2 Utaáchich Kuraka 22

Ashiriya, na kamanchintspa yuwaa Osiyas Utaásh kurakaam kinarangu anootsi

1 Ashiriya, Osiyas nllurari masachirini 8 taaru, anush kurakaam ínaranganaya. Kurakaam kinarangu, Irusarinash washunand 31 masach taarangiya. Wanir sur Jedida, Adayasarini wipa. Ansha kiz Boskatshuchimuna. 2 Osiyas kurakaam kinarangu, kizpur Apanllee kuk payurangiya. Sirútama zitaminarini Dapiyarini Apanllee kuk payurangu, uwshat ashirangitamta. Apanllee kuk wanasir tatsamooru payurangiya; nda pakchiyam kapeetarangiya.

Ashiriya, na kamaneena yuwaa Osiyas wanasir taarangu anootsi.

Ashiriya, na kamanchintspa yuwaa Apanllee wirkar kamachtamarini Apanllish pang' yarangana anootsi

3 Kurak Osiyas 18 masach kurakaam kinaru taachu, anush Safanaa Apanllip pang' zanganirangiya. Safan kirakaa yandampanimuncha, Asariyas wipa, Masulama wachinllinu. 4 Osiyassha, apanllpanip urkar Hilkiyasap tsiyatssee kamanishini. Shiy Hilkiyasaa, anush Apanllish pang' kurik taaru anoo yáyarush, Apanlleem pang' yaramapaneem panangcha. Mishat, yuw tputs pshtumaam tuwaparangana anootstam yáyarush panangtamcha, 5 anpa kurik Apanlleem pang' yaramaama,

yuwaam tputs Apanlleem pang' tarawaztakana anoom tuwapamaama,

6 misha yuwaamtam tputs táwara wanasir sipichtaku anoomtam tuwapamaama,

misha pangupaneemtam tuwapamaama,

mishat karipanaatstam paxanxamaama,

mishat patumbcheetstam paxanxamaama.

7 Amb ashkush, nuw nda shiyaa kurikimand tamundachinllpa. Kurikpatari tuwapakush, ¿mayaamaja kirakaa yámandanda, táchee? Watam shiy wanasir chinakush, nda shuchikshawa. Nuw shiyaa mapiykina, átcha, tángcha, kurak tárangiya.

8 Ashiriya, Safansha Hilkiyasap kamankatu, naatarangiya. Anush kuseeru, apanllpansha urkar Hilkiyas Safanaa tárangiya. Apanlleem pang' tarawaztakuni, nee kirakaa Apanllee kamachtamarini yuwaa Móysisarini yandarangu anoo parangtanicha. Watatcha in kiraka, tárangu, Safanaam panarangiya. Safansha kirakaa yáyaru, ashchiri natstarangiya. 9 Anoo kiraka natstarangu, kurakaa Oseyasa kamanirangiya. Apanllish pang' ichingaru kurik taarangu anoo yáyarusin, anootssha kchayashtisin, kurik mbammasheem tinayarusin, yuwaamsha tputs pangukana anoomshat tuwaparanganaya. 10 Apanlleem pang' tarawaztaksin, anush Móysisirinee wirkaree parangana. An neewa. In watacha, Oseyasaa tárangu, Safan anoo kirak natstarangiya. 11 Ashiriya, anootssha Osiyas Apanllee kamachtamarini mazinarangu, kizpur mang' mantsaku, wamaree putayaru izichirangiya. 12 Ashiriya, anuritam Hilkiyasa, misha Ahikama Safanarinee wip, mishat Mikaysarinee wip Akbora, misha yandampanee Safana, mishat Asayasaa kuraka wipunash ashpari kamachtarangiya. 13 Naturi naayarus, Apanllpa mashangints nuwaama, misha tsapuneemtamani, misha Utaáchcheema. Ashiriya, ichingaru Apanllpa mashantsa yuwaari kirak átu anurita. Na in Apanll iyapa kizpur tsiyantakpari, watam sirútama iy zitaminarani nee nda tuminuranganawa, tárangu, 14 uwshtisin ashpisin Huldap Salumap wizanll pakatssin, naataranganaya. Hulda Apanllee kuk kamanimapani taarangiya. Saluma Tikbarini wipa, Jarjasarini wachinllinu. Salum apanllpanee wamari ichingaroo Apanllish pang' taarangu, anoo ksutarangiya. An Hulda Irusarinash taarangiya. Itaru, minungichich watandaram yakat taarangiya. 15 Huldash kuseersin, anoo kamanirangsin, uwsha kizsha, Nuw siyaa itsinsaru Apanllee kuk kamanchintspa. Apanll Israelchichee kizpur chinakiya. Ashiriya, kurakaa kamanincha. 16 Apanll ateeja. Nuw Apanlltana. Nuw anush tsap kuseeruri, tayutariteeruri, kasachima. Yuwari kirakash kamanku anuritam ashtachima. Ichingaroo Utaáchchee tputs kiyung yachachima. 17 Watam nuwaa kuki kasaranganawa. Ashirangsin, minootsshat apanllputseem kzammashee mucheersin ungirtaranganaya. Anumand nuw kapung tsiyantarangina. ¿Antaatiya anoo tputs tsiyantakachuri, tsiyani ayamtaatiya pastacheeja? 18 Mishat, siysa Utaáchchee kurak kamaningtsa. Apanll ateeja. Yuwamand shiy nuwaa kuki payurangish anumand shiy mapiyrush tsipachsha. 19 Shiy nuwaa kuki mazinarangush, kapung mangish mantsarangsha. Kamareetsish izicharangush, tanurangush, nuwaa masharangsha. Shiy nuwaa kuki tuminumaam zandarangsha. Itaru, Utaáchchee zurampatari tayutariteeruri, wanichima, Apanll shiyaa átcha. 20 Nuw Apanlltana. Nuw shiyaatsinaa wanasir wayachinllpa. Shiy ndushapari kiyung kachiyachsha. Mapiyrush tsipakchush, zitaminap naatsha. Ndatuma yutaritshishee parush, ndaturi Utaáchich tputs kiyung kachiyarusin, shiyma tsipachsha. Ashiramchush, anumunaapari kushimunish yutaritshish kuschiya, Apanll átcha, Hulda Oseyasaa tárangiya. Ashiriya, tárangu anoo mazinarangusin, an yusur kurakap wapitam kanapuranganaya; Apanllee kuk kamankatssina.

Ashiriya, na kamaneena yuwaa Apanllee wirkar kamachtamarini Apanllish pang' yarangana anootsi.

<- 2 Utaáchich Kuraka 21 2 Utaáchich Kuraka 23 ->