana tsap yachinllinaya. Maacheetsi aranginasha wanusee pzapanichinllinaya. 32 Siynaa machip apusap tsipakchus, ambiri napuris tamutamtachiya. 33 Ashkachus, iparshitis chinuzpan tputs tamatarpari ashirusin mangutari masarsin, apusap tsap xitangat ashkusin, 40 masach taachinllinaya. Ashkusin, siyamand wachinamandis yutaritshishiris kiyung kachiykusin taachinllinaya. Saantana wachinis tsiparamchus, anumun iwaz ashchinllinaya. 34 Watam siy tsapoom narkatus, 40 zar maarshinsawa. Anumandtam nuwshat 40 masach wayachima, siyamand yutaritshishiris tuwapamaama. Minumta zar, nuwshat minumtamsha masach wayachima. Amb sheeruri, kasachima yuwamand nuwaa yutaritam ínarangis anumanda. 35 Nuw Apanlli uru k'keetsi zurampatari tatsamchina. Uru nuw yutaritshishimand waneeyaruri kasachima, yuwamand nuwaa ichingarusin tputs mantsirimash tsiyatarangana anumanda. Ambiri apusap tsap waani tsipachinllinaya, átcha Apanlli, tángcha, Móysisaa tárangiya Apanlli.

36-37 Anumunshat, Móysis tiptsiree Kanaanaa tsap naramaam zanganirangu, uwshtisin kanapeeshinusin, ngicheeshtisin kamaniranganaya. Ashirucha, amb tárangusin, ichingashtisin tputs zapan mantsir tsiyatarangayana. Apanllsha anumand ashpartaa waneerangu, tputs 10 tsiparanganaya. 38 Tsimbunandamsha tsapoo naramapan, Josuey, Kaleb ashirusin nda tsiparanganaya.

Ashiriya, na kamaneena yuwaa Apanll Israelchichee waneerangu anootsi.

39 Móysissha tputsee ashpari Israelchichee yuwaa Apanll táyaru anoo kamanirangu, uwshtisin anoo mazinarangusin, ashparitssin kapung mang' mantsaranganaya. 40 Putamsha zar puturi káyarandsin, machipsha tsap káreerandsin, naataranganaya. Ambsha tsap kuseeramchusin, waanpatatshitisin, Natunaa nish machish tsap kuseeniya. Pzaa ashtaa arangsha tsap naayani yapsha Apanll iyaam tsapoo panachintspa tárangu ambi. Watam yaanaatsi zurampatari tayutaritaranganiwa, waanpatatin táranganaya. 41 Itaru, Móysissha; ¿Mayaamsha Apanllee kamachtamarini yusur kapeetaksa? Amb ashkus, saanaatsi aranginasha yusur tayutaritaksa. 42 Watsta arang naarintspa, watam Apanll siyaa izuuru kasamawa. ¿Chakaja siyaam istayach? Uru naakchus, siyaatsimari kundararis kachingchiya. 43 Watam na siyangaz amb Amalekshuch, Kanaanshuchtam pachapani atusin tsangakanawa. Itaru, siysat Apanllee niyrarangus, Apanllsha na siyaa izuuru kasama. Ndushat siyaam ksutkiya. Ashiri ¿na chakshitaja siyaam istayach? Móysis tárangitaa, 44 ashiritaa chawap nda mazinarangusin, aranginasha machip tsap káreerandsin, arang naataranganaya. Itaru, amb ashirangsin, uwinandari xunarsin, Apanllshari kajonarini naataranganaya; Móysisayam nda amb tachitarangiya; anshuri taarataraw ashirangiya. 45 Ashirucha, Amalekshuchshitisin, Kanaanshuchtam yuw amb taakana anin, Israelchichingaz tachitarangsin, machish tsap sur Hormash kamateersin, ashpari kachingeersin, kasaranganaya.

Ashiriya, na kamaneena yuwaa Kanaanshuch tputs Israelchichee Hormash tsap kachingarangana anootsi.

<- Masatarangana 13Masatarangana 15 ->