7
Yusuja cuanaque equetiju huenetanacuareque
1 Jadya juu jadya juatsu tuque bacuare Yusu tsahuaqui cuanaque. Bacuare tuque pushi yahuaju pushi emajaca eque cuejiji cuinanaya eque junetibareyaju. Tunaradyatu tachicuare cuejiji, ni ejequeja yahuaju cuejiji juishu ama, enaja ecuaque pei ishu ama. Bucucushacuare amatu ni ejeque acui buchique cuejijira.
2 Yusura tuna cuatsashacuare yahua, cueri cuanaja ecuaque jadya yuamatura ishu. Tumebaedya tuque peya banucacuare Yusu tsahuaquique ijeti cuinanaya eque amaca equeque jeyaju. Yusu Neri jaque jadya ehuene bacuare junetiyaju. Jeeque Yusu tsahuaquiradyatu peya cuana casada quiquecuare yahua, cueri cuanaja ecuaque jadya yuamatura ishu ecuatsasha cuanaque:
3 —¡Neihuacue jari! Neyuamaturaume jari yahua ni cueri cuanaja ecuaque ni acui cuana jadya. Icuene tuque ecuanaja huenetaqui jari ai equetiju Yusuja cuanaja, tuja cuanaque jadique adeba ishuque, —jadya tujatu ecana acuare.
4 Bacacuare tuque cuejayaju eje uma ehuenetana cuanaque. Israeljatu anicuare peadya tunca beta earacana ebacua cuanaque. Tuna eque ejuracana cuanaquedya tuna israelita cuana. Anicuare tuna 144.000 ehuenetana cuanaque. 12.000 peadya ebacuaque cama eque juracanahua cuanaque.
5 12.000 tuna huenetanacuare Judá eque ejuracana cuanaque,
12.000 Rubén eque ejuracana cuanaque,
12.000 Gad eque ejuracana cuanaque,
6 12.000 Aser eque ejuracana cuanaque,
12.000 Naftalí eque ejuracana cuanaque,
12.000 Manasés eque ejuracana cuanaque,
7 12.000 Simeón eque ejuracana cuanaque,
12.000 Leví eque ejuracana cuanaque,
12.000 Isacar eque ejuracana cuanaque,
8 12.000 Zabulón eque ejuracana cuanaque,
12.000 José eque ejuracana cuanaque,
12.000 Benjamín eque ejuracana cuanaque.
Jadya tuna jucuare.
Jetiama ecuita una pajaqui cuanaque bacuareque
9 Jadya juu jadya juatsu tuque petacuare. Bacuare ecuita cuana jetiama. Dutya epu cuana juque, yahua juque jadya tuque jeyaju batsacuare. Anicuaretu dutya yana eque quisaratiya cuanaque. Jetiama piyebatilla tupu ama tuna jucuare. Bacuare tuna Yusu Dutya Cuatsashaquija yacuaju, tumebaedya UHUISHA BUCHA IYETAE ATAHUAja yacuaju jadya netibareyaju. Pajada una tsehue ecajututi tuna bacuare. Ejaqui cuana inatsu tuna netiyaju bacuare pureama juyaque. 10 Jadya tuna quique eque jucuare:
“Miquemi Yusu ecuanara muiyaque.
Miratu cuatsashaya dutya.
UHUISHA BUCHA IYETAE ATAHUA eque mira ecuana Ijahua quejaque inajacamerehua ecuana miatsehue anidiru ishu”,
jadya tuna jerucuare.
11 Yusu tsahuaqui cuanaratu tabucuare eaniqui cacuatsashati ishuju anibutehuaju, Yusu mui juya cuanaque, pushi bape bape butsequinie cuanaque jadya. Dutya riya cuanaque barepaju Yusu tsahuaqui cuanaque tuna yahua queja huipuchitanabare jucuare eaniqui cacuatsashati ishuju anibutehuaja yacuaju. Pureama tuna acuare Yusu.
12 “¡Jadidya mique!
Pureama mique ecuana aya.
Dyaque jida, casada jadya taa mique.
Miquemi dutya bahueque.
Yusurupai mique ecuana ajacaya ama.
Muiya mique ecuanara.
Miquemi dyaque casadaque.
Micuetu dutya ai ataqui.
Miquemi Yusu ecuanara muiyaque.
Jadya mique ecuanaja ajacanime ama.
¡Jadidya paju!”
jadya tunajatu Yusu acuare.
13 Tume Yusu mui juyara bacaduracuare:
—¿Adebayadyami riya cuanaque una paja jutu jadya cuanaque? ¿Bahuemi ejuque tume cuanaque jeyaque? —jadya tura acuare.
14 —Aijama, tata. Midyami bahue, —jadya tuque acuare.
—Riya cuanaque ri Jesús queja nimee jujacahua cuanaque ama, arepa peya cuanara tuaqueja catyatihua baatsu dyaque nerecaturahua ama bucha. Yusura tunajatu jucha cuana apupashahua, tunara Jesús majuhuaque, tuque tuna jiteque ami quijehuetihuaque ejenehua tibu. Iyacua tuna una pajaqui, jucha metse ama jadique adeba ishuque.
15 Jadya tibudya tuna eaniqui cacuatsashati ishuju aniyaja yacuaju netibareya. Huecada tupu, meta tupu jadya tunajatu Yusu mereya. Tuque tuja eaniqui cacuatsashati ishuju aniyara tujatu ecana naruya ni eje tupu narujaca ishu ama.
16 Aracara, ijicara jadya juatsu tuna nerecada junucaya ama. Ni eje tupu tuna ijetija uquera nerecaturanucabuque ama.
17 UHUISHA BUCHA IYETAE ATAHUAQUE Yusuja eaniqui cacuatsashati ishu tuyu netiyara tuna naruya, tachiya jadya aya. Uhuisha naruquira tuja uhuisha cuana enaruu bucha, narue tujatu ecana aya. Tura tuna ijimereya ecuana chacha anishaqui juyaque. Yusura tuna nime aputashaya dutya tuna nerecada juya cabatitsu pacuare cuanaque, —jadya Yusu mui juyara acuare.
<- APOCALIPSIS 6APOCALIPSIS 8 ->
