APOCALIPSIS

Riyaque quirica ri Juan, Jesúsja emepera huenecuareque. Patmos cububuju erisi neticuare patya rejari huenecuare. Tuhua patu ijehuetanacuare Jesucristoja quisarati cuejahua tibu.

Riyaque quiricaju ri ehuene eje bucha judadibuqueque. Yusuratu Juan bamerecuare tuja huene ishu. Terehuie patu dutyadya jutidya dyaque jidama judadibuque. Jadya tibutu Cristo cuitadya junanucabuque. Tuquetu tuja casa tsehue dutya jidama cuanaque ijahue eatilla junabuque. Turatu Satanás pana ijahue dutyaju anabuque.

Capítulo 2-3ju tu Jesús queja ecatyati cuanaque pacarucu epuju aniya cuanaja ishu cuadishatanacuareque. Bahuetu ecana amerecuare jucha cuana, tunaja jucha aniyaque caadebatitsu tuna Yusu queja canerecati ishu. Capítulo 4-5jutu Juanra huenecuare Cristo, Yusuja yacuaju pureama atanadadiyaque. Cristo tu UHUISHA BUCHA IYETAE ATAHUAQUE bacani. Baba cuanara uhuisha iye bahue jucuare bucha jucha cuana tsujetyaqui, jadidyatu Cristo majucuare ecuanaja jucha cuana tsujetyaqui.

Capítulo 6-18ju tujatu riyaque yahuaju eje bucha nerecadae judadiyaque cuejaya. Capítulo 19-20ju tujatu bahuityaya Cristo ECUARI DYAQUE ARIDAQUE, Satanás tuja casa tsehue ijahue ara junanucabuqueque. Capítulo 21-22ju tujatu cuejaya Cristoja cuanaque dyaque jida, pureama jadya barepaju judadibuqueque, yahua iyacuaju tuque ecuanara muiyaque.

Umae versículo cuana jida cabahuityati ishuque ri: 2.10; 3.20; 5.9-10, 12; 7.10, 12; 12.10-11; 19.6-8; 20.6, 14-15; 21.4, 8, 22-27; 22.20.

1 Ecuanaja Etata Yusura ecuana tuque merequi cuanaque bahue amerecara acuare masadama riyaque yahuaju judadibuqueque. Ique Juan Jesucristo merequique. Riyaque quirica ri Jesucristora eje bucha judadiyaque cuejacuareque. Yusuratu bahue amerehua ecuana bahue amere ishu. Jesucristoratu cuadishacuare etsahuaquique barepa juque ique bahue amere ishu. 2 Era micuana cuejaya riyaque yuneri cuitadya era bahuaque, micuana eje bucha judadibuqueque bahue juishu. Riyaque rique ecue yunerique Yusuja ecuejaque Jesucristo eque ejitaju eaque.

3 Dyaque jida paju ejera riyaque Yusuja quisarati isarayaque. Tumebaedya dyaque jida paju Yusuja ecuejaque quisarati isarayaju bacaqui cuanaque. Tumebaedya dyaque jida paju riyaque quiricaju isaratsu ehuene eque aniya cuanaque. Dutya ecana jida paju, dutya riya cuanaque masadama jadya judadiyaque adebatsu.

4-5 Ique Juanra rique micuanaja quirica cuadishaya Jesús queja ecatyati cuanaque Asia yahuaju pacarucu epu cuanaju aniya cuanaja ishu. Yusura, pacarucu espíritu cuanara, Jesucristora jadya jida tsehue nenarucue tunaja quiyuhuebati tsehue. Tunara inime tsapema neanishacue. Yusu tu yuequedya anihuaque dutya ai eiyaque bucha ama. Aputabuque amatu ni eje tupu. Pacarucu espíritu cuana tu Yusuja yacuajudya. Jesucristoradyatu peya cuana Yusu eje buchique cuejajacaya ama. Tudyatu emajuque netitsurametse juhuaque ni eje tupu majunuca ishu ama. Turadyatu cuatsashaya dutya riyaque yahua juque cuatsashaqui cuanaque. Cristora ecuana iyuhueda baya. Yusura tuque ecuanaja jucha cuana apupashaya Cristo curusuju majuhua tibu, ecuana jiteque ami quijehuetihua tibu. 6 Jesucristora ecuana ihuarahua tuja yana atsaqui juishu, tuja Etataque Yusu mere ishu. Ecuanadya ecuana enaruqui jubuque tuatsehue tuque enaruqui juhuaju. Neajacara ama Jesucristo riyaque quisarati tsehue: “Miquemi dyaque jida, dutya ai aniyaque dyaque casadaque”. ¡Jadidya paju!

7 Nebacacue. Cristotu junanucabuque barepa huani ducu eque. Dutyaratu batsabuque. Dutya tuque iyequi jucuare cuanaratu batsabuquedya. Dutya ecuita riyaque yahuaju aniya cuanaquetu pabuque tuque batsatsu. Bajida tuna jubuque tuque tuna nerecaturara cuana jeya bucha baatsu. Jejee, jadidyatu jubuque. 8 Yusuja tu quisarati: “Ique dutya ai iyametsequi juhuaque, dutya ai tilladadiqui juyaque jadya. Ique letra A-Z buchique”, jadya tu Ecuana Cuatsashaquija quisarati. Tuquetu Yusu. Tujatu dutya casa aniya. Tuquetu yuequedya anicuare. Iyacuatu aniya. Anisiribuque tuque.

9 Ique Juan; micuana tsehuequique ique. Yusu tu ique metseque, tumebaedya micuana metseque. Jesústu ecuana jiteque nerecada juhua. Tumebaedya micuana ique jadya ecuana nerecada juhua tuaqueja nimee juatsu. Dutya rique ecuana iduya abacada tsehue tuaqueja catyatijacatsu ama. Huaraji cuanara ique ijehuecuare ecububu Patmos bacaniju ique nerecatura ishu, era Yusuja quisarati tsapeya baatsu, yunerique Jesúsja ecuejaque. 10 Dumicu huecaca tuque ecuique inime ama inime tupuqui acuare, Yusuja Espiritura inime tupumereyaque. Ecue etibene queja tuque bacacuare etsuri jebudaque, corneta tsuri bucha.

11 —Ique dutya ai iyametsequi juhuaque, dutya ai tilladadiqui juyaque jadya. Ique letra A-Z buchique. Hueneajecue mira petayaque. Tume cuadishacue tumeque quirica mira hueneyaque Jesús queja ecatyati cuanaja pacarucu epuju aniya cuanaja ishu, Efesoju, Esmirnaju, Pergamoju, Tiatiraju, Sardisju, Filadelfiaju, Laodiceaju jadya, —jadya ecue etibenejura acuare, yume tucue Jesúsra.

12 Huarerecuare ique eatsehue quisaratiyaja etsuri bacatsu, tuque bacara aatsu. Tume huareretsu tuque bacuare pacarucu ude cuana nityaqui cuanaque oro eaque. 13 Tumeque ude cuana nityaqui cuanaque patyadyatu neticuare peadya ecuita jiuque. Tura jutuyaquetu jucuare junuda ehuachi eque cuita. Jucuare tujatu cinturu oro eaque quinida yacua eque cuita. 14 Etsaru tuja tuque bacuare dyaque pajada. Yatuca bacue tuja etiqui juju bucha. 15 Ehuachi tuja tuque metal tiquidaque bucha bacuare. Etsuri tujatu dyaque jebuda jucuare tiritiya bucha. 16 Jida eque amaca tujatu inacuare pacarucu purari cuana. Tuja yatsanaca eque bacue cuinanacuare quiyeti ishuque beta eque jacuaque. Ebutsequini tujatu jucuare ijeti casada tsehue pujetanayaque bucha.

17 Jadya tuque baatsu rihuicuare tuja ehuachiju emaju bucha. Ique jadya juhuaju tura tuja emetucu jida eque amaca tsehue jabacuare. Jabatsu tura jadya acuare:

—Bajida juume. Ique dutya ai iyametsequi juhuaque, dutya ai tilladadiqui juyaque jadya. 18 Ique chacha. Yuneridya ique majucuare. Majutsu chacha netitsuranucacuare, ni eje tupu majunuca ishu ama. Ecuetu casa aniya majuja ishu. Ecuetu casa aniya ecuita cuana majuhuaju tuna eju cuadisha ishuque cueja ishu. 19 Erami bahue amereya iyacua ecue cuanaque eje bucha juyaque, judadiyaque jadique. Huenecue dutya mique era ejitaju petamereyaque. 20 Bahuadyami era pacarucu purari jida eque amaca eque era inayaju, tumebaedya pacarucu ude nityaqui cuanaque oro eaque. Arepa petahua ama bucha, tuquemi adebaya ama eje buchique. Erami pana cueja aya tumeque eje buchique. Pacarucu purari cuanatu pacarucu epuju ecue quisarati cuejaqui cuanaque buchique. Pacarucu ude nityaqui oro ea cuanaque tuna, pacarucu epuju cuanaque eaqueja ecatyati cuanaque buchique, —jadya tura cuejacuare.

APOCALIPSIS 2 ->