5 Mishat, ¿chak burroo kayustanee, arap apusap wayaranga? 6 Anoo nuwaantamari apuspichimaritam yap mangin ndunar chirichirinandari taaru, anush wayaranguri, arap wanitaritam wanllitarusin taakanaya. 7 An apuspiri wamsanpiri kis taakiya. Nda yaktash tputs zamamtarana, anoo mazinamaam nda zandkanaya. Mishat, tputsee kuk mazinamaam nduntam zandkitamta. 8 Anshurtatam machish taaksin, wazawash chirichiringaz wayaw katungpani atusin, nachungayarusin, katungkusin taakanaya.
9 Mishat, ¿nitaati tor kayustan shiyash kuseeru, kamiranaaja shiyaam tarawzu istach? ¿Nitaati yuwash chinish maaku, anshutam washunand chiniptish ipuneeru maacheeja? 10 Sheeru, ¿putamsha putayarush, wasikpa kamuriyarush, mzarpish macheerush, shiyaam tsapoo ichuychamaam istaycheeja? 11 ¿Antaati shiy, In tor wizpur kapungcha taaru, neem tarawzureetsi kasachima. Waani chingap átush, kasaycheezish? 12 Kasayarush, ¿wanus kayanakchu anootssha pusayaru, yuwashtam shaana tirikoo pusama xanatkish, anshutam xanateeru, kasaycheeja? ¿Tamari tor kayustan ashich?
13 Minootssha mashchinllpa: Nuw maachee kapungumash tinarangi, Apistros sura. ¿Anoo parangish? Wazitpungich wazuraneew, shambatku mang' kis tap, tap ashishtangat ashkiya. Kpurangamash tamapari ashiriya. Itaru, purangamaam pinasakiya. 14 Nuwaana chínashee tsipas wayaranguri, ngichtaku, yapiri waana zandku ambiri tsapumun ngichtayaru, wayangich wanitarisha zari ituwtakiya. 15 Nda pakchiyam mangush chinaku, wayangchireetsi, Kachuyarusinapa, nda átu, izuuru watstamari kasakiya. 16 Ndunpaz waana wipaa ashiru, nda ksutamaam waninda. 17 Nuw anoo chínasheem tsipas wayaranguri, ambiritam ashku taakiya. Nda wayangchee ksuteeru kanituwamaam waninda. 18 Itaru, an iripumaatssha kizpur yasariya. Tputs kapaachumuntaa kuxineeru kapaachsha iripuru, anoo waamari kasiriya. Kizpur wamari kasiru iripku, kapaachoo stakiya.
19 Minootssha, Jobaa, mashchinllpa. ¿Antaati shiy kapaachoom wizpur kapung wayarangish? Mishat, ¿chak kapaachoom watsurarish wiratungaru, wayaranga? ¿Ndusha nuw ashirangi? 20 Tapazish pshtumaam aturi, ashirangana. ¿Antaati shiy, Natu, taringsi, átush, kapaachsha pchich tamatarpari ashiru kizpur tsinga sheeru, tapazip iripeecheeja? Sheeru, iripuru, yusaku, tputsee tpuxtacheeja. 21 Kapaach kutamaam pinasakiya. Tsapoo waxizuppat tawang, tawang ashku, nda puniku, tapazish pshtumaam kizpur zandkiya. 22 Tputssha waanpatatin wachirurpat pachakaktarusin, zamamtarana, anoo kapaachsha pakchiyam nda puniku, anoo suwamaam nda waninda. 23 Sundar waanpatatin wasappa, misha k'chirpungpa kayungaktangandtaatssin, anoo suwamaam nda waninda. 24 Tapazeem chtamaam, wakarash wits puu, puu táyachinllina, anoo mazinakchu, nda anootsiri xiyaa ashimaam waninda. Waamasama yap naanllina amb iripunganll ashkiya. 25 Tputssha yuwaa undarar puu, puu táyarattana anoo yámku, kizpur zunganitara ashku, Natu, taringints, tákchusin, kapaachsha kis tapazish pshtukiya. Araptaa tapazpan urkar tsiyateeratana, wasundururee kamachtaku, anoo mazinakchu, tputsee kayungkusin, Ayi, átangatu, anoo mazinakchu, ashtaa anoo kapaach nda punikiya, watam nuw kapaachoo nda punimaam tinaranginawa. ¿Shiy antaati ashimaam tinarangeezish?
26 Mishat, arangeem mashchinllpa: ¿Antaati shiy yunganee purangamaam tayaspatarangish, araptaa yap mangin ndunari amb purangamaama? 27 Mishat, ¿shiy yunganee machip íwar ngichtamaam kamachtarangish? Nduni. Nuw kamachtarangina. 28 An patumbchish ixateeru anush ngichtakiya. Anshurisha wayangchee nda maachi muntamaam ksutku, wayangchishuri psaan maakiya. Kaschiritam nda kasamaam waninda. 29 Ashiriya, wixtamarimandarisha maachtam napanapaw ashkiya. Maachi naanatanu anoo pakchu, zayaru, katungkusin taakanaya. 30 Wipapa wanutsee kaneesaatsiritam katungamaam yasariya. Anumash urutari yuwash maachi zam tsipar tamuru, anush nda kasatariya. Watam nuw yunganee kaneesaatsiri katungamaam wayaranginawa.