Hebreo chachillachi
pilla kiika

Dios ya' Na' mityalalanu pantsuve.

1 Yumaa tinbunu lala' aa-apa millalanu Dios ya' mitya pamu rukulanu tsandikaatu, pure' bijee pakaamuwaave, tsenmin naake vee vee keeware' pakaanu ju'ba tsa tsanguemuwaave. 2 Tsaaren challa entsa de-inu tinbutalaya ya' Na' mityaa lalanu pave. Juntsa ya' Na' mityaa ti bain dekive, tsenmin naa ti juu bain yanu tene detaa shuikenu tireve. 3 Yaa Dios naaju tsamantsaañuba juntsaa keewarave, tsenmin Dios ura naajuñuba yaa entsaave ti' keewara jumuve. Yaa ya' palaa pudeechi ti juutala bain naa naa-inuuñuba tsanguikaren tanave. Tsejtu bene lala' ujcha depitsale' dyatu, selusha Diosa' chuchudinu chunjuu urandyasha chudive.

Diosa' Naya anjeelanu kayu pulla.

4 Diosa' Naya anjeelanu kayu pulla bale juu tiyaive, yaa kayu Dioschin juntsaanuu kura' mitya. 5 Matyu Dios naaju anjeelanuba entsandityuwaave:

Ñaa in Nave;

ñunu uma ke' kujteyu.*

Tsenmin ma anjeenu laapu' ne entsandibaindityuwaave:

Iya yachi apa junu tsuyu,

tsenmala yaa inchi Na junu tsuve, † tityuwaave.

6 Tsenmin yachi balenguramu Nanu, selusha mamikandu‡selusha mamikandu tityumujchi, veelaa entsangue aseetanguemu deeve: tusha ya' Nanu erendu. Naa tsaañu bain, Hebreos 2.5nu lende. entsandive: Dioschi kumuinchi ya' anjeela bain yanu teedi' aawa dekuresa, tive.

7 Tsejtu anjeelanu laapu' patuya, Diosa' Kiikanu entsandive:

Ya' anjeelanu ishuwa juuñuu tirekemuve,

tsandityu'ba, yachi tiba taawasha kemulanuya ñi llu'kaya juuñuu tirekive, § timuve.

8 Tsaaren ya' Nanu laapu' pamiya entsandive:

Dios, ñu rei ju' naa-uwanuba tsaa tsananu tsuve,

tsenmin ñu rei ju' mika deechu' kemuve.

9 Ñuya uraa tene kenu tyamu' mitya,

tiba firu' jumunuya anbuindyamuve.

Tsa' mityaa iya, ñu' Dios, ñunu mi'ke' kayu;

tsangue' kayu ñuchi ura' kera chachillanuba

pullake sunden puiteyu, * tive.

10 Tsenmin entsa bain tsandive:

Ñu, Bale Ruku, uma ajke' peepunu uwanuren tu kemuwaave;

tsenmin ñuren kai'sha tiba jenamulanu bain dekemuve.

11 Kumuinchi juntsa de-i' pinu tsuve,

tsaanuren ñuya naa-uwanuba tsananu tsuve.

Kumuinchi juntsala jalleeba ju' de-uinbu' kan tsanguenu detsuve;

12 juntsalanu uinbu jalleeba dejuñu dyajpiityulin tsanguenu juve ñu;

juntsalanu jalleeba dejuñu vera mavete' panan tsanguenu tsuve.

Tsaaren ñuya tsaren ju',

naa-uwanuba tsananu tsuve.†

13 Naaju anjeelanuba Diosya jaiba entsandityuwaave:

Ñunu kundaa tyamulanu,

kayu ñu' neepa teetanainsha detsungarendyuya

ñu in urandyasha chudide, ‡ tityuwaave.

14 Matyu naaju anjeelaba Dioschi tiba kiikenu eramu deeve, livee inuu chachillanu kivetes nemula.

HEBREOS 2 ->

Hebreo chachillachi pilla kiika

Hebreo chachillachi
pilla kiika