Apanll Chtarangu 48

Ashiriya, na kamanchintspa yuwaatssha Akoparini wachinllinoom Osiyaam wip waanaatsi wizpurirni panarangu anootsi

1 Musásiritam, Osiysha tsiyatssee mazinarangu, Aparish kizpurtanda wanguya, tputs tárangiya. Osiysha anoo mazinarangu, wipaa tsimbunari yamayaranllu, Manases mishat Efrayin, ashiru waparish yushindarangiya. 2 Tputsshitisin, Akopaa, iparish Osiy shiyangaz tsiyatati átu, kuseenlliya, tárangu, Akopsha apinlliri chiyzataraa sheeru, wirmashuri kuxinta ashirangiya. Sheeru, wipaa Osiya tsiyatarangiya.

3 Mshee, Apanllimari kizpurcha.

Wamari kasiru kurak taakiya.

Sirútama apus yaktash Lusash, Kanaanshuri tsap, nuwaa Apanll tsiyatarangiya.

4 Nuw shiyaa chinakina.

Shiyaam kapung istachima.

Uru iparish zapan pzapanitsha.

Chinllinitamtish pzapanichtamsha.

Ashkachush, shiyaanandari chinllinish watsapuneemaritam, watsapuneemaritam, sheersin yachinllinaya, Apanll tárangiya.

Anush Apanll nuwaa kamanirangiya

yuwaa nuwachich Kanaanaa tsap waamatari watsapun payuchinllina anootsi.

tárangiya.

5 Na, shiyshat ningeem naatarangush, kizaa yamarangush, iparish wanindarangiya. Nuw ndatuma ningeem kuschuri, iparish urutari Efrayin, Manases ashiru nllurtaranganaya. Ashiriya, nuwshat ipareetsish tsimbunartaa nuwaana iparpazi Rubenaa, Simeónaa ashipaz ashiru ínachima. 6 Arang iparinakinaareesha ashiru, anootsina shaamatarisha iparish taachiya. Uwshtisin zoonllpa Efrayinpat, Manasespatatam washunand taachinllinaya. 7 Mishat, yuwapur Padán-Arammand tsap kanapurangani anpur Kanaanashshat tsap yakat Efrata kayumanasha aneerirnish zuwanlleetsish iparinayaru, anshurisha zureeru tsiparangiya. Nuwsha anshuri tsap mapurangina. Itaru, natsha anoo yakat Biringaa ísamaranganaya, tárangiya.

8 Anumun wachinllinootssha parangu, Mshee Osiyaa, ¿chakshitisinaya inee? tárangu, 9 Osiysha: Apaa, nuwcha ipari. Watacha Apanll nuwaam ipareemi nish tsap panaranganda anu, tárangiya. Akopsha: Iparish nuwanungitari tunuxinangi. Ipareemish nuwaanaatsi wizpuriri wanasirimshee panachima, tárangiya. 10 Watam anpursha Akop kizpur wachinarangu, wach arap pamaam pinasarangiya. Osiysha wipaa itataranllu, upachirinung wanumb tunuxinata, minootssha wip minungichich wanumbinung tunuxinata, ashirangiya. Akopsha wachinllinoo pachipeeru ishambta, minootssha ishambta ashirangiya.

11 Sheeru, wipaatssha Osiyaa:

Mshee, nuw sirú mangishi chinaranguri,

ayamtaati ndunpari ipareetsi pangchina, táranginatana.

Itaru, natsha Apanll nuwaam kapung istarangu,

shiyaa, ipareetstamtish pakeena,

tárangiya.

12 Wachinllinoo pachipeeru ishambarangu, anumun Osiysha wipaa yusur tawanlltarangiya. Sheeru, uwshat waparish wats tutunlltayaru, much tsapush kizpur timuchta ashirangiya. 13 Anumunsha, wipaa putsisarineetsi Manasesaa waparinung upachtam mbutsanungach tunuxinarangiya. Minootssha wip nllurarineetsi Efrayinaa mbazinungach tunuxinarangitamta. 14 Akoparinsha Apanllpa tsiyatpi átu, uwee mbutsanungach nllurarinimunshat much putarangiya. Uw mbazinungachsha charapungayaru, iwachiztamamun much putarangiya.

15 Sheeru, waanaatsisha wizpurirni wanasirimshee panarangiya.

Apanllimari kizpurcha.

Waamari wanasir zitaminaa pachirineetsi

Aprahamarinee, aparneetstam Isaakarinee wanasir ksutarangiya.

Uru Apanllish tachitarangana.

Yuwamandari nuw nllurtarangi anumandari nuwaa ksutarangu,

natsha in wandaritam nuwaa ksutkiya.

16 Apanll nuwaa pachindarangu, yutaritshish nda nuwaam tushiyrangiya,

tárangu, Apanlleetssha mashku,

Apaa, shiyshat nee nlluraa wanasir ksutangcha.

Nichich ayam nlluranur pzapaneekchusin,

ichingaru nuwachchinandari maachiriti taachinllinpa.

Nuwaanaatsi, Aprahamaarineetstam, Isaakarineetstam sur ayamtaati mbizarusinapa.

Waani nuwachichinandari tputs tsapurunasish ztaru taachinllinaya,

Akoparini Apanllee mashku tárangiya.

17 Osiysha yuwaa wapar nlluramunsha Efrayinamun uw mbutsanungach putarangu anoo nda kis parangu, waparee uwee itutseeru, putsisamunsha much wayarangiya. 18 Apaa, watsta. Amb shirinllpa. Manasesamuna kuwish mbutsanungach wayangi, tárangiya.

19 Itaru, Akopsha wipaa: Nduni, mshee. Yasartaati, nuwaana zandkuri amb ashkina. Manases uru kizpur taachu, wachinllin pzapanichtamparee. Itaru, kaapa zoonllimari Efrayin nllurataa waamari kasiru wachinllin zapan taachiya. 20 Ayam nuwachich nlluranur wipaam wizpurirnee wanasirimshee panakchusin, Apanllee mashkusin, Apaa, shiy tamaru Efrayinaa misha Manasesaa chinarangsha ambitam shingcha ipareemi, Apanllee mashkusin, táchinllinaya, Akoparini tárangiya. Amb tárangu, Efrayinaa iwachiztamaampaz ashiru ínarangiya. Manasesaatssha nlluraampaz ashiru wayarangiya.

21 Ashiriya, wachinllinoo tsiyatam iwatsparamchu, wipaatssha Osiyaa:

Mshee, natunaa musásirishapari tsipachina.

Itaru, tsipaktaateena,

uru Apanll shiyaa ksutchiya.

Waana shiyachchee nlluranur ayam yusur wapitam wayachiya

yaptam sirútama zitamin pachirinis taarangana ambitamtaya.

22 Na shiyaam kapung istachinllpa.

Shiyamari zuwanlleetsish ichingaroo kasirush taachsha.

Yuwaa Amorrewshuchee watsapun Sekemaa itutsirangi anootstam tsap shiyaamsha panachinllpa,

tárangiya.

Ashiriya, na kamaneena yuwaa Akoparini waanaatsi wizpurirni wachinllinoom panarangu anootsi.

<- Apanll Chtarangu 47 Apanll Chtarangu 49 ->