1 Dapiyarini wasundururee tácheeru, milosh sundar yuw kizpur kurakaa anoo ksutamaam wayarangiya. Anshuritam 100 sundar ksutamaam yuw tsipas kurakaa anoom wayarangiya. 2 Sheeru, wasundururee tuchip chawpishtayaru, zanganirangiya. Minam chawpishtarangu anoo kurakaam Jowabaam ksutamaam kamachtarangiya. Tsimbunarnishshat chawpishtam kurakaamtam Jowabaam zoonll Seroya wip Abisayaa ksutamaam kamachtarangiya. Tuchparinishshat chawpishtam kurakaam Gadshucheem tputs Itayaam sur ksutamaam kamachtarangiya. Aship sheeru, Dapiy wasundururee zangankachu, Itaru, nuwaptatampari naachchi, tárangiya.

3 Wasundarurshitisin, Nduni. ¿Mayaamaja shiy amb naachish? Shiynaa neetsiri taarapcha. Yaanitari naachinipa. Kundararish shiyaatsinaa sundarurish kaapa nda pachamaam zandkanaya. Apaz kundararish shiyaatsshat pakchusin, uru shiyaatsimari pachachinllinaya. Iysha suwakchuni, ndusha iyangzina tachitchinllinaya. Iyaatsinaa 10 milootsini tputsini nda pachamaam zandkanaya. Itaru, shiyaatsimari pachamaam chinakanaya. Shiyaatsimari pachakchusin, kapung mang' ksaksin 10 milootspaz sundar pachayarusina ashtachinllinaya. Anoomcha shiyaa neetsiri taarapcha, táshiniya. Sundar iyaam pishtakinaariya, nimandari shiysha tputsee zanganitsha, táranganaya.

4 Dapiyshat, Zuraktischa. Ashiri nuw neetsiri taapama, tárangu, yaktaa washitungash piyam ngootsee ktapuz xiyarangiya. Ashirangu, yuwshat milosh tputs minum kurak kizpur wayaku, anshuritam 100 sundar tsipas kurak wayaku ashirangu, anshitisin naakchusin, shitungaranganaya.

5 Dapiyshat Jowabaa, Abisayaatstam, mishat Itayaatstam yusur tsiyatarangiya, yuwaa tuchip kurak kizpurinand naakchinllina anootsi. Nuwaa chinakinaareesa, kaapanaa ipareetsinaari Absalonaa pcharintspa, tárangiya, Sundarshitisin ichingarusin yuwaa Dapiy wipaa pachamaam pachindarangu anoo mazinaranganaya.

6 Dapiy wasundurur Israelchicheem pachakatssin, Efrayinarinpini watsapun naataranganaya. 7 Anushshat, Israelchichish pshturangusin, Dapiy wasundurur zapan Absalonaa wasundurur pacharangusin, washunand 20 mil pacharanganaya. 8 Anshat waanpatatin waratarangsin, tputs zapan manginash tatsitarangiya. Ashirangsin, manginash zapan tsiparangusin, machinsha waanpatatin m'chitpa pacharanganaya. 9 Absalonsha kapaachumun muúlamun kuxinaranllu, naantach ashirangu, yap nda chinaru anush Dapiyaa wasundurur chamayangarangiya. Anoo puniku, muúlshat piyamshat manginap teet ashku, mantsirishshat pshtukamchu, Absalonshat much yasinash wapzar sarichirangiya. Ashkachu, muúlshat arang teet ashku Absalonaa anshuri tsharangiya. Ashirangu, Absalonshat anshuri much saricheeru, yuwarshat kambiptaramach ashirangiya. 10 Sundarsha anoo parangu, Jowabaatsshat kamanirangiya. Absalon yasinash much saricheeru, yuwar kambiptarpa, mang tárangiya.

11 Jowabshat mazinarangu, Ashiriya, ¿mayaamsha nda anuri pareesha pachayarush kasasha? Ashkinaareesha, nuw mangi kisparee. Yuwamand pacharangish anumand nuwshat shiyaam kurikee 10 mbammash yáyaruri, mishat kichpushitam yuw kizpur wanasirimshi anoo panachinlla, tárangiya.

12 Itaru sundarshat, Nuw ¿tamari kurakaa kuk mazinanlluri, amb nuw ashtachee? Watam iy ichingaruni yuwaa Dapiy shiyaa, Abisayaatstam, mishat Itayaatstam, Nuwaa kuki mazinangtsa. Ipareetsinaari Absalonaa pchamanaa pcharintspa, tsiyatku, tárangu, anoo mazinaranginiwa. Ashirucha, shiy nuwaam zapantaati kurikee 10 miltaa mbammash panakush, nuw anoo nda ayu táchina. 13 Nuw pachakchinaareena, kurakshapa yasakchu, nuwaatsshat kamachtachiya. Pachayarush ksangcha, tákchu, shiyatamshat nuwaa pachatsha, tárangiya.

14 Jowab anoo tsiyataramchu, ¿Mayaam anoom ngutish tsiyatstapich? Pzaya, Ashtaa, pachayani, táyaranllu, naanataa sheeranllu, wandaritam much yasinamun wapzar sarichiru, kambiptaru parangiya. Ashiriya, uwshat turuwpat mangoo tuchip kayungarangu, Absalonshat nda musá tsipaku, anuritam kchit kambiptar ashirangiya. 15 Yuwshtisin Jowabaam istampan tachitarana, anshitisin izuuru pachayarusin, kasaranganaya. 16-17 Anshat pacharamchusin, Absalonaa wanuts yáyarusin, manginapshat mantsirish tsap wach kawaru anush tapshuyarusin, anumun patumbichpashat wachoo kámanayarusin, kasaranganaya. Sheerandsin, Jowab tiptsiree kukunamaamshat kamachtarangiya. Anumandarishat, Israelchichee ndushat arang tachitarangsin, watam Jowab watsta táranguwa. Israelchichshitisin anoo mazinarangusin, kapung punirangusin, waptam pangup suwaranganaya.

18 Absalon kchitama, waama mapshissheem tinamaam tputsee kamachtarangiya. Kurakash mapshini tinarangiya. Kizpur wanasir tinayaru, waanaatsi sur anumun yandarangiya. Wip nduneeru, sur minamari yandarangiya. Wandarit anush pshkuru pataraniya. Itaru, uru kurimunaz taakiya.

19 Sadokshat wip Ahimaas Jowabaa tsiyatarangu, Nuw shiyaa mashkina. Nuwma kurakap teet sheeri kamanitama, Apanll wizpurpat na kundarareetsish tachiyarangiya, tátamasima, tárangiya.

20 Itaru Jowabshat, ¿Antaati shiy anoo kamanimaam waritarish? Nda. Minushparee zar shiyaam kamanimaam waritachiya, watam na kurak wip tsiparanguwa, tárangiya.

21 Ashiriya, Jowab wasundurureetsshat Etiyopee kuruzeeru, Shiynaa yuwaa nish ashpari parangish anoo kurakaa kamanishini, tárangu. Etiyopshat anuritam kamankatu kurakap iripurangiya.

22 Ahimaasshat yusur Jowabaa masharangiya. Ashtaa, nuwshat Etiyopimun ush tachiteeruri pangatama, tárangu, itaru Jowabshat, ¿Shiy mayangazshat amb naamaam zandaksha? ¿Tamati átshasha? ¿Ambtaati naayarush mayshtaja yáyachish? tárangiya. 23 Ahimaasshat, Ashiritaata, napatama, watam nuwaantari napamaam zandkuri tinawa. Ashiri napachtandi, tárangu, Jowabshat, ¿Tamanda? Naamaam zandkush, napashini, tárangiya.

Ashiriya, Ahimaasshat anuritam tándsapiri iripurangu, Etiyopee arangeem kaneeru imazarangiya. 24 Dapiysha iwanung yakat washitungash tsimbun wach kawaru annung apusash kuxinxinaw ashirangiya. Yaktaa washitungash ksutamapanshat tandapunuzimun yuwar kuxinxinawu, napanapaw ashirangu, tputs arap minamari káyashinu iripeeshinu, anoo parangiya. 25 Anshat paranllu, kurakaatsshat, ¿Tamaki tputs ashtar? Minumari káyashinu iripeeshinsha, tárangiya. Dapiysha, Minumaritaya káyashinu tsiyatsis wanasirtanda payuru shitaranllu, tárangiya. Anshat yuwaa tputs watsiritataranllu anoo, 26 yusur ksutamapan arang nap ashku, mishat tputs minamtam káyashinu iripeeshinu parangiya. Anootsshat parangu, yusur kurakaa, Min anuwaa tputs arangeem minumtam káyashinu iripeeshinu, tárangiya. Kurakshat an tputs nda mangu naanllpa. Tsiyatsis wanasiritamtanda payuru naanllu, tárangiya.

27 Ksutamapanshat parangu, Yuw imazaru naanllu anu Ahimaascha Sadok wipaya, tárangiya. Kurakshat Ahimaas tputs wanasircha. ¿Tamama tputs tsiyatssee wanasirimash payuru kusach? Napa: Nuwangzimari kamaniti átu naatiya, tárangiya.

28 Anshat Ahimaas kurakash kusarangu, kurakanung wats tsapush tutunlltayaru, much timuchta sheeru, Apanllimari kizpurcha. Shiyaa chinarangu, na kundarareetsish waamari kasirangiya, tárangiya. 29 Dapiyshat, Wanasircha. ¿Natuwa? ¿Iparshitinawa? ¿Absalonaa na tamara? tárangu. Ahimaasshat, ¿Mayaatsimasaja? Jowab nuwaa ningeem tsiyatsseem kamanimaam zangankachu, anshumaritcha ningeem naakchuri, zamangarandsin mazinanshina. Itaru, nuw nduntam yasarina. ¿Mayaatsimasaja táranllina? tárangiya.

30 Kurakshat, Neetsiri piyam xiyangimasi, musápa, tárangu, Ahimaasshat ayu tárangu, anootsiri piyam xiyeeru kutarangiya.

31 Anshat musásiritam Etiyopshat iriputaranllu kusarangiya. Kurakaatsshat, Shaana tputsirish tsiyatssee shiyaam zanganeeru, anoo shiyaam kamankatina. Apanll shiyaam kapung istarangiya. Yuwamand shiyaa kundararish kapung natsamaam zandarangana anumand Apanllshat kapung anshuchee tputs waneerangiya, tárangiya.

32 Dapiyshat Etiyopee, ¿Natuwa? ¿Iparshitinawa? ¿Na tamara? tárangu, Etiyopshat, Apanll waana zandku, kundarareetsish ichingarusin nllur tamapari ashisha taachinllinpa, kamapshimpa kamanku tárangiya.

33 Dapiyshat anoo mazinarangu, kapung mang' mantsarangu, nungtarangiya. Watandpunupshat káreeranllu, ambiri maaship kárkachu, wachup tanunukach ashirangiya. Tanuku tárangiya, Iparinaa Absalonarinaa. Iparinaa Absalonarinaa. Sitatsti, ipari tsipayanllu. ¿Mayaamsha nllurinaashtish tsiparangsha? Nuwaanacha wachini tsipakuri wanasiriya, tanuku ákamach ashirangiya.

Ashiriya, na kamaneena yuwaa Absalonarineetsini pacharangana anootsi.

<- 2 Samuela 172 Samuela 19 ->